علينا جاي
علينا جاي
ايمان حموري
[email][email protected][/email]
[CENTER]
[/CENTER]
يالله علينا جاي الحادق طعم المر شايلنّو جوانا وفارشنّو بنبيع فيهو ليمون، علينا جاي اخضر رويان علّة عروقنا يابسة، يالله عليناجاي، الكوم بي خمسة وخمسة وخمسة وخمسة ببقو عشرين، وعشرين سنة معدتنا مقلوبة، لاقادرين نستفرغ الجوانا ولا ليمونا وّدر لينا القريّفة علينا جاي ,,وعلينا جاي، من زمنًا طويل لا الكوم بقي شوال، ولاالشوال لقالو خيش، علينا جاي وعلينا جاي بتاع الكشة علينا جاي شاي طعموسكر، والمٌر جوايّ، جاي بتاع الكشة عليناجاي، يالله اجري ياست الشاي ، كش رزقنا، كش سمحّنا، كش المحّنة، كش هناي كش جلدنّا كش جسمنّا كش اسمنا، ووبقيّنا ياي ، علينا جاي وعلينا جاي قاعدينّلو في شمس الهجير وخايفيّن من مطر غزير، والدفار الكبير الفيهو بتاع الكشة جاي، وعلينا جاي لامكتب مكيّْف لا فهماً مزيّف ولاحتي زير، وعلينا جاي وعلينا جاي معاكم لكن براي، براي لما اجري لحظة بتاع الكشة جاي، وكيف اجري ماجرت سنين عمري وصباي، ولازم اجري لانو بتاع الكشة جاي، وعلينا جاي ، وجرينا واتشتت رزقي واساي، انا قدّامو وهو والهّم ورايّ، ويالله جاي وعلينا جاي، وادسيّنا ساعه انا والزول الحدايّ ومّرقنا تاني نقول عليّنا جاي، يا عوضيه يابت قساي ، ياقمرة ضوّت في ليل حجّاي، والغول كان عليها جاي ، سرق الغنيه وكسر الناي، وصحي عجبنا والشرتاي،الغول علينا جاي ،وجاي علينا جاي وجاي عليكم جاي جاي جاي
يارب ارضي وسماي تحفظنا من ذاك العسكري العلينا جاي
الله ليا الليمون شوية عليا يا ناس انا ..
جربنا الليمون وما نفع دخلنا مصبعنا في حلقنا برضو ما طلع …
نعمل شنو ؟ نموت يعني !! نموت يعني ؟؟؟
يالكنت ساكن فى بيت طين والليله عرباتك واملاكك تسد العين,,علينا جى
كنت وين
تاني ما تمشى كدا ولا كدا
يلا وليس ياالله يا استاذة واصل الحكاية
نقول يلا علينا جاى البعض باع الارض والبعض الاخر باع العرض يلاعلينا جاى والبعض باع الوطن ومسك الثمن يلا علينا جاى والبعض فى العمالة ذاب وانغمس يلا علينا جاى اما اهلى الغبش مابيعرفوا الطمام لانهم متوكلين على الديان يلا علينا جاى صابرين وحامدين رغم الالم والمحن يلا علينا جاى والليمون بيعصروه للضيفان بى سكر مصرور فى القاطوع والبال رائق والخدرة خدرة ليمون فهمتى يا استاذة
ياسماحتو علينا جاى دا ليمون بارا جابوه بالطياره وعلينا جاى بارد والسحاب فوقه عايم وعلينا جاى ونشرب فيه نروا حرم من خشمنا مابتقيف وتانى نشرب وللضيف نزيد و برضوا تانى علينا جاى
صورة جميلة وليمون جميل يفتح النفس ياحليل زمن الليمون بالكوم وياحليل عمنا التوم بطلته الجميلةيجلس وسط اكوام اليمون والخضار هل يعود ؟ لا والله الماضى لا يعود وياحليل ايام الرخاء وقهوة ضل الضحى .ليت مثل هذه الايام تعود يا ايمان ونسمع صياح الباعة علينا جاى علينا جاى الطماطم بالصفيحة والبامية بالكوم وبجنيهين تملأ القفة .