محاكاة

اشتعلت نار المنقد جيداً وهي ترسل حرارتها فتلسع (قدرة) الفول بقوة فيضطرب الفول داخلها وهو يتراقص وقد بدأت حباته تكمل مراحل النضج.
بدا حاج (عثمان) متهللا وسعيدا وهو يعبئ أطباق الزبائن بطلبات الفول بعد أن يضيف إليها مقدارا من السلطة والبصل وشيئاً من الجبنة ويغطي سطحها بلمسة شفافة من زيت السمسم فتنتشي الجبنة وتغرق حبات الفول .
كان الزبائن يتوافدون بكثرة على محل حاج (عثمان) لأن مذاق الفول وطلبات الفتة كانت شهية وتعامل حاج عثمان مع الزبائن كان جيدا.
كان حاج (بشير) جار حاج (عثمان) يرقب هذا المنظر كل يوم الصباح ويجلس في كرسي أمام منزله وهو يعد الزبائن ويحسب تكلفة كل طبق ويرقب حاج عثمان وهو يحزم إيراد اليوم بعد أن يرفع الإبهام فوق النقود بينما تنام الخمسات والعشرات فوق السبابة والوسطى أما الخنصر والبنصر فيكملان متابعة عد النقود مع حاج بشير الذي يزدرد ريقه مع كل حركة عد.
وفي المساء كان حاج (عثمان) يوقد النار مجددا لبيع الفول وبجانبه صاج متوسط الحجم تنضج وسط زيته حبات الطعمية.
ظل حاج بشير يرقب كل ذلك ويطلق تنهيدات عميقة من صدره وهو يحسب مع حاج عثمان إيراد اليوم كل ليلة من بعيد حيث يحرك شفايفه مع كل حركة عد (عشرة ….عشرين ….تلاتين…
عندما حل المساء أدخل حاج بشير كرسيه من أمام البيت وجلس في سريره في الحوش الكبير ونادى على زوجته حاجة آمنه وهو يطلعها على قراره : …هوي يا حاجة أنا عاوز أعمل لي (قدرة) فول وصاج طعمية والله حاج عثمان ده بكسب كسب ماعادي …..قالت حاجة آمنة : سجمنا ياحاج كيفن الكلام ده الزول جارك تفتح شغل جنبو كده على عينك ياتاجر والله عيب ياحاج…..!!
أجاب حاج بشير: عيب شنو انتي لو شفتي العشرات والعشرينات ما كان قلتي كده وأنا خلاص حزمت أمري بعدين عاجبك الفلس اللي احنا فيهو ده .
انسحبت حاجة آمنه لا تلوي على شيء بعد أن أعياها النقاش وقد حملت صحن الفول الفارغ والذي كان حاج عثمان قد أخلص في (تصبيطه) لهم رغم أنه (بالدين) .
استلقي حاج بشير على السرير وهو يطالع السماء وكان يرقب النجوم ويرى كل نجمه (طعمية) ويرى القمر (صحن فتة كبير).
وفي صباح اليوم التالي خرج حاج عثمان ليوقد نار المنقد كالعادة ولكنه تفاجأ بنار في الاتجاه المقابل( وقدرة ) فول على الأرض لم ترفع بعد وعمك حاج بشير يجهز في أواني العمل ويرفع يديه محييا حاج عثمان …..هازول ازيك بس اعل ما ضايقناك.
قصة حاج عثمان وحاج بشير صارت ديدن الكثيرين.
تعمل (قدرة) فول تلقى الجبران عملو (قدرة)، تشتري رقشة الحلة كلها تشتري رقشة، تأجر عربتك الهايس ترحيل طلاب الى احدى المدارس تجد كل الأهل أرسلوا عرباتهم تراحيل، تفتح كشك اتصالات كل الجيران يعملوا تحويل رصيد حتى بتاع الخضار يحول رصيد. تفتح محل فضائيات تجد الجميع علق أطباق فوق رأسك، تفتح بنشر طوالي جمبك بنشر، مغسلة عربات جمبها مغسلة، تفتح محل عصير (طبيعي) شهر بس تلقى 20 محل عصير طبيعي، سوبر ماركت جمبو محل سوبر ماركت، محل باسطة طوالي محل باسطة، كوافير جمبو كوافير، صيدلية جمبها صيدلية .
أها مطعم سمك طوالي أي تاجر مشروعو هسع قبل بكرة محل سمك .
ياخي لو غيرت طلاء البيت الجيران (يقدروا مايقدروا) يغيروا طلاءهم واحتمال نفس اللون كمان.
السؤال نحن بنحاكي ليه هل من باب أننا( بنبقر) لنجاح الآخرين أم نحسدهم ونرغب في مشاركتهم رزقهم أم أن القدرة على الابتكار والتطوير والإبداع ليست من شيمنا .
حتى ناس الحكومة بحاكوا بعضهم البعض مثل والي شمال كردفان الذي قرر نقل تجربة ايلا في تطوير مدينة بوتسودان؛ الى شمال كردفان.

Suheir [email][email protected][/email]