قسمة الفائض
قسمة الفائض
الفاتح جبرا
[email][email protected][/email]
الأستاذ الجليل
الفاتح جبرا … السلام عليكم
ارسل اليك هذه الرسالة التي وأعلم علم اليقين انها لن تثير في نفسك أي نوع من الدهشة والإستغراب على الرغم غرابتها ومرارتها لأن ما يحدث في بلادنا الآن يفوق حد الدهشة .
أستاذي :
كلنا عارفين انو الجرد السنوي ومعادلة الميزانية بيتم في شهر 12 واكيد كلنا شفنا اﻼجتهاد والزحمة البتكون في مكتب الحسابات اخر يوم .. أنا طبيبة إمتياز أعمل بإحدي المستشفيات الحكومية ، قبل يومين عندي ورق بيخصني لازم يمشي (الوزارة) ، إدارة المستشفي مشكورة جهزت الورق لكن الموظف بتاع السيرك الفي المستشفي إتضح إنو عربيتو عطلانة قمتا قلتا أوصلو بعربيتي عشان ما أعطل روحى .. طيب ايه الرابط بين معادلة الميزانية والزحمة والحسابات وبين السيرك والمشوار ده أقول ليك يا استاذ .
أول ما الموظف بتاع السيرك ركب في العربية بدأ يتونس معاي بدأ يحكي ليا كيف انو مبسوط من نائب مدير المستشفي ﻻنو اقتطع من (الفائض ) السنوي بخزينة المستشفي عشان يشتري أدوية من اﻼمدادات طبعاً إندهشتا وسألتو هي مستشفياتنا الما فيها (شاش) دي بيقضل في خزينتا فائض آخر السنة؟
لما الموظف شاف إني مندهشة من الكلام القالو بدأ يشرح ليا :
شرح ليا إنو في آخر كل سنة بتكون في مبالغ فائضة في خزينة المستشفى وإنو قبل بداية السنة المالية الجديدة لازم خزينة المستشفى وحسابها في البنك يكونوا (نضاف) ولونهم أبيض (يسر الناظرين) .. قمتا سالتو في إندهاش (والقروش البتفضل دي بتاعت شنو وبتجي من وين؟) فأجابنى بأنها بتكون مثلاً في فروق حسابات لصالح المستشفي يعني فحص مثلاً بى 6جنيه و 85 قرش والمواطن بيدفع سبعة جنيه وكذلك الأدوية وبقية الخدمات غير باقي قروش التسيير المدياها الدولة للمستشفي المهم طلع انوخزنة المستشفي بيفضل فيها باقي زي 30 -100مليون جنيه بالقديم وطبعا إنفاذا للقوانين وامتثالاً للوائح وعشان تبدأ السنة المالية (على بياض) القروش ﻻزم تختفي فيودوها وين ؟؟ أتاريهو إنو العرف في هذا المستشفي إنو القروش دي ليلة رأس السنة بتقسم بين السيد مدير المستشفي والسيد نائبه والسادة المحاسبين اللي عشان كدة بيكونو قمة الإجتهاد في ضبط الميزانية (في انتظار القسمة)..
بعد ما سمعتا كلام الموظف لقيت نفسي لا إرادياً اتفتحتا فيهو وهاك يا (ردحي) .. ده كلام غلط .. ده شئ ما مفروض يحصل ..
المستشفيات لا فيها شاش لا جونتيات لا فراشات يكون فيها قروش بتفضل؟ المهم بعد شوية إتذكرتا إنو الراجل ﻻحول له ولا قوة وما عندو ذنب في الموضوع قمتا استغفرتا وإعتذرتا وبعدين واصلت اليوم وعيوني وسط راسي من الخلعة ومتين يالله اصل البيت عشان احكي الكﻼم دا ﻻبوي .المهم انا بحكي لأبوي جاء أخوي الذي يعمل لعدة سنوات بصيدلية احدي المستشفياتالحكومية فسالتو: انتو نهاية السنة بيكون عندكم فايض في الخزنة جاوبني .. (أيوه) .. قمتا سألتو : وطيب بتعملو بي شنو؟ قام عاين لي باستغراب وقال ليا : ماطبعا بيتقسموه المدراء والمحاسين .
إبنتك الدكتورة (س)
الرد :
لا تندهشي يا بنتي .. لازم الخزنة تكون نضيفة و(طاهرة) في بدية كل عام !
