صباح الخير عليك يمة
[/CENTER]صباح الخير عليك يمة
كيف الحال
وكيف الناس
والجيران
وانا يايمة ما طيب
ولا كويس
وجعي البيقتلني
يوماتي في الغربة
وطني البيلزمني
خلي الوطن يمة
اختي واخوي وابوي
كيفن بعيشوا هناك
والراتب الممحوق
قبال يجي بيخلص
منو بيسدوا الدين
والباقي لي باكر
وفطومة ومحمد
جيرانا السمحين
كيفن بكون عايشين
والراجل الغلبان
من كم سنين عدت
فصلوهوا من شغلوا
ادوهو صالح عام
شان راجع الاوراق
وقال الكلام الصح
يايمة ديل آفات
مرضونا من قاموا
كلاب وسعرانين
لاهمهم انسان
ولا بيعرفوا الأوطان
ولا عندهم ذمة
الا الوجع راقد
والله يايمة
الغربة بكاية
الا الوطن بقتل
كل السماح الفيك
كبروا الشباب بسراع
يايمة مقهورين
شاب الشعر في الراس
باكر يقبلوا وين
من كم شوية ايام
صاحبنا ياخ انور
زولا سمح ود ناس
مرضا بسيط جاهو
ودوهو مستشفي
يايمة ياخ يبكي
وين العلاج العلاج ياناس
وين اسطوانة الغاز
ادوني امبولة
كورك شديد يمة
طلع الطبيب يبكي
مات الولد ياناس
يمة العلاج قاعد
في كل مخازن الزفت
وزارة الصحة
قام الطبيب اضرب
طالب بي بيئة تمام
وانو العلاج يمرق
ماطالب زيادة مال
يايمة سجنوهم
ولسة الوطن ساكت
ولسة الوجع راقد
ويايمة اغفري لي
من صبحي بكيتك
يايمة ماقادر
ضاقت شديد يمة
وريني شن اعمل
يايمة امكن اموت
قبل الوطن يطيب
وصية من ولدك
الضاق مر العيش
خلي الوطن يغفر
ويسامح اولادوا
شان بكرة اولادي
يعيشوا متاحبين
ويلقوا العلاج مجان
ويااااوطني اغفر لي
ارجوك سامحني
ويايمة وجعتك
الا الوطن بوجع
يلقاك مبسوطة
وسلامي لي اخواني
والصحب والجيران
توقيع ولدك محب وطنوا
تاريخ اول وجع وطني
بسيوني تربال
[email][email protected][/email]
