والي الشمالية والتكسي الجوي

والي الشمالية؟

(1)
سبقه كثيرين في المنصب منهم الدكتور فتحي خليل وابراهيم الخضر وميرغني حمزة
وعادل العوض وبدوي الخير والحاج ادم وآخرين لا نعلمهم
فات من فات ومات من مات ..
والولاية الشمالية كما هي لم تتقدم خطوة إلى الأمام
بل رجعت خطوات إلى الوراء

(2)
ولكن بصراحة كلهم لم يفعلوا ما بدأ به الوالي الجديد ياسر يوسف ؟
شنو جايينا بالتاكسي الجوي التابع للقوات الجوية السودانية ؟
وبعدين شنو حكاية الوداع الرسمي الفخيم المهيب بمطار الخرطوم
وحرارة الاستقبال بمطار دنقلا
ووفد مرافق ضخم يتقدمهم
عدد من الوزراء الاتحاديين على رأسهم وزير الإعلام أحمد بلال عثمان
ووزير الدولة بالاتصالات إبراهيم الميرغني
ووزير الدولة بالمالية د/ عبد الرحمن ضرار
وبعض اعيان الولاية الشمالية (هكذا قالوا ديل منو؟ اعيان الحركة الإسلامية ولا المؤتمر الوطني)
الطائرة مجانا ذهابا واياباً .. بصراحة لو قلت عربي عربي كانت الطائرة اتملت

(3)
وهاك يا صور وانت نازل من سلم الطائرة
وهاك يا صور وانت تستعرض حرس الشرف ؟
دي الولاية الشمالية التي نعرفها ولا واحدة تانية ؟
حاكم كلفورنيا اكبر ولاية أمريكية ذهب بالبص
واول تصريح كان ضد رئيسه ترامب ؟ ما علينا
ياربي الحاصل شنو؟
ومالك جاينا جية قوية ؟
ثم مالك مستعجل ؟ نحن بصراحة ما مستعجلين؟
ما مستعجلين لي جيتك أو فوات المهندس/ على العوض والي الشمالية الذي سبقك
والاثنين من شرق السودان؟ هو من كسلا وانت من القضارف ..
وبصراحة ما تفرق معانا تكونوا من وين؟

(5)
بس قبل ما تجينا كان تورونا على العوض فشل في شنو؟
نحن ما اشتكينا منه ؟ لأنه بصراحة الراجل ازهري (وفي حاله) وما شفنا منه لا كعب لا شين
وقلنا أزهري لأنه خريج جامعة الأزهر الشريف تخصص هندسية تصنيع غذائي وعمل منذ العام 1980 مهندسا بوزارة الزراعة وقت الزمن زين قبل أن يغادرها الى إحدى الشركات الزراعية الخاصة، ومنها الى مشروع القاش الزراعي والولاية الشمالية ولاية زراعية وليس اعلام .

ومشكلة العوض برغم خبرته وازهريته هو (حركة إسلامية يعنى كوز بالقديم) نفس مشكلة الولاة السابقين كلهم حركة اسلامية ومؤتمر وطني ..
ولكن تميز عليهم ياسر يوسف بعدم الخبرة في اي شي إلا في إدارة اعلام المؤتمر الوطني ثم وزير دولة بوزارة الإعلام.. ولكن رجل اعلام فقط تحب السفر بالطائرات والوفود ..

(6)
والله بصراحة ما تفرق معانا والي جديد أو قديم كلهم يمثلون المؤتمر الوطني
وكلهم يمثلون الحركة الإسلامية ولا يمثلون الولاية الشمالية.

وبالتالي لا نعول عليكم كثيراً ولا نتوقع منكم خيرا ابداً؟
سبقك آخرين في المنصب
وبنوا مجدهم وصيتهم على اكتافها
اخذوا نصيبهم وفاتوا وظلت الولاية الشمالية قائمة تصارع الطبيعة
والولاية الشمالية صامدة قائمة مثل تمثال ترهاقا بمتحف السودان القومي
والولاية الشمالية مثل شجرة السيال في صحاري السودان
سميكة اللحي حادة الأشواك
تقهر الموت لأنها لا تسرف في الحياة … كما قال الطيب صالح

شنو يا دجانقو جايين بالتكسي الجوي
ورينا آخرك ورينا الفي كيسك عشان نعرفك
هل تدرون ماذا قال الوالي الجديد ياسر يوسف
قال أن من أولويات برنامج حكومته خلال الفترة المقبلة تشغيل كل مطارات الولاية الشمالية؟ كل مطارات الولاية ؟؟
مطار دنقلا ومطار مروي ومطار حلفا وربطها بمطارات العالم خاصة مع جمهورية مصر، لإحداث حراك إقتصادي في الولاية
يا سلام ..

(7)
خلاص ده برنامج كارب يا الفاتح جبرا نحن بعد داه ما عايزين نعرف مشكلة خط هيثرو
والي الشمالية القادم بالتكسي الجوي وعد بربط مطار مروي بكل مطارات العالم
طوكيو وسنغافورة وماليزيا وجدة وابو ظبي ومطار دبي ومطار اسنطبول الجديد
وبعد دا نبيع الدقيقة في مطار هيثرو (مروي) بالشي الفلاني.
ولكن الوالي الجديد نسى أن يذكر المدة التي يحتاجها ليفعل ما يريد ؟
بصراحة تصريح الوالي الجديد طلع فالصوا

نحن اهل الولاية الشمالية لسنا في حاجة لمطارات ..
قروش المطارات وربطها بالعالم تحتاج لها الزراعة وكهربة المشاريع الزراعية
نحتاجها لترعة السد لنسقي الحرث والارض ؟ وليس مطار لولاية خالية من السكان

نريد مشاريع زراعية يصلها الماء للذين شردهم السد ..
فقط كل ما نريد .. لا نريد هيثرو جديدة في مروي

عبدالرحيم وقيع الله
[email][email protected][/email]