كسرة :
طيب وكت فضلت قروش إن شاء الله أشترو بيها (دم) يا ما عندكم (دم ) !
كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)
ياستى ده بيحصل فى كل المرافق والدواوين الحكومية لعدم التدقيق الداخلى الجرد المفاجئ لمسئولى الخزينة خلال الشهر وقبل كده انا كنت فى مرفق حكومى مع احد المعارف وكان نهاية الدوام اخونا جرد الخزنة مع الكشوف المنصرفة والغير مصروفة مع المبلغ الموجود فى الخزنة وجدفرق مبلغ محترم وسالته ماذا انت فاعل ضحك وقال نصيبنا استنكرت الوضع وطلبت منه ان يورد هذا المبلغ للخزينة لاننا عندما كنا بالسودان زمان كنا بنعل ذلك ضحك وقال ده كان زمان.
هههههههه. قلت لى (طاهرة)..!!!
شكرا لك الإستاذ الفاتح فأنت تتحفنا تحريرا ونقلا . بس قصة هيثرو العند النايب العم دى دقسوووووووك فيها …..! هى اللجنة عند وزير النقل ….!
ياهو ده السودان، العجبو عجبو، والما عاجبو يشوف ليهو بلد تانية- زي ما قال الحاج/ساطور.
الأخ الفاتح جبرا والله كرهتنا في السودان ومافيه كل طالع ليك بحكاوي جديدة من بتات أفكار الهدامة ده السودان بخيره بإذه الله تعالي وبلاش فبركة ( أتق الله ياراجل في السودان وأهله ) يعني عاوزنه نكون صحابه كلنا لازم يوجد شواذ مثل حالتك أسال الله لك الهداية
Really this IS happening longtime we also knows this fact!!
تضحك مالك يا اخونا عبد اللطيف هم قصدهم مافي حاجة طاهرة ونظيفة في السودان
غير خزنة المستشفى يوم واحد في بداية السنة الجديدة
هذا ما يحدث في مستشفس وصيدلية – وتخيلو الان معي ما يحدث في القصر الجمهوري والوزارات السيادية وغير السيادية والمساعديات والمستشاريات والهيئات الحكومية وشبه الحكومية والبنوك الحكومية والشركات والمنظمات وكل دواوين وخزن الحكومة – هذه هي العقلية التي تدار بها مؤسساتنا للاسف – يا اختي لو لم (تنظف )خزائن الدولة لما بنيت هذه العمارات (النظيفة) !!!
هي سرقة وليست فائض . لأن المواطن لو طالب بباقي المبلغ لـ قالوا له : ما عندنا فكة أو يلزموه بإيجاد فكة أو يحرموه من الكشف والفحص والعلاج والدخول للمستشفي من المفترض أن المحاسب لديه ( الفكة ) التي تعينه علي عمله وإرجاع حقوق المواطنين.
هؤلاء اللصوص الحكوميين لديهم ذكاء خارق بإيجاد رسوم يكون فيها كسور بسيطة لا يحتج عليها المواطن في سبيل إنهاء معاملته بسرعة وهذا نراه في غرامات المرور وجوازات المغتربين والمستشفيات وإستخراج الجوازات وشهادات الميلاد والجنسية والمطارات وميناء بورتسودان والقضائية والمحاكم والأراضي و وزارة الخارجية وحتي السفارات في الخارج وغيرها وهذه الكسور المالية بالطبع (تلتئم )وتتكوم علي مر الشهور وتصبح مبلغ كبير في نهاية العام.
هذا حرام حرام نسأل الله أن تكون هذه السرقات وبالاً عليهم وأن يفضحهم الله شر فضيحة.
إدخل عليهم بالساحق والبلاء المتلاحق
الأستاذ الفاتح جبرا . .
تحياتي و سلاماتي . .
عايز أ قول لبنتنا دي، إنو دا إسمو التجنيب الصحي صحي ( مره بفتح الصاد و مرة بكسرها ).
