قصة قصيدة : «بتتعلم من الأيام»:الأغنية التي كُتبت في خمس عشرة دقيقة :كلمات الشاعر: الحلنقي – ألحان وغناء: محمد الأمين
كان أحد الشباب مغرم بحب فتاة، ولكن شاءت الأقدار أن تتزوج تلك الفتاة من رجل آخر.. وظل الشاب متيماً بحبها وبعد زواجها أنجبت طفلا، ولكن لم تدم حياتها الزوجية طويلا فوقع الطلاق
واستمرت بعد ذلك علاقتهما وفي ذات يوم وبينما هما يتحدثان عن الحب والريد سأل الطفل الصغير الشاب بكل براءة: ياعمي يعني شنو حب؟ ويعني شنو ريد؟
فوضع الشاب يده على رأس الطفل الصغير قائلا له (بتتعلم من الأيام) وعلى هذا الموال صاغ الحلنقي أبيات قصيدته التي قال فيها:
بتتعلم من الأيام مصيرك بكرة تتعلم
وتعرف كيف يكون الريد وليه الناس يتتألم
متين عرف الهوى قلبك متين صابك بآهاتو
متين سهّر عيونك ليل طويلة طويلة ساعاتو
وحاتك لسة مابتقدر تقاسم قلبي دقاتو»
وقال إنه كتب هذه القصيدة في خمس عشرة دقيقة فقط
الاحداث
ياريت لو ماعرفت قصتها كنت صايغ ليها في خيالي قصة اجمل خلاص الاغنية الحلوه الابكت ود اللمين حتى جفف دموعة بالمنديل كان طعمها جميل ولونها جميل وقصتها في خيالي اجمل صارت عندي ماليها طعم ياحلنقي ارجوك تاني ما تحكي قصة قصيدة خلينا نعيشها وبس
لا اعتقد ان هذه الأغنية الجميلة تكون قصتها هكذا خليك عايش باحساسك القديم للاغنية..
الحلنقي شاعر لا يشق له غبار،مرة كان موجود في منزلنا،صدقو كتب قصيدة في دقائق في موضوع مش متذكره لكن جد هو بارع في الشعر
روائع الاستاذ اجمل الاغاني واجمل الالحان مقدمة فى منتهي الروعة
والله ياحليلك يا حلنقي بعد تتعلم من الايام وغربة وشوق وعصافير الخريف واعز الناس والطير الخداري وباقي الدرر الثمينة دي كلها تكتب المشكلة !! انا غايتو بعتبرها نكسة كبيرة للغناء السوداني عامة وللحلنقي المبدع الرقيق الجميل علي وجه الخصوص.
تحياتي
سبب الاغنية اتفه مما تصور كيف وحدي تتجراْ وامام طفلها تتحدث عن الغرام ويمكن كمان ده هو سبب الطلاق
يا اريت لم اقراء السبب يالحلنقي اثبت انك ما عندك موضوع كنت احب الغنية جدا ياه للضياع
ياشباب كل المبدعين مروا باشياء مماثله اقراوا التاريخ وانظروا فى خفاياه
القصه التى انبثقت منها القصيده لاشىء فيها كل السودانيين لم يتزوجوا ممن يحبون
ايكم وولد كسلا
طلع واحد ……… ومهبب وخراب بيوت…..واغتيال للطفولة البريئة اذا كان دا الحب في نظرك الترابة في خشمك……معقول دي احاسيس مرهفة لشاعر …اخطر الناس هم انصاف المثقفين.
بدون علم وبدون اخلاق.
وهو سجم الطين منعه شنو يعرسها لما خطفوها منو؟ وتطلقت واستأنفا العلاقة برضو ما عرسها ، (مجنون ليلى ده ولاشنو) والله لا يستحق تلك القصيدة الرائعة
حرام عليك ياخى معقول أكون دا السبب؟ومحمد الأمين اشيل وابكى ويزرف فى الدموع ونحن نقول كفاية ياود الأمين دموعك غالية وكدا ,ونحن الواحد يسرح مع الأغنية وأتاريهو الأغنية بتخاطب طفل؟والله حرام عليكم .
ياسامي احمد مالدرجه دي… لدرجه تكذب الخبر اصدمته شديد انت..ههههههههه;)
صدق أو لا تصدق وأن في المرحلة المتوسطة كنت متيم بالأغنية دي بالذات وكان أيامها لا في سيديهات ولا أجهزة حديثة بس عندي مسجل قديم كدة وشريط لبو اللمين كنت بسمع الأغنية دي يومياً أبو اللمين ده ما بكى لوحده … لكن بكانا معاه