رسالة إلى الحوت
رسالة إلى الحوت
نادية عثمان مختار
ــــــــــــ
عايزة أقول
آآآآآآخ ياحوت
مشيت يازول ؟؟
يافرح الأماسي الحلوة
ياعطر الورود الناضرة
يا وطن المحنة وناسها
فيك ياحوتة سمح القول
مشيت يازول ؟
مشيت ياجان ؟
ياأسطورة الأزمان
يامدهش
ياباهي
وكم زاهي
وكتير إنسان
ياإزميل
يا نحات
يارسام
وياخرباش بلون الفرحة في الوجدان !!
ياضيء قمرة
ياقنديل
يا شمعتنا
يا فانوس
يا ( شمس المزاد ) !!
يازاد
ياود بحري يا فنان
و
يا سلة غذاء السودان !!
مشيت يازول ؟
وكيف بالله تفوت وطنك ؟
وكيف بعدك تعيش أوطان ؟!
مشيت ياحوت ؟
وهل ياحوت يجوز ياحوت ؟
يجوز تغرق في بطن الموت ؟!
وبلا استئذان؟
وبدون ماتضم عيال ضهرك
وتقالد ( فائزة) بالتحنان ؟
وبدون قولة وداع ياجان ؟
تسيبنا تفوت ؟!
بيجوز ياحوت ؟!
الحواتة يا محمود
بعدك تاني وين يمشوا ؟!
الحواتي عاشق الجان
مين يجرؤ على غشو ؟!
منو المن بعد حوت الفن
قادر يبني زي عشو ؟
مشيت يازول ؟
ومنو القال ليك بنتأقلم
ونتصالح مع الاشواق ؟
منو القال البعاد عادي
ومازي الجمر حراق ؟
والحواتي كيف بيعيش
ومابكون لي (أبوه) مشتاق ؟!
حوتة (العالم الدكتور)
كان ياهو الدواء وترياق
مشيت جان ؟
يا محمود أقول ليك شيء ؟؟
تعال بس لحظة من فضلك !!
تعال شوف المحبة الصاح
والعشق البي كلو صراح
تعال شوف الخلق تهتف
وتعال شوف العيون تنزف
ولد حالف يموت بي وراك
وبت تدعو وتقول بشراك
يازول ياخ أقول ليك شيء ؟!
تعال قبال تفوت تمشي !
تعال ضم الوطن ساعة
وضم العاشقين ساعتين !
تعال شوف الدعاة الصالحين
بيختموا ليك في القرأن
ويقولوا كسبت دنيا ودين !
وبقولوا الحوت ده أصلو حنين !
مشيت يازول ؟
الصوفية والحيران
وجميع الأمة في السودان
شباب ببكوك مع النسوان
وناس محشودة في الصيوان
وناس تتشابا للديوان
مكان صورك هناك بالكوم
ومكان ريحة عبير الجان !
مشى السلطان ؟!
سؤال تلقاه في كل لسان
وكل حواتي جد حيران
مشى العادل كما الميزان ؟!
مشى المحبوب ؟
مشى المجذوب ؟
مشى مادح النبي الإنسان ؟!
حليل محمود !
تعال شوف المحبة الجد
وشوف شارع المزاد مقفول
وبحري حزينة تبكي تقول
حليل فارس الكرم والجود
حليل ود الرجال محمود
حليلو الكرمو مالو حدود
حليلو أبوكا يامصعب
حليلو أبوك يا القصواء
أبوك ياحنين وياحاتم
أبوك ياحمزة والعباس
حليلو أبو الجميع محمود !!
يا فنان أقول ليك شيء ؟!
خلاص نوم إنت جد وإرتاح
لأنك جد تعبت كتير
وإتحملت فوق للصبر
وأثبت الرجولة الصاح !
نوم يامنبع الأفراح !
نوم ياحوت !
وأمانة عليك كون عارف
(محمود راح يكون في القلب) !
لابننساهو أصلو في يوم
لا من بعدو زول بتحب !!
محمود ياحبيب الناس
وديمة عليك تقول يارب
حبك في قلوبنا يظل
لابفوت لا بقع في الجٌب !
نوم يازول
أمانة عليك تنوم ترتاح
وسيب لينا العذاب والشوق
سيب لينا النواح ياحوت
والغرق البفتش طوق !!
نوم ياجان وكون عارف
حبك فينا دائما فوق
وأنت ( أبونا ) فوق الفوووووق !
( صحيفة فنون)
أول مرة أعرف انك شاعرة يا نادية !
قصيدتك عفوية ومعبرة, لكن رجاءآ انتبهي لخطورة البيت دة :
وهل ياحوت يجوز ياحوت ؟
يجوز تغرق في بطن الموت ؟!
أستغفر الله العظيم لي ولك وللمسلمين..