الأخ الفاتح
أنا كنت بعرف جل إن لم يكن كل مسؤولي الخزينة في أي مصلحةفي السودان بيكون عنده فكه من كل الفئات عشان يرجع الباقي على داير المليم. هكذا كان أهلنا الطيبيين أهل الجباه الساجدة الأصليين وأهل الأيادي الطاهرة حقيقة لم يأكلوا سحتا لذا عاشوا مستورين حامدين شاكرين ونشأ اولادهم فالحين ناجحين لأنهم لم يطعموهم مالا حراما . هذا ما كان وقارن بينهم وبين جماعة المشروع الحضاري والله الواحد يكون نصيبه( عمولته) من ايه عملية سمسرة أو رشوة أوسرقة ملايين ومرات بالعملة الصعبة ويجيء يؤم المصلين في الجامع ويرتل المصحف كأنه ماعمل حاجة
لمثل هكذا أفاعيل نزعت منا البركة والصحة !! إنه أكل مال الحرام !! لهذا ضربت علينا الذلة والمسكنة بما طعمنا وشربنا من مال آسن مصدرهـ !!! طعمناه وطعم منه بنونا وأهلونا !! فصرنا إلى الطاعون بمختلف أنواعه ( سرطان ,, فشل كلوى ,, ……ألخ ) وصرنا على أثر الحاكم الجائر حذو النعل بالنعل سرق فسرقنا !! أجازت بطانته فعل الربا فولغنا فيه وما من حى إلا وبه دلالية يربو مالها على حساب محمد أحمد المسكين ضحية طموح زوجته الجهول !! وفى كل عام نزداد وهنا وضعفا !! فآكل الربا ينخر السوس روحه قبل الجسد !!!! فاللهم لطفاً بعبيدك فهم جاهلون ,, ورحمة بهم ومغفرة تليق بجلالك يا أكرم الأكرمين …
ياخوان ويااختى العزيزة………… انتى باين عليك خريجة جديدة … الكلام ده بيحصل كل سنة لمدة عشون سنة فى الوزارات المركزية والولائية … وكل زول بيرجا اخر يوم عشان يتم بيتو ويصلح عربيتو ويعرس المرة الثالثة………..
قال شاش قال
يا الفاتح جبرة نضافة شنه و(وطهارة ) شنه خزينتا بتلدا بلا حمل وما تقول لي البتلداهم اولاد حرام !!!!!!!
ماهي عيفه.. ولاها جيفه.. ورق صحيفه.. طاهره ونضيفه.. تامه وعفيفه
.. كل الشافه قال يا شريفه..ياني ليك خليفه
الامر عادى يا دكتورة اسالى الله انو يبارك ليك فى رزقك البسيط مصير هؤلاء الجبناء لى جهنم والامراض الفتاكة طبعا اى شخص ياكل اموال السحت وان طال الزمن مصيروا مظلم والعياذة بالله منك ترسيخ للفساد بالطرق العلمية طبعا فى البلد ارحمنا يارب العالمين
يا جبرة الحاصل ده هو الخفيف والتقيل وراء هههههههههاى.قال لازم الخزنة اخر السنة تكون نظيفة.ياجبرة مافى شىء فى السودان اصبح نظيف بفضل المشروخ اللا حضارى.
لا حول و لا قوة الا بالله, و ناس بتموت لانو ما عندهم قروش الدواء لكن قروش الحرام نار في جوفهم المجرمين ديلز
لا حول و لا قوة الا بالله, و ناس بتموت لانو ما عندهم قروش الدواء
الي اين انت ذاهب ياموطني
[Anya O]
بالمناسبة هي بتحصل والله حقيقة توجد أموال الأوفر تايم والبدلات والحوافز تسقط بحجة المالية ما ادتنا قروش تجمع آخر السنه وترجع للماليه عشان المحاسبين ياخذوها حوافز والله بعرف ناس العطلات والأعياد يشتغلوا وفي النهاية يقولوا الماليه عشان كده كل المحاسبين مرضي وبخلاء عرق الناس ظهر فيهم
كل التحية والاحترام والتقدير لك يا سودانية يا اصيلة فانت الان بضمير معافا تماما ولكن اراك سرعان ما التمستي العذر لموظف السيرك مع العلم وجود الخطأ ليس مبررا لارتكاب الخطأ
قالو المال السائب يعلم السرقه
يا سيد الطرف المكسور
حسابى معاك بقى كلو كسور
أو كما قال الشاعر والمغنى
حسي ذنب المحاسبين شنو , كل المحاسبين حراميه يعني , اتقي الله يا بت الناس
هسع اكان سالتهم يقولو ليك …. و العاملين عليها
لازم الخزنة تكون نضيفة و(طاهرة)هاهاهاههههههههها حلوه وجاهزة للحمل وعشان اخر السنة المدير يولده ويجيب منها ولد