العشق الخريفي
حبك بصب زي المطر
غرق بواقي الساس والعشق السكن
دفق مواجع الغربه والبيت انكسر
والرجعه صبحت نوم في الرصيف
والبرد ينهش عضام قلبي الرهيف
يابت مصيفه جواي مصيف
وانا همي اصبح في الرغيف
ان شاء الله ينقدا الرهيف
والرجعه للبيت الوقع
قيلتي في ضل القلب
كان تلقي راحه من التعب
وارتحت في رمش العيون
غطيت بواقي النسمه والعسل اللفيك
مايتلما فيك كل النحل
ينهش مرارة سفري والوجع السكن جواي
بمرق وكتين تجي
ومعاك سماحة الدنيا صف
مترصه زي حظي الوقف
وكمان معاك ملكات جمال حارسات عيونك
من عيوني
يابنيه ساكناني وابت تطلع قدر ماناتلت
فكيتو قيدها
وطولت ليها عشان تمش
بارياني زي ضل السحاب
وساقايني من عشق السراب
ودتني للبيت الوقع
واندسينا في كتمه وحلم
اتعانقنا في نمه ونضم
سكينا درب الريد وقف
قافلنا اتلاشي ورحل
مد اللسان
بالحيل هو كان موقف صعب
قافلت عينيك في المنام وارتحت فيك
وسكنت فيك باقي العمر
وبدون قروش
ياحلوه طاعمه بدون رتوش
بهواك انا
قلي كيف طعم العشق
وكت انشرق وتر الغني
ويصدح معاك طعم الكلام
ونغني للمرق الوقع
يامطره كبي ماتقيفي
ماعشق زيك جد خريفي
بنلقاه وين
لو مطره قامت يوم تقيف
نندسي وين
ماهو الصريف
شالو الخريف
والمويه غنت للنعاس
وطفشت باقي الناس وجيت
ماتنوموا مالشارع فسيح
خلونا بس تحت الركام
وريحة الطين الدعاش
خلونا نرشف بقتين
من حلوه ما غشاها النعاس
حنست بسمك والبرق
مايوقفوا
يدسوني في هذا السماح
في ضوء شلع
خدر تمام باقي اليباب
وكل البلد نامت تمام
بتغني للمطر النزل
والنيل بتاوق للرصيف
غرقان ومالاقيلو قيف
وانا وانت ماعايزين نقيف
نتدفأ بالعشق الحصيف
ما انتي لي مزاج وكيف
[email][email protected][/email]
