هل هذا فساد ؟؟
Updated On Jun 13th, 2011
كمال كرار
لاعتبارات بعينها ومن أجل الولاء لا الكفاءة فقد دخلت كشف المرشحين لتولي منصب دستوري هام جداً ، وراجت الشمارات في حلتنا فصار بيتنا المتواضع مثل تاج محل في الهند ضيوف جايين وضيوف ماشين وهدايا من نوع سكر وشاي وما عارف وين ولغة عجيبة من نوع ما تنسانا يا شيخنا.
وفي نشرة أنباء العاشرة ( المسيخة ) أعلن القرار الجمهوري المنتظر ولم يبق إلا أداء القسم .
قبل الموعد المحدد بيوم واحد جاءتني ( هدية ) من بيت أزياء شهير عبارة عن جلابية وشال وعمة وملفحة وعصاية لزوم المنصب الخطير ومع الهدية كرت صغير فيه اسم المدير وتلفونه ومن خلف الكرت جملة مفادها ? ما تنسانا من الدعوات ? .
حالما صرت في الكرسي الدستوري ، إنهالت علي التهاني في الصحف والمجلات من شركات وبنوك ومجموعات كان من ضمنها مجموعة الحاج منزو التجارية الهندسية القابضة .
بعد أيام جاءتني السكرتيرة الحسناء تعلن عن ضيف مهم في صالة استقبال مكتبي الفارهة .
دخل علي من عرف نفسه علي أساس أنه رئيس مجلس إدارة الحاج منزو الهندسية ، وأن زيارته بغرض التحية والمجاملة .
اكتشفت لاحقاً أنه وضع علبة ماكنتوش خمسة طن في مكتب السكرتيرة لزوم التهنئة .
بعد يومين آخرين اتصل بي صاحب الماكنتوش يفيدني بأن شركته تنافس في العطاء الذي أعلنت عنه في الصحف اليومية .
اتصلت برئيس اللجنة التي كلفتها بفرز العطاء ووصيته خيراً علي منزو واخوانه .
بعد شهر من ذلك ، وصلتني عن طريق البريد السريع شهادة بحث باسمي لبيت في حي راقي ومعها صورة بالديجتال للمنزل الفاخر المكون من ( تلاتة ) طوابق مكتوب خلف ظهرها مع تحيات منزو أخوان .
بعد شهر آخر وبنفس الطريقة استلمت مفتاح العربية ( الهمر ) وخطاب يفيدني بترشيحي رئيساً لمجلس إدارة شركات منزو لما وراء البحار .
وبعد شهرين سلموني شيكاً مليارياً نظير ( تعبي ) في مجلس الادارة ، وفي الحقيقة لم أذهب لاجتماع واحد له علاقة بوظيفتي في المجلس المزعوم .
وانهالت الهدايا علي من كل حدب وصوب . شي تذاكر سفر وشي طقوم عدة وشي تلفزيونات وغسالات وحكايات وتسهيلات .
وعلي نظام ناس ( منزو ) تقاطر نحوي التماسيح ، والسماسرة والشعراء والمداديح ? جمع مادح ? وتم ترشيحي لجائزة الدولة في التفاني ، ومنحوني وسام الانجاز الفلاني .
وتبرع لي بنك السدنة بقرض حسن بفترة سماح إلي يوم القيامة ، ومن أسمنت الجامع بنيت عمارة و ( ضبحت ) كرامة .
وبالطبع لم أمد يدي لخزنة عامة ، ولم أمتلك شهادة شهامة لأنني أعرف ( الدنيا مادوامة ) .
هل أنا فاسد ؟ وهل هذا فساد ؟ طبعاً لا .. نحن في خدمة العباد !!
