أهالي (الجريف) ينهون هدنة الأراضي مع حكومة الخرطوم ويعودون للاحتجاجات
الخرطوم: قررت اللجنة العليا لمعتصمي الجريف شرق بالخرطوم إنهاء الهدنة مع حكومة الولاية والعودة للاحتجاجات الى حين تخصيص خطة غسكانية للأهالي، وحذرت اللجنة المواطنين من شراء أية أراضٍ بمخططات تابعة لصندوق الضمان الاجتماعي بالمنطقة.
وشهدت الجريف شرق، في يونيو الماضي، مظاهرات بسبب نزاعات حول الأراضي، سقط خلالها قتيل من سكان المنطقة العريقة.
وحسب سكان حي الجريف شرق فإن هناك تعديات حكومية على أراضٍ بالمنطقة من دون الوصول لمعالجات مع الملاك.
وأكد بيان للجنة المعتصمين طبقاً لـ(سودان تربيون) أمس، أن أهالي الجريف شرق أبدوا أملهم بعد انتخابات أبريل 2015م في أن تتجاوب الحكومة الجديدة مع مطالبهم، لكن بدون جدوى.
وشددت اللجنة على أن الأهالي سيدخلون في اعتصام مفتوح، ولن يتم رفعه إلا بقرار من رئاسة الجمهورية بتخصيص خطة إسكانية للمنطقة، وأقرت علاج مواطني الحي في مستشفى شرق النيل حتى يتم افتتاح المركز الصحي والمستشفى الجديد.
وأكدت اللجنة أنه ليس لصندوق الضمان الاجتماعي أرض بالجريف، وحذرت المواطنين في الداخل والخارج من شراء قطع سكنية في مربعي (12) و(13) بالمنشية شرق “حتى لا تضيع أموالهم هدراً وتذهب إلى مافيا الأراضي، (حسب البيان).
وتمثل الاحتجاجات الشعبية بسبب الأراضي قضية متجددة في الخرطوم، وشهدت مناطق “حلفاية الملوك” و”أم دوم” و”الشجرة” احتجاجات مماثلة بسبب نزاعات الأراضي التي تصل قيمتها في ولاية الخرطوم إلى مبالغ توصف بالمهولة.
وأوضح البيان أن اللجنة أوقفت الاحتجاجات لإعطاء فرصة لحكومة الخرطوم، حيث تم الاجتماع مع الوالي الجديد الفريق أول ركن عبد الرحيم محمد حسين قبل تشكيل حكومته، وبعد تشكيل حكومة الولاية الجديدة تم منحها شهراً من دون أن تتم الاستجابة لمطالب الأهالي.
الجريدة
أراضي الجريف خط أحمر يجب للحكومة أن تتجاوب مع رغبة مواطني الجريف شرق
لأن أراضي الجريف شرق وخاصة المتاخمة للنيل وبما فيها
الكمائن خاصة بسكان المنطقة لأنها متوارثه من أجدادهم …. وأنا لست من
الجريف شرق بل عملت معلما بها لأكثر من سبع سنوات … وأعرف أن أرض الكمائن
والجروف ملك لأهالي الجريف ويجب أن تمنح لهم …ولو كانت كرنيش للنيل
أو حتي لو وزعت مؤسسات وشركات يجب أن تكون بإسم المواطن .فضلاً لا تظلموا
هؤلائي الناس الطيبين الأشاوس … طيبة …كرم …ذوق … نخوة …
شهامة …رجولة …
فضلاً إحذروا غضبة الحليم …ولا تشعلوا النيران سلموا الأهالي أراضيهم …
بس حزين …لظلم أهل الجريف شرق الناس الطيبين وطيلة فترتي معهم
لم أجد منهم غير الإحترام الزائد والتقدير …الله يحفظهم يارب ( ج ).
