مواطن القضارف مغلوب على امره

دي قصة شاب مع وزارة التخطيط العمراني بالقضارف

[CENTER](وزير تخطيط ام زير نساء)
[/CENTER] الفين وعشرة قبال اعرس سمعت انو ناس اللجنة الشعبية بتاع حينا دايرين يقدمو للشباب في الاراضي وانا ساكن مع ابوي واخواني التلاتة والبيت زاتو ضيق المهم مشيت ليهم وقدمت ودفعوني 50ج وشلت ايصالي طبعا الايصال بي 13.5ج
لاحظتو الفرق بين الرقم الدفعتو ورقم الايصال اكلت معاي جمبة مشيت سألت واحد من ناس اللجنة قال لي انو دي بتندفع لي موظفين الاراضي عشان يجيهو لينا شغلنا يعني رشوة وكدا يا جماعة انتو نسيتو انوالراشي والمرتشي في النار يا جماعة انا داير اعرس ما تدخلوني في رشوة .
بعد تلاته شهور حسب الموعد مشيت اﻷراضي لقيت الوزارة ملانة شباب من كل احياء المدينة راجين ينشرو اسمائهم انتظرنا لي اخر اليوم وبدون نتيجة وماحددو لينا موعد تاني المهم انا بعرف لي موظف دخلت عليه وسألتو عن الكشوفات
ضحك وقال لي انت راجي الكشوفات ؟ اكيد
والعرفتو منو حكاية الخطط الاسكانية دي عملوها عشان يمولو بيها حملة كرم الله طبعا في الفترة اتباعت فيها كترت اراضي منها المحلية القديمة وسكة حديد(السوق الجديد) و مناطق تانية كتيرة
بعد ونسة طويلة الموظف عرض علي قطعة في حي السلمابي المعروف بحي الحرامية انا رفضت وتعللت بانو غالي وكدا وفعلا سعرو كان غالي الا اسرق عشانو ( اسرق عشان اسكن في السلمابي؟!)
المهم طلعت منو واديتو رقم تلفوني علشان لو في قطعة بسعر مناسب يتصل علي
الزول طول ما اتصل يمكن اخد سنة ونص قلت اخير امشي ليو براي انا المحتاج ما هو
انا الوقت داك عرست وساكن في بيت اجار
دخلت عليه وسلامات وشنو اختفيت كدا قلت لي عرست ولله الف مبروك
اها الجديد شنو ؟والله موضوع الكشوفات حق الخطط الاسكانية مافيهو جديد لكن انا عندي ليك جديد انت موش ازوجت خلاص خلي مرتك تقدم بي اسمها
هو انا ما ادوني يدو مرتي كيف ؟!!!!!
هههههههههههه يا فردة دا الحنك الشغال وقام طلع ملف بتاع استحقاقات الشهر الفات وفتحتو لقيت كل المسحقين حريم وموقعة من قبل الوزير يا ربي الوزير دا من انصار حقوق المراة ولا …… استغفر الله العظيم والله انا ما بقدر اقدم بإسم مرتي لكن شوف لي حل تاني اقوا ليك حاجة في واحدة من زميلاتنا الوزير اداها 3 نمر نشوفا يمكن تبيع ليك
اداها 3نمر مقابل شنو لا لا ان بعض الظن اثم يمكن اشترتن لكن الزول دا قال اداها المهم الزول ح يشوفا ويضرب لي انا مالي ادا ولا اشترت
ضرب لي بعد اسبوع وقال لي جهز قروشك كم 65000ج اعمل شنو بعت الركشة وبعت غويشات المرة عشان اكمل المبلغ واخيرا بقى عندي بيت.

زينب عمر
[email][email protected][/email]