مشكلة من امها..؟؟

مشكلة من امها..؟؟

عباس عمر
[email][email protected][/email]

الخبر : لا يوجد دولة – غير السودان – تبيح تصدير إناث أنعامها بلا ضوابط، أي المنتجة منها وغير المنتجة؟..منذ 2008..؟
:
الكلام دا معناتو ..تجفيف أناث..طيب الما منتجة دي عرفناها..قطعت..لا ولادة لا لبن..طيب المنتجة دي..في زول يبيع بقرتو..عشان يشتري لبن بدرة..وما الليلة بس..يعني حيشتري (بدرة وبعد بدرة)..؟
:
وبعدين الما منتجة دي..قايلنها هينة ولا لينة..وبعد الخدمة الطويلة الممتازة..عايزين تغربوها وتبيعوها بالرخيص..طيب اسمعو الكلام دا..عشان تعرفوا قيمة الما منتجة دي..:
:
في جنيف في حاجة اسمها اللجنة الدولية للموارد الوراثية..دي بتسجل (الشريط ) الوراثي لكل سلالة حيوان لكل دولة..عشان ما تسرقها دولة تانية..طبعا نحنا مشكلتنا..انو ما مسجلين ولا بهيمة ولا خروف..في اللجنة دي..
:
.وياريت لو المشكلة في (الشريط) الما مسجل بس..نحنا هسع بدل هم يسرقوا..الشريط..بنديهم (الشريط) بي (المسجل بتاعو)..(المنتجة والغير منتجة)..؟
:
غايتو وزارة الثروة الحيوانية دي حيرتنا..زول عاقل ما بطبق قرار ز ي دا..غايتو نقول ليهم (من عاشر عجلا..اربعين يوما)
:
طيب صدروا… لكن للضحية..شوفوا (البقرة البتلد) ليكم خرفان ..وين..؟عادي يعني ممكن تكتبوا في عقد التصدير..(ليكم البقرة..ولو ولدت خروف حقنا)..يعني تصدير في شكل اعارة..
:
وبعدين عارفين انو الاناث كترت..بس ما لدرجة التصدير..والاعارة..
:
يعلم الله اللبن غليتوهو علينا..ورطل اللبن..التقول رطل لبن طير..؟..
:
اطفالنا جاهم سوء تغذية من لبن البدرة الضارب..ومرات لبن البدرة زاتو خلوهو..والطفل يبكي (اللبن ابو لي بي)..؟
:
حقوا العجلان وصغار الخرفان..تتطلع في ثورة..ويكتبوا يافطة (لا لتصدير امهاتنا..البصدر امو..الترابة دي كالت خشمو)..؟
:
تصدير الاناث..يعني الامهات..يعني دي مشكلة كبيرة..غايتو يادوب الواحد فهم راندوك الشباب اليومين ديل لما يقولوا ليك..(مشكلة من امها)..