صندوق دعم القسطرة !!
ساخر سبيل
صندوق دعم القسطرة !!
الفاتح يوسف جبرا
يوماً بعد يوم تزداد قناعتي بحاجتي و(حاجتكم) إلى فهامة من الحجم العائلي (لهضم) وفهم بعض المواقف التي نعايشها ونتعايش معها والأمثلة لذلك (كتيره ومسيخة جداً) ولعل آخرها خبر توقف جهاز (قسطرة القلب) بمستشفى الشعب عن العمل نتيجة للضغط الواقع عليه إذ انه (هنا أنصحك أيها القارئ الكريم بتركيب الفهامة) إذ أنه الجهاز الوحيد بمستشفيات العاصمة (العامة) !! نعم كل مشافي أم درمان والخرطوم وبحري (العامة) تخلو من هذا الجهاز إلا (جهاز) مستشفى الشعب الذى يبدو أنه قد (قال الروووب) وفضل الإنتحار عن العمل نتيجة لكثافة الضغط الواقع عليه !
هنا يبرز سؤال : مع أهمية وجود هذا الجهاز بكل المستشفيات العامة لحاجة البسطاء من المواطنين إليه طيب الحكومة ما عاوزة تشتري أجهزة كفاية ليه؟ أيه يعني 700 مليون جنيه (ثمن الجهاز) ؟ في دولة يحتفظ فيها المسئولون في دواليبهم بتسعة أنواع من العملات العالمية ؟ ويمتطى فيها مسئولوها فاره العربات التى يتجاوز ثمنها ثمن هذا الجهاز الذى تتوقف حياة المواطنين على وجوده؟
بالإستعانة (بالفهامة) يمكننا أيجاد إجابه لهذا السؤال (البايخ) والإجابه هي يا سادتي الأفاضل وببساطة شديدة إنو وجود أو عدم وجود هذا الجهاز بالمستشفيات العامة لا يعنى (أمنا الحكومة) في شئ ، فولاة أمرنا (وأسرهم الكريمة) لا يتعالجون في هذه المستشفيات (الكشا مشا) ودونكم ذلك الخطاب الصادر من مكتب أحد المسئولين والذى تداولته (الأسافير) قبل عدة أيام وهو يطلب من إدارة أحدى المستشفيات (خمسة نجوم) التى تم إفتتاحها مؤخراً أن تضيفه وأفراد عائلته إلى زمرة مشتركيها (والحساب عند وزارة الماليه) !
لعمركم هل رأيتم مسئولاً واحداً أو أحد أقاربه يستشفى في مستشفيات (العامة) ؟ بالطبع لا فهذه المستشفيات التى تفتقر إلى أبسط المكونات الصحية (معمولة) لعامة البسطاء من أفراد (الرعية) أما الرعاة أطال الله أعمارهم وأبقاهم فأى (عنكبة صحية) والمطار على طول !! لذلك فإن حديث عن عدم توفر الأجهزة الطبية كهذا الجهاز الهام بالمستشفيات العامة لا يعنى أصحاب (القزاز المظلل) في شئ !
(خلي الفهامة مركَّبة لسه) .. هل تعلم عزيزي القارئ أن تكاليف إجراء عملية بهذا الجهاز يتراوح بين 11 -12 مليون جنيه بالمستوصفات الخاصة؟ طيب في ظل عدم وجود هذا الجهاز بالمستشفيات (العامة) كيف يستطيع المواطن الذي يكتوى بغلاء الأسعار وتدني الأجور أن يوفر هذا المبلغ و(دقات القلب لا تنتظر) ! يعنى الواحد لو عاوزين يعملو ليهو (كشف) الـ 12 مليون دى لم يلقطوها ليهو يكون حصَّل أمات طه ؟
من الواضح البين الجلي الما عاوز ليهو (أي درس عصر) أن (كوكب المسئولين) يختلف كثيراً عن هذا الكوكب الذي نعيش فيه .. ففي كوكب المسئولين يمكن لوزير الصحة أن يمتلك مشاف مزودة بأحدث الأجهزة بما فيها هذا الجهاز الذى تتوقف عليه حياة (قلوب) المواطنين بينما لا يوجد غير جهاز واحد في جميع مشاف العاصمة(العامة) الخاضعة لوزارته !
طيب .. نعمل أيه عشان ما نوفر (كاش) نشترى بيهو كم جهاز قسطرة قلب للمستشفيات العامة حتى نوقف معاناة المواطنين المرضي من أفراد الشعب السوداني الفضل في ظل عدم وجود (قروش) لدى (امنا الحكومة) لتشتري لنا بها جهاز جهازين يفكوا الأزمة دى ؟ العبد لله لديه عدة إقتراحات :
العبد لله يقوم بوضع بعض الإقتراحات :
– إقتراح 1 : ص د ج ق ق إنشاء صندوق دعم جهاز قسطرة القلب ! (يعنى أيه لو المغترب دفع ما هو أصلا بيدفع مساهمة وطنية ورسوم الفضائية وضريبة دفاع ودمغة جريح ولترعة الرهد وكنانة وللمجهود الحربي وضرائب وزكاة ولدعم الفريق القومي !)
– إقتراح 2 : بيع باقي المدينة الرياضية وشراء كم جهاز (أصلو بعد الشرتمة دى ما ح تنفع وكده) !
– إقتراح 3 : سحب سيارة من كل مسئول (يعنى أيه لو فضلوا أربعة) !
– أقتراح 5 : بيع اليخت الرئاسي (مش طلع بتاع بحار وليس أنهار ودولاراتنا راحت شمار في مرقة) !!
– إقتراح 6 : تستعجل الحكومة في إستعادة الكم مليون ريال التى أختلسها مسئول (الأوقاف) وتقوم تشتري لينا بيها أجهزة !! ( عملة حرّةَ جاااهزة)
– إقتراح 7 : بيع كل شاشات البلازما في مكاتب المسئولين (المتفرجين ليها شنو؟)
كسرة :
خلاس فك الفهَّامة ! وللا أقول ليك خليك مركبا لأنو حياتنا كوووولها بقت عاوزه ليها فهامة !!
كسرة ثابتة :
أخبار خط هيثرو شنو ؟
[FONT=Simplified Arabic][SIZE=4][B]الاخ جبرا لك التحية
انا حاكون متفائل جدا واقول وزير الصحة حيكون عندو ضمير ويتقدم باستقالتة:lool: :lool: :lool: :lool: :lool: شفت الراجل بضحك علي كيف الظاهر اني بحلم او بنكت.
لاحول ولاقوة الا بالله حسبي الله ونعم الوكيل فيكم ياناس الانخاس قصدي الانقاذ.[/B][/SIZE][/FONT]
يا أستاذ ألف حمد الله على السلامة
بما ان 379مليون دولار خاصة المدينةالرياضيةقدتبخرت واقترح السيد وزير الدفاع خصم مرتب يوم لاحيائها.. اقترح ايضا لدعم صندوق قسطرة القلب بان يدعمه هو والسيد وزيرالداخلية من الاموال المجنبة لديهما ولم تطالها يد المراجع العام ولو بشراء جهازين فقط لكل من السلاح الطبى ومستشفى ساهرون
ياجبرا… المابجيب وجع القلب شنو؟الحلول كالآتى :
1-)أى واحد قلبو موجعو إموت موتو ساكت .. هوالعايش ليها شنو؟
2-) نبيع جهاز المغتربين (عشان نقلل نسبة الإصابة)ونشترى جهاز قسطرة
3-)نعمل بنك للقلوب ( أى واحد روحو محرقاه وكره الدنيا)إبيع قلبو وعلى القبر طوالىعلى الأقل إكون عمل ليه عمل خير.
[]4-) الحكومة دى تدينا عرض أكتافها(تشتت ،تفك البيرق ، تكب الزوغة)
ونقفل بنك القلوب .
[FONT=Simplified Arabic][SIZE=5]ياجبره كلو ولا التخت الرئاسي دا أصلا مشترنو عشان الرئيس الامريكي قال لو ماعندكم يخت رئاسي ماحيطبع العلاقات وما حيزور السودان ويرفع عنه العقوبات ويرفعو أسمو من لائحة الدول الراعية للإرهاب[/SIZE] [/FONT]
Hi Author Mr/ Jabra.
please, I know that you are not going to read my observes, but in case you did, could you tell me how and when you made this brain.
استاذ جبره عليك الله خلى مع كسرتك الثابتة كسرة ثانية و خليها ثابتة برضو: وين راح توطين العلاج بالداخل؟ و اين ملايين الدولارات التي انفقت عليه؟
والي القضارف قال اتاخر اداء قسم الحكومة لانهم منتظرين الدعم الاتحادي لشراء اللاندكروزرات للوزراء و المسعورين حتى يتمكنوا من اداء اعمالهم! كم مسعور يوجد في كل ولاية و كم عدد المسعورين (باياديهم المتوضئة و غرر الصلاة في وجوههم) في الاتحادية الرشيقة؟ اذا علمت ان سعر اللاندكروزر حوالى 550مليون و ضربتها في عدد اصحاب الايادي المتوضئة ديل كوووووووووولهم …شوف كم جهاز كان جات؟ و اتذكر انو حسبنا على اللاندكروزر بس و سبنا العربات التانية، و ما جبنا سيرة الاستحقاقات و بدلات السفر و السكن و بدل العيدين و خلافه!
دا كله ساهل… اخونا الطاهر ساتي قال انه في جهاز جاء ليهو تلاته سنين لمستشفى الصداقة و حولوه لمستشفى الخرطوم و حتي الآن لم يتم تركيبه بل ” يرقد” في ظروف تخزين سيئة حتى تتم ابادته…
يبقى السؤال: من يملك المستشفيات الخاصة خمسة نجوم و ما علاقتهم بمسعوري الصحة في السودان؟!
اقترح بعد سقوط هذا النظام أن يصدر هذا الحكم على جميع الكيزان : حكمت المحكمة حضوريا على جميع الكيزان بالتداوى فى مشافى الدولة وأقترح تحديدا مستشفى التضامن الكائن بمحلية الدبة بالولاية الشمالية .وأقسم لكم أن التداوى فى هذا المستشفى عقوبة ما بعدها عقوبة
[SIZE=4]12 مليون !!؟ يعني حق الجهاز بطلعوهو من 59 مريض بس والباقي كلو ربح !!!
لا لا .. لا يشيلوا من المغتربين ولا من المدينة الرياضية بس يشوفوا القصر ابو ستة مليون ونص دولار ده ويشيلوا منه العوائد وحق النفايات بتجيب جهاز …[/SIZE]
انا لقيت ليك اخبار الخط يا استاذ جبره الخط اشتروه الى بصات الوالى وكتبو ( الخرطوم جبره )
الاخوه الاعزاء
السلام عليكم
لو ما اخاف الكضب وطبعا بقي شي عادي شديد انو المستشفيات دي زاته بقت عبء ثقيل علي الحيكومه فلابد من (خصخصتها)بيعها يعني وتتفك من المنصرفات المامنها فايده دي قولوا يالطيف
الأستاذ جبره لك التحيه
هي وينا القلوب دي العاوزين نعاجا ما قلوبنا ماتت من زمان وشبعت موت
الاستاذ جبرا
التحية لك وأنت تلامس الحقائق المؤلمة في هذا الزمن الاليم…
أكيد هناك مؤامرة من المستثمرين في صحة الانسان السوداني البسيط لتعطيل هذا الجهاز … حتي تعمل أجهزتهم التي تم استيرادها… يعني كيف يجنون الأرباح؟؟؟؟… عنما تدخل المادة في الشئ فانها تفسده
قلت لي …. أخبــار الخــط شـنــــو؟؟؟!!!
ياود جبره للعلم ودساتي…..السيد مدير مستشفي القلب د.احمد السيد من تيم الإغتيالات الأمنية وهو كوز من غير ضمير ومشارك في إغتيال الشهيد د. علي فضل له الرحمة والمغفرة وهو من حول التقرير الطبي للوفاة من كسر في الجمجمة وآثار تعذيب الي الموت بسبب الملاريا !!! رجل حانث بالقسم وبائع لضميره من أجل مكاسب دنيويةرخيصة ساكينو أنتوعشان جهاز قسطرة ؟؟؟؟؟ المسكين ليهو حق مستغرب الصحف بتكورك ليه فهو جاهز ورهن الإشارة لقتل المواطن الغلبان وليس إنقاذ حياته !!!!
الف حمدله علي السلامه يا استاذ جبره
والله شفقنا عليك عديييييييييييل
اتمني انو المانع خير
تضامن جبره:
اخبار الخط شنو
تخريمة:
حمدله علي السلامة
[[SIZE=4]FONT=Arial]اقتراح تاني ياحبرة ارجعو قروش شركة الاقطان كسرة ياجبرة[/FONT][/SIZE]:confused: 😀 😮
لك الشكر اخي جبرا ونتمني ان يجد صوتك اذن صاغية
والله ياجبره حمدلله على السلامه يااخوى انا قايلك رحت فى خبر كان والله فى بيوت الاشباح لانك معودنا كل يومين تلاته بمقال يفرج(يكهرب) عنى مصائب هذا الزمان كل يوم بفتح الكمبيوتر اقول الزول ده الليله بظهر عموما حمدلله على السلامه وماطول
الغيبه(زى ماقال الفنان) عشان ماتركبنا الظنون.اما بخصوص اهلنا الغبش فامنا الحكومه عايزاهم يموتوا دى عايزاليها تفكير هم العايشين ليها شنو اخير يركزوا على الاخره عشان مايطلعوا لا دنيا ولااخره
ولك التحيه ومااا طول الغيبه
والخط وينوا اكلوا الدودو
الموضوع يستحق فهامه فعلا ودا حالنا منذ زمن فى عام 2004 الوالد الله يرحمه كان راقج فى مستشفى الشعب وكان فى جهاز رنين مغنطىسى متنازع عليه بين ناس القلب والمخ والاعصاب الكل يقول تابع له والجهاز قابع فى صناديقه لاكثر من سته شهور فى فناء المستشفى وخار المستشفى كانت التكلفه آت ذاك 350 الف جنيه تخيل ذالك
الاخ جبرة كسرة ثانية الظاهر انك نسيت رقم 4 اقترح بيع ذهب السيدة الاولى حرم عمر البشكير الثانية وترك الذى كان جابوا ابراهيم شمس الدين لانو ورثة يتامه
المستشفيات العامة دي يا جبرا ما بقت عامة انت ما سمعت قرار الوزارة بأيلولة المستشفيات للولايات التي توجد فيها؟! يعني مستشفيات الخرطوم تابعة لولاية الخرطوم يتعالج فيهاالعامة من ولاية الخرطوم وبس يعني يا ناس الولايات مافي حاجة اسمها (نقلوه الخرطوم) الا اذا كان المعنى ماشي مستشفي خاص من المستشفيات اياها الرسوم الجهاز فيها 12 مليون! يعني اذا انتو يا ناس هامش الخرطوم لسة بتحلموا حلم بجهاز قسطرة لعامة الشعب طيب ناس الولايات هامش الهامش يعملوا ايه؟!
يعني مهر عروسة الرئيس دبي الذي تبرع به أبونا كان جاب ليه كم جهاز وبقي خليل دون استشهاد ….. أردو الله أن يرزقهم الشهادة …اوع تقول لي ما دايرين
الثورة قادمة لامحال …