كل زول حيغرق في بطن الموت..وكل من عليها فان ويبقى وجه ربك ذو الجلال والاكرام
غايتو احاسيس جميلة لكن كلام ما بعرفو عامل كيف؟
كلمات معبرة ومؤثرة تسلمي يا أستاذة نادية يا إنسانة يا راقية يا حساسة
تشكر الاستاذة نادية على مشاعرهاالطيبة تجاه الحوت والحواتة
بس ما تكرريها تانى
والله شعرك زي جر الكلب في الطين دا شنو الماعرفناهو اي واحد عايز اكبر كومو تاني حاجة هل يحوز انو الموت ياتي بلا استاذان هذا لايجوز دا كلو استنكار علي الله يا خت الاجال بيد الله هذا ؟؟؟
رحم الله محمود عبد العزيز والان عرفت فعلا ان لكل زمان رجاله فوالله انه لا يستحق كفنان كل هذا الطراء ولكنا نذكر محاسن موتانا ابنتنا بنت مختار الا تدرين انك مبالغة ام انني فعلا فات علي الزمن واصبحت من زمن تعال يازمان
ده جهل شنو ؟
وهل ياحوت يجوز ياحوت ؟
يجوز تغرق في بطن الموت ؟!
دي عوارة شنو ؟
ومكان ريحة عبير الجان !
وده شنوووووووووووووو؟
وبدون ماتضم عيال ضهرك
وتقالد ( فائزة) بالتحنان ؟
وبدون قولة وداع ياجان ؟
تسيبنا تفوت ؟!
بيجوز ياحوت ؟!
الحواتة يا محمود
بعدك تاني وين يمشوا ؟!
الحواتي عاشق الجان
مين يجرؤ على غشو ؟!
أرحموووووونا ياناس يرحمكم الله !!!!!تأني ما نخش الراكوبة ؟ نخليها ليكم ؟ أأأأأأأخخخخخخخخي
اتقي الله يا امراة ..محمد صلى الله عليه وسلم سيد البشر اجمعين توفى ومات …فما بالك تستنكرينه على انسان عادي جدا ولا ندري مكانته عند الله ..توبي الى الله واستغفري لذنبك وانتظري الموت فانه آآآآآتي لا محال …
كدي وريني بدايتك الشعرية كانت متين ؟؟والله بتتعلمي في (وفاة) محمود ! ثانيا هل القصيدة مرت علي التجاني حاج موسي والله اسحق الحلنقي ..والله داخلة علينا هنا في شكل غزوة
بت مختار الشايقية البركة فيكم ما تشوفي شر تاني
دا شعر ولا نواح حبوبات في بيت العزاء وبعدين يا بنت الناس الرسول عليه افضل الصلاة والسلام لامن مات الصحابة ما كتبوا كلام زي دا انتي عندك راي في الموت استغفري يا بنت الناس محمود ربنا يرحموا وانتي لو من معجبين لمحمود ادعي ليهو بدل كلام الخارم بارم دا
والله كلام الطير في الباقير ده شعر كاتبنو شفع الاساس ولا انتي
البركة فينا نحن وفى متعلمينا ومثقفينا وفى العلم الرصين الكان معروف به السودانيين وبالذات الكتاب الصحفيين .. والبركة فى رؤساء التحرير الماتوا ولم يكونوا يسمحون بنشر أى كلام دون ( تمحيص ) وتدقيق والبركة فى من كانوا يبذلون النصح والتوجيه لكل من بدأ فى الكتابة فى الصحف ..!
يا نادية ان الموت من امر الله تعالى فيجب علينا ان لا نتجرأ و نستنكر امره جل و علا ((الدمع و الاستغفار لموتانا رحمة لهم فهذا افضل))
دا شعر شنو يابتي دا لتيق .. بطلي الشعر دوري ليكي أكل عيش تاني . . إن شاء الله الحوت الياكلك . .. بدل الكلام الفارغ أدعو ليهو بالرحمة . .
كان هناك مهرجان من ضمن فقراته مبارة في كرة القدم بين الفنانين والعازفين، فقام أحد الفنانين ب (تجلية) احد الكرات السهلة جدا، فعلق عليه أحد ظرفاء المتفرجين (لعبك زي غناك)، والأستاذة نادية مذيعة وشاعرة كمان !!!!
هو فى ايه ياندويه الكلام الخارم بارم دا والله الشعر الكاتباهو دا لوقراهو الحوت لمات مره تانى
اللهم أغفر له وأرحمه ، نتمنى أن تطلب الرحمة له والدعاء لأن الدعاء للميت أفضل من الشعر ده .
منظومة التخلف فى السودان
شكرا جميلا نبيلا لكل من وضع حرفا تحت هذه المرثية التي كتبتها شعورا يسمى شعرا ببالغ الحزن على فنان انسان احزن رحيله كل محبي فنه الرائع !
هي مجرد كلمات للتعبير عن الم وحزن عميييق ورغم الرحيل المر لاسطورة الغناء لا نقول إلا مايرضي الله !
هذه الكلمات الحزينة كانت حروف وتعابير بلسان كثير ممن أحبوا الحوت لجمال انسانيته وروائع فنه ولأنني وأحدة منهم جادت قريحتي بهذه الكلمات شعرا كانت أو نثرا فهي ليست أكثر من تعبير صادق عن حزن إعترى الروح ولا نقول إلا الحمد لله ولله ما أعطى ولله ما أخذ وربنا يرحم محمود وجميع موتانا ويحسن الخواتيم يارب والتعازي موصولة لأسرة محمود والدته فائزة وابنائه مصعب وحمزة والعباس وحاتم وحنين والقصواء ولكل الحواتة عشاق الراحل محمود ..!
ودمتم
وللمسئولين عن صحيفة الراكوبة وللقراء الأكارم ومعلقيها الكرام كامل التقدير والإحترام
نادية