لابنكل ولابنمل

في كم وعشرين

يالبارك فوق ضهر الامة كم وعشرين
جهلول الحكم الكاذب ما بساوي قرشين
مصيبة الهم الحارق جوف المساكين
دلدول الحكم السارق ما كفنو بيتين
البي دين الله يكضب قسمها نصين
قرقوش الرغيف مافي ما لاقينو بالدين
زمن الظلم قاهر والصورتو وشين
عزيز الرجال حافي وعربيتو نوعين
هم الرجال كافي يدوهم فوقو كفين
قهر الرجال قاسي والهمة ما تلين
خم الحرام سافي والشعب مسكين
دين الإله صافي مردغتو في الطين
عدل العباد نافي حكم الزنازين
بطش العباد ساكي التقول مرفعين
تشريد العباد فنك سويتو تمكين
كتل الرضيع دارفور ما ترمشلك العين
هتك العرض وافي مليون وبنتين
جلد الحريم سيرتك سوات الملاعين
عصابة الحكم ناسك لاهطين ملايين
الجاز وما نافع في حكمك الشين
غندور ومندور وعبد العاطي اب لسانين
وعلي وغازي وكرتي تقول تنانين
كرسي الحكم همك ساطور وسكين
جزارة الوطن تمت والباقي زفتين
القتل اتفه الاسباب يا امير المؤمنين
الحرب الدمار الخراب كم وعشرين
الجهاد الجهاد ولأمريكا ساجدين
الشريعة الشريعة في السرقة شاطرين
الكان في حوش بانقا بالطين بقى فلتين
الناس التقول ابينا هم المجرمين
الناس التموت ابينا هم المخربين
الناس التموت تلتينا تقهرها تلتين
الناس كلاب الامن حرسك واطين
الناس الصدور عارية مليانة اليقين
الناس التهد حكمك شوف الميادين
الناس التشيل راسك الحرة الميامين
الناس التعيد مجدك والكل آمنين
الناس التعيد سيرتك الحرية طالبين
الناس التعيد عهدك يا بكرة يا الحين

البنشرجي 6/10/2013