يا ويلي ويلاه ،، اشتريت قطعة في مربع 12 بمبلغ كبير جداً بالنسبة لي ،،، شقى غربة
عبد الرحيم محمد حسين ذاتو قاعد يكورك و يستنجد و يطالب بتمكينه من إيجاد وسيلة حتى و إن كانت غير مشروعة لأن بغيته دعم خزينة الولاية الخاوية على عروشها
أصلاً حتى لو تم اتفاق على الأرض وتمت الموافقة رسمياً ودون مراوغات وتحايل وانتهى الموضوع على خير وسلام، ليه يسموا المخططات الجديدة “المنشية” شرق؟!!! معقول مافي اسم سوداني ميه الميه تتميز به أراضي بلاد السودان؟!!!
لو كنت من أهل الجريف شرق أضمِّن في مطالبي أن تسمى المخططات باسم سوداني صرف أو يواصلوا اعتصامهم واشارطكم راح يلقوا كل أهل السودان متضامنين معهم ويشاركوهم في اعتصامهم ويكفي أن حلايب تكاد تضيع من أيدينا كمان نسمي بأسماء ماها”هولنا”.
رسالة لأهالي الجريف الكرام:
مظاهراتكم السابقة وقفت بطلب من والي الخرطوم الجديد عبدالرحيم محمد حسين لأنو أول حاجة عملها بعد إستلام الولاية أنو جاكم وقعد معاكم في الواطة وناقشكم في طلباتكم وأنتو مشكورين وافقتو علي التهدئة والصبر.
هسع براكم أنتو شايفين انو الوالي كل يوم بيشتكي في الجرائد والبرلمان والرئاسة من الاوضاع المالية وقال أنو الولاية ماشة بالدفرة وأنو كل الاراضي باعوها وأنو الحكومة المركزية زاتها معتمدة علي دعم الخرطوم بدل أنها هي التي تدعم الخرطوم يعني الحالة الإقتصادية صعبة شديدة والوالي قال إستلمت ولاية الخرطوم لقيتها ذي الجمرة البتحرق الواطيها وهسع هو بقي شغال وجاري زي المجنون كل يوم يفتش عن الدعم والحلول ومصادر التمويل ومرتبات موظفي الدولة.. وآخر تصريح لعبدالرحيم قال كلام صعب عن رئيس الجمهورية زاتو في الجرائد وقال يالحرف الواحد الأخ الرئيس بيطالبني بتوسيع دوائر الدعم للشرائح الفقيرة ونحن مفلسين وما قادرين نعمل حاجة.. وقبل أيام جاهو مأمون حميدة وزير الصحة داير دعم للمستشفيات وتكلم معه عن هجرة الأطباء للخليج والوالي قال ليهو إتصرف معاهم بطريقتك يا حميدة لأنو ما عندنا قروش ليهم… وعشان كده حميدة طوالي أصدر قرار أنو أي طبيب داير يهاجر يدفع رسوم تقيلة لوزارة الصحة قبل سفره عشان بالقروش دي يدعمو بقية الأطباء القاعدين… أها شفتو الحالية دي؟ يعني طاقية ده في رأس ده – لأنو مافي حل تاني.
عشان كده أنا نصيحتي لأهلنا في الجريف أنكم تكملو جميلكم وتصبروا وأجركم علي الله ومافي داعي للتصعيد في التوقيت ده وحقو تنتظرو لغاية نهاية الحوار الوطني ده عسي ولعل يجيب السلام ويوقف الحرب نهائي ولما الامور تنعدل حقكم حيجيكم لغاية عندكم وأنتو معززين مكرمين لأنو الحكومة أصلاً ما ناكرة حقوقكم وأنتو عارفين أنها ما ناكراها لكن بتقول ليكم العين بصيرة واليد قصيرة.
وبصراحة مكنة الخرطوم خلاص عضمت وقربت تقيف وربنا يستر علي البلد دي.
والله انكم لمسؤلون من عمر الشؤم حتي الغفير مرورا بالقال كما قال عمر بن الخطاب رضي الله عنه
الا لعنة الله علي الظالمين