شايفنك بتولول
لا بُد مِن نغفر
تجي راجعَهْ عصابْة الفاسدين
و من تاني تعود ليها الروح!!!!
يا عمنا روووح
قفَّلنا ترابيس البيبان
فخليك من دمعك و النوح
و من دور درويشنا المسكين.
فلو ساعي -و علي قولك- بالخير;
خلِّيها أخير ..
أو أصدُق قول
قول لينا بلا لف او دوران
عَلْمَان او غَبْيَان في الأول هُم مين؟!!
مُش هم المدني و عسكر قلبوها
و بإسم الدين -علي قولهم- قسموها
و الياما و برضك -يا عم- بى إسم الدين!!!!
الناس الفاسدين;
الأقبح من أسوأ ظن الظِّنين
الناس الانكشفوا قُباح
سامونا فنون التعذيب
و الموت في بيوت الأشباح
أشكال و ألوان صالحهم العام
المنفى ; جراح التغريب
القتلى .. الغرقى .. المفقودين!!!!
الناس ال بِسم الدين شَلَحونا
و رَفّونا بإسم التمكين
سرقونا و نهبونا (الإخوة) الفاسدين!!!!
و في الموت
ماشين بفتوى الكضاب الدجال
يوم افتى يكتلوا التِّلْتين
و من ديك و من قولة تيت:
في الأول إضراب الأبطال
حركة رمضان
الموت الساكت و مجان البطَّال
كتلونا في سبتمبر و ديسمبر
في النيل الازرق، في جبال النوبَهْ و دارفور
الموت الطال
لا خَلَّى جنوب لا خَلَّى شَرِق لا خَلَّى وَسَط لاشمال
و الموت السببو التقصير و الإهمال
نصالح و نتصالح مع مين
مع ال .. و ال أل .. و ال أل!!!!
ال بِسم الدين إغتصبوا الجِنسين!!!!
الغدروا شبابنا ف رمضان
نايمين صاحين بس اعرِف صايمين
القتلى .. الغرقى .. المفقودين!!!!
الأول مطلوب
يتصالحوا بينهم و بين روحهم
و يخُشُّوا صحيح الإسلام،
من ثَمَّ عليهم يغتسلوا
من كل وساخات الآثام،
بعدين المطلوب
يستسلموا لى حكم القرآن
و بيانها حقوق الإنسان
يعترفوا عديل
بى كلِّ فظايْع الإجرام،
بى قتل الناس في رمضان
و يتقبلوا منطوق الأحكام
و إن دُرتَ خِتام:
سرقونا و نهبونا (الإخوة) الفاسدين
خلّونا خلاص
لابْننسَى و لابْنغفِر
دايرنوا قصاص
و من الله يكون الغفران
ديل يرجعوا كيف؟!
بل نغفر كيف ..
ننساها مآسي التَّلَتين؟؟؟!!!!
كسرة:
#يلملم_وسخو_ويمشي_الكوز”
ديا شعار الثورَهْ الفيصل،
لكين تفتي (قعادو يجوز)
تشوف قدامك ايه البحصل.
طلال دفع الله
