رياح الثورة – شعر

رياح الثورة

يارياح الثورة هبي وياجماهير وطني لبي
وياغمامات البشارة بي جديد تغييرنا صبي
وبي حجار سجيلك أرمي فوق رؤوس الخونة كُبي
وتاني قطري من طهارك اغسلي الأرض العزيزة
وطهري الدنس العليها من ضلال الجبهجية
ونضفيها من غذارة الأمنجية
صحي عطبرة من ثباتا وهيا روح الثورة ذاتا
بالحديد والنار فتية
ويا الأبيض ذري رملك في عيون الارزقية
خلي كسلا تعلي صوتا في سواقيها وبيوتا
وبي ثبات توتيل قوية
ويانيالا من ظلال الجير بسالة هلا في الفاشر هلالا
حركي الغضب العشية
مدني ثورة وهلا عيدا تمد لي كادقلي إيدا
وتنسند سنار تجيا
من ثغر دقنة وسواكن شبت الثورات براكن
قالدن حلفا وكريمة ودنقلا ومروي العظيمة
ومن ربوع كوستي العليا
تصمد الخرطوم بقوة تهدي لام درمان تحية
وكل شارع وكل حتة حقو نطلع مية مية
عشان وطنا عشان ترابنا عشان هوية
يلا نطلع ألف ومية نصحي أحلامنا الندية
عشان كرامتنا وشرفنا عشان نصون عرض البنية
يلا نطلع مية مية ويكتب التاريخ حكايتو
شعب مابنسى القضية

أحمد الطائف
[email][email protected][/email]