الميدان
ياخي ما تخليكم معقدين كل الهدايا التي استلمتها لزوم تسهيل امور المواطنين وشنو فساد وما فساد يعني ممكن نفس الهدايا تعطي لغيرك ويستلمها دون ان يقدم المقابل شفت الفرق كبير كيف ؟
بعدين انته لم تسالهم انما هم لحالهم من فعل ذلك طيب انا عندي حل انا بعرف واحد مولانا بي سبحتو وبي دقنو ومسنود ,وخبير في الامور دي ممكن يحللها ليك والذنب عليه اذا كان فيها ذنب وتلقاك خمنت اني سوف اجيب ليك الكوده لا
فيها الحرامى
الكان للبارحة
وكفتيرة شاهى
كبايتاً نافحة
وسارح فى سوقو
ما عندو الكاتحة
لاحق العيشة
ولا حق المشرحة
اليوم فى بنز(مرسيدس)
عمارة ناطحة
ولا تشيلو الفاتحة
فى الجتة الناتحة
خلوها مشتحة
عقبال تتفحه
يا كمال تتهنا ما تتدنى..وتتعالا ما تدلا..حاشا وكلا دا ما فساد..لأنه نحنا ياخوي حنداريهو ليك كمان من عندنا بي شوية فقه بتا ع (مستورة) ..آسف فقه سترة!!!!بس الدايرو منك تمسك لي قوى في أولاد منزو ديل عشان كمان تتكتك لينأ معاهم حتة وظيفة لزوم السعودة الحترجعنا الخرتوم لا إيدين ولا كرعين ولا بيتناً مبنى ولا ولداً سعيد ومتهنى …والغربة طلعت أى كلام لاها سترة حال ولاها بتنفع الزول قدام….أها جنس نضمك دا وكلامك دا ونا س أولاد (الشيخ منزو) وشهامتم…وجدعنتك ياود كرار وفهمك الفي محلوا دا….دا ياهو زى ما قال (النعام آدم الزول العميان دااااااااك)ا يا هو دا ا لرد اليطمن….سيبك من ناس الميدان ديل ما منهم إلا الفقر والعيشة المجهجهة….أمسك قوي في منزو وجماعتو عشان أنا قافل عليك وعليهم قبل ما تبدا الشخشخة وندخل زنقة زنقة ،حارة حارة،بيت بيت….أنا أصلو شامى ريحة ناس محمد احمد وعنزو تلهط ليك أولاد ناس شيخ منزو….أها قلت كيف؟؟!!
كمال شايفك اليومين ديل بتكتر في العشا الدسم ودا بجيب أحلام ما طبيعية وحاجات زى كدا!!!
فساد فى شكل وردة
اذا عددتو لينا انوا واساليب الفساد حتى يعرف الناس هذه الاشكال
وجزاك الله خير يا شيخنا:rolleyes:
والله يا كمال اليوم اول مره أقرى ليك .. والحقيقة انى اتاسفت على اكتشافى المتأخرليك .. اما السبب الخلانى انتبه ليك فهو ((عنوان مقالك)) اليوم ..
ويا سلام على تعليقات
شاهد العصر و
زول من الشعب الفضل و
كمال أبو القاسم محمد
اما لماذا جزبنى العنوان .. فلآن الجماعة اياهم ما بركزوا فى كلامهم عن الفساد الا على الفساد (المالى) او (السرقة المباشرة) من الخزينة .. وحتى دى يطلعوها ليك (شمار فى مرقه) …… قال ايه
** نسبة (التعدى) على المال العام …….. عادية جداً واقل مما يحدث فى العالم ..
** ما تم استرداده من اموال تبلغ نسبته (كم وثمانين) %
** الباقى لا زالت التحقيقات فيه تجرى على قدم وساق وسيتم استرداد كل المال المتعدى عليه ..
الشخص البتكلم ده نفسوا تلقاهو شغال فى كم جهة حكومية ده غير عضويته فى مجالس الادارات .. واتعين بالواسطة .. وشغال (يزكى) فى القرايب والمحاسيب عشان يشتغلوا ..
وتلقاهو زى واحد وزير هسى .. مسكوهوا وزاره عندها علاقه بتاهيل وتدريب موظفى الدولة .. اها وزيرنا طوالى مشى عمل ليهو كم مركز تدريب كده والتدريب بقى اجبارى فى المراكز دى ..
ما ذكرته فى مقالك والمكتوب فوق ده هو جزء من الفساد الادارى .. الما بتكلموا عنوا ابداً .. خليك من الفساد السياسى الضيع البلد ودمر كل مرافقها ..
كتر خيرك يا استاذنا ..
والناس لازم تركز على الانواع دى من الفساد .. لانهم _(ماسكين) فى الفساد المالى .. وحتى ده مش كلوا بل فى جزء بسيط منو ..
هذا هو حال السلطة دائمآ …. تبداء بأحلام العدل وتنتهى بواقع السلب … حتى فى الاحلام يا كيمو .
ده ما فساد دي دغمسة ساكت066110
هذا ليس بفساد
ولكنه افساد
الافساد هو عمل السوس فى الخشب
وعندما يسوس الخشب ينهار البناء على من فيه صغيرا كان ام كبيرا
ولا احد يستطيع محاكمة السوسة فهى تمارس حياتها العادية
والكل يراها مجتهدة لا تكل ولا تمل
kamal ithank that any thing took money speak you can buy every things
لا لا حاشا ده ما فساد … ده اسمو لبع : من لبعَ يبلع لبعا فهو لبّاع و في رواية اسمو لغف من لغفَ يلغف … و في رواية اسمو في سبيل الله قمنا نبتغي حمل اللواء ، و ما أعظمه من لواء ، فالعمارة تريح الزوجات و توسع المكان للصلوات ، و العربية الهمر تجعل مسافة المسجد قريبة فيزيد الأجر بكثرة التردد و دعك الجبهة لتسوَد و تظهر غرة الصلاة فيعرف الناس حينها قيمة الهمر … و لكن في رواية ضعيفة قيل إن هذا اسمو : تمتمامات و تