قرعة كرتي وضراع نافع
قرعة كرتي وضراع نافع
**************************
أسماء الجنيد
[email protected]
سلام يا الحبان في كل مكان ,, لكم التحايا النواضر
الواحد إن غاب يوم ولا إسبوع ولا شهر بجي يلقى قرف الإنقاذ ملوث الأجواء ومارض الأمة النايمة
نبدأ بي قرعة نافع الماديها عيانا بيانا وبكل قوة وحمرة عين
حايم بيها من بلد لي بلد , لا خلى الخواجات ولا العرب, يعلم الله خجلت ليك ولي الناس الطابيهم معاك في مد قرعتكم للوليد بن طلال!!!
عملة ما سبقكم عليها بشر سوي , شحدتكم دي كوم والمشهد قدام الوليد بن طلال وطبة زولك المباريك للهدية القدمها ليكم الوليد بن طلال دي كوم تاني
شرطتوا عينا وفضحتونا بإسم السودان المعروف للبعيد والداني بالكرم والشهامة وعزة النفس…
لا خليتوا فيها كرامة ولا عزة نفس ,
هسه عليكم الله الخلعة والهجمة في صورتكم وإنتو طابين هدية الوليد بن طلال
طابنها زي قرعتكم الحايمين بيها كل البلود , المشهد ده ما كسر عينكم ولا حسيتو بالمهانة ؟
الزيكم اكيد ما بحس لا بي هوان ولا ذل, وكان بتقع فيكم إنتو الفضيحة إن شاء الله تبقالكم جلابية معلقة فيها كل بلاويكم
تحوموا بيها وين ما قبلتو . لكن المغسة بتقع في كل سوداني حر , ما برضى بالذل و لا الهوان
اهلنا قالوا الفيك بدربو ,, تراه الطفل المعجزة مو غلطان لما قال شحادين , لكن غلطتو رمى الشحدة في الشعب الطيب الكريم
الشحده القالها طفلكم المعجزة , ياها شحدتكم دي, مبارياكم من يوم أتحكرتوا في روسينا زي المرض الخبيث .
كان شغلكم كلو دغمسة على قول بشيركم وغطغطة , تشحدوا وتلبسوا وتملوا كروشكم وتتمغوا وتتمطوا بي إسم الشعب الغلبان
ولما الفساد طفح وزكم أنوف البشر من طرف , بقى شغلكم في السهلة ,
وبعد ده كلو يجي نافع يتبوجح ويتوعد ويهز في ضراعو!!
وكل كلامو تلحس كوعك والحكم شلناه رجالة , الراجل يجي يشيلوا مننا! . وكلام بالضراع بس
شغل بلطجية ليس إلا , يخيل لي الزول ده وسط رفاقتو في القصر الببرطع معاهم فيه , أي زول يختلف معاه بقول ليهو طالعني في الخور ,, متوقعة جدا وغيرها من هذا المخلوق غريب الأطوار قليل الفهم والحيلة , وخشمو بليلة
كلامو الأخير وخطابه في مدينة ود مدني لا يصدر إلا من جاهل لا يخبر درب للدبلوماسية ولا للسياسة ولا لي أي شيء
زول اهلنا بقولوا عليهو زول ساي , لا بودي ولا بجيب , وحرام الناس زاتها تعقب على كلامو وتديه اهمية
وشغل الضراع ده شغل الزول الضعيف الشخصية وملان خوف لي سبيب راسو
والدليل على كده الخبتة الجاتو بسبب لسانو الزفر وعقلو الأقل من السمسمة في خطابه في لندن
لا قدر فرفر ولا دافع على روحو , لبد فد لبده لامن الإجتماع إنتهى , عاصر فلقتو ولابد زي الفار,
خبتة نافع في لندن ذكرتني بي خبتة شيخهم الضلالي العلمهم السحر, التر ابي قدس الله سره
وبارك الله في ضراع اخونا هاشم بدر الدين الضراع الخدرا الرجت دماغ كبير الأبالسة وسبب أزية الشعب السوداني من يوم ما قلقل الإنقاذ في نافوخ الوطن زي الهم الما بتعالج ,, قبحهم الله جميعا
والمغسة الأكبر رغم البلاوي البتصدر من بنو إنقاذ والوجائع البفكها نافع بي لسانو و ضراعو ويتحدى بيها الشعب وما فاضل ليه إلا يقول ليهم طالعوني في أبو جنزير
رغم ده الشعب صامت ونائم نوم أهل الكهف !!
شعب حير العالم كلو . الفساد الفي السودان والوضع الراهن والكارثة الإقتصادية المتوقعة
أسوأ من أي بلد في العالم . أسوأ من أي بلد هز الشعب شجرة حكامه وجعلهم يتساقطوا الواحد ورا التاني زي الفطائس
وخير دليل على الشعوب الما قبلت بي فساد حكامها وقلعتهم من جذورهم , شعوب كل من مصر وتونس وليبيا, وأخيرا سوريا واليمن في طريق الحرية قريبا إن شاء الله
لكن نحن نحمد سيدنا بقى تحدي ورجالة عديل وبرضو صامتين كصمت أهل القبور,, عجبي والله
******
والله يا بنت الناس لم اشعر بالذل والهوان بمثلما شعرت به وانا اطالع صورة هذا الكرتي وهو "يقعي" مستجديا امام الامير
هل يعقل ان يتسول وزير خارجية دولة تحترم نفسها وشعبها من رجال اعمال؟
الذي لا يدركه هذا الكرتي ان هذا الامير يعرف عن اقتصادهم اكثر مما يعرفون هم عنه
يعرف مؤشرات الاستقرار السياسي والاقتصادي والمالي في السودان ويدرس مؤشرات اداء الاعمال في الاقتصاد السوداني ويدرك رتبة السودان في سلم الفساد وفي البيروقراطية وفي المناخ والبيئة الاستثمارية ولن يقدم على استثمار ريال واحد بدون ان تفيده هذه المؤشرات الدولية بان الامر مربح ومجدي
يقابلهم بادب ويقدم لهم القهوة العربية والهدايا ويضحك على غفلتهم من وراء ظهورهم
والله يابت الجنيد ماعارف اقول ليك شنو واخلى شنو ، كلامك كلو صاح ، لا خلو لينا موارد ولا خلو لينا كرامة ، وفعلا منظرم امام الوليد بن طلال كان حاجة مقرفة جدا وكد ان الناس ديل لايملكون لا برامج سياسية او اقتصادية ولا يملكون كرامة او عزة نفس التى عرف بها الشعب السودانى ، وبالجد فقدوا البوصلة وماعارفين يسو شنو لكن بقولوا البتجى من السما تتحملا الواطة ودا قدرنا لكن لن يستكين الشعب السودانى لذلك فها هو يستعد للانقضاض عليهم وخاصة بعد ان اتضحت كل الامور خاصة مسائل الشحدة والكورية الشايلنها وحايمين بيها بلاضافة لقلة ادب ابو العفين واستفزازه المستمر الذى فاق الوصف
الف حمد الله على السلامة يا اميرة افتقدناك وافتقدنا مقالاتك اللازعة في الايام الماضية ونرجو ان لا تحرمنا وشكرا …;)
هسه عليكم الله الخلعة والهجمة في صورتكم وإنتو طابين هدية الوليد بن طلال
طابنها زي قرعتكم الحايمين بيها كل البلود , المشهد ده ما كسر عينكم ولا حسيتو بالمهانة ؟
عليك الله ما عندكم نسخة منها
حمدا على السلامه بت الجنيد بس تانى ما تغيبى كتير اذا قدرتى كترى لينا متواقتك دى . الكلام القلتى ده كلو صحيح ونحن ما عندنا تعليق انت ما قصرتى و ان شاء الله الجماعة ديل يدركوا ان الله عز الانسان بالكرامه و يتزكروا هم زينا كده بشر
سيبي الاحباط التغير قادم قادم ولا بد ان تكون المرحله السياسيه والاقتصاديه والاجتماعيه والثقافيه القادمه تتجاوز كل من عمل في السياسه في المراحل السابقه فترة إكتوبر ومابو والديمقراطيات الثلاث وعهد المحفل الاسلامي وحاريقي البخور للغرب
عفييييييييييييت منك يا بت الجنيد……….يا مهيرة, و حق لك أن تعجبي من الشعب السوداني….فهو حالة خاصة…….و ين "الرحاطة"؟
لا وكمان شحدة مع قلة ادب وحمرة عين لامن دول الخليج رفضت تشحدهم حبة دولارات في نفس الاسبوع مشو لايران طوالي عاميلن فيها بخوفو دول الخليج … المشكلة انو دول الخليج بتعاين للسودانين الليها تاريخ مشرف وطويل معاهم واللي النظام بيحاول يستغل هذا الارث العريق للعلاقات بين الشعب السوداني ودول الخليج …
ودي مشكلة ابن العاق دائما ما يستغل ما وجده من ارث ابائه في الشر
THANKS TO ALLAH FOR COMING BACK (BINT AL SHEIK
YOU REALLY BRING UP TO OUR NOTICE WHAT WERE REALLY
GETTING WORSE NOW.
العيب عند اهل العيب شرف
لماذا الاستغراب . هم لصوص وكذابيين وكمان شحاتييييييييييييييييين مع حمرة عين الاهبل .
غايتو حكمونا الهبل والسراقييين الله بكفينا شركم