عاشت ذكري ثورة إكتوبر المجيدة
عاشت ذكري ثورة إكتوبر المجيدة ..
ولشهداءها الخلود .. وللوطن الخلاص
وللطغاه المقاصل والرصاص
إكتوبر سيل بركانك سيل
بالدم وأغضب
في صدرك شيل
شيل الحزن الكابت وهم
الفقر الظلم العسكر كم
رابطين في الليل
سارقين الشعب
ناطين في القصر
أولاد الكلب
دبابة هناك علي شارع النيل
الجبهة السافلة
الراكعه تحت أقدام المال
والدين تمثيل
عاملهو قناع
بالزيف جلباب والدقن اليافطة
لشيخ عنتيل
وشعار تجار
في السوق دينار
تكبير تهليل
كرسي الترطيب بضمير في الجيب
والفقرة تزيد إن زاد تضليل
وزمانهم إزيد بالبطش ويشيد
لبيوت أشباح للشعب تصيد
وكلاب الأمن تسعر بالحيل
أو إن تعمل للكل جحيم
لافين دايشين في المدن الريف
في شمس نهار
مافيها ضليل
علشان الرزق علشان الحلم
كان يلقوا فتات
راجعين في الليل
إكتوبر لو
تمسح دمعاتم زي يومك داك
غضبك منديل
وقف عبراتم من أحزان
ضماهم شوق
لي صدر نبيل
إكتوبر سيل
كاسح زي سيل
من الجمر الصبر
ورعود الويل
إكتوبر لو
إن جيت عقبت
حتكون صاعين
غضبك غضبين
لناس زي ديل
إكتوبر ليك راعنالنا حول
كل قمرة تجي
كايسين لي شليل
إكتوبر آه
ما الشعب الهب
من بعدك تب
ماقام من رب
زي أسدا شاخ
وقرود الليل سوهو ذليل
الغضب التولل بره الصدر
فضلو بسيط ويطفح الكيل
إكتوبر آه في زمن الغش
لوجيت ح تحش لي كل طفيل
حتعيد الارض
لأيام الخصب
وح يرحل جدب
لا سراب لا كضب
ونضارك يميل
زاهي وطربان
بإيقاع الحرب
ورقصة الشعب
والثورة نشيد في حلوق الجيل
عازمين بالحزم
يتغير حال
فقري وكم طال
في الصدر تقيل
ماكل الشعب
مترقب فيك نارا من نور تدي
التفعيل
يايوما عز
لابد تجي
علي كيف الشعب
فنجان في الضل
في ضحوة سيل
علي كيف درويش
صوفي وغرقان
وقدس الاقداس
وصليب إنجيل
علي كيف عربان
وزنوج النيل
علي كيف أدروب
وهارون وفضيل
لابد تجي
علي كيف ذرات
الرمل الطين
مليون من ميل
لابد تجي
بريشة فنان
مازج ألوان
لوحة بركان
ناحت أفكار للبلد إزميل
لابد تجي
إكتوبر صاح
دغري ووضاح
للعتمة تزيل
لابد تجي
من عمق نضال الثوريين
من كل رفيق أو أي زميل
حتجيبك دم
غاصب بالحسم
تبقالنا الجاه
أو إن مانجيل
تدينا الحلم
وطنا بستان
شاقيهو النيل
سابح في الكون
في إفقوا جميل
