حنين
وانا من أقاصي إلاهة كاتلني الحنين لي طلتك
تاتيت حروف الغنوة والنفس اللهيف شان اوصلك
لكني والليل الاسيف
منيتنا ضلاها الخريف
دافر نزف من غيمه عصفورتين يغنن للحزن والشوق مشلهت بين حضور إلدمعة والماضي الوريف
منك شهق يا عزة كم مليون رصيف
واضح مستف بالهتاف أشواقه لي رنة هديل الفجر والزمن الشفيف
رشي المشاعر والمواسم بالأمل ان شا الله ما يغشاك زيف
وان شا الله لما النيل يفرهد بالغناوي الطالعة من أنفاس هواك تلقيني يا فجة دروب الضلمة بالضي الكثيف
واقف جواك ملهوف موالف فكرتك ***********
هشي الغمام للدنيا والغبش الغلابا عشان حنانك لما يوصل بالمطر يكشح سناك للناس يفج الحزن بالفرح الملازم خطوتك
***********
دليني لي اقرب طريق
يجمعني بيك ألقاك طل غيمات محنة تبلل العاشقين رواك منشرحة زي فجرا طليق
ينشلني من جوف الحريق
يدلق حنين الكون علي
واطراك يا (كوش ) العظيمة …
والناس تسرج في الدروب
الخيل سيوف من ( نبتة ) لي (حلفا ) القديمة …
واطراك من ( أسوان ) الي (نمولي )
..ومن حدود البحر لي أقصى (الجنينة.).
الكون صحت اشماسه من ذات المكان
ضون فجاج الدنيا في ماضي الزمان
ترهاقا والعزم الأكيد
العز ملك ساحاته واخضرت نجوم المجد في اروع كيان
..وانبجس نبض الحضارة على التواريخ والمدى الممتد بحسك سلسبيل يشعل نداوة ضحكتك
***********
وملكنا سر الكون بماضينا الوريق
شكلنا في الضلمة البريق
مالو الزمن لو صد راجع
لي مداك وبلغنا وارف بسمتك
***********
وامدر تغني مع السنابل والطيور للغيمة ساعة شوق زفافك عزة أشرق في البيادر عز يدوزن بالتواصل دنيتك
***********
. ( يا عديلة يا بيضا يا ملايكة سيري معاه الليلة شوين بي قدرت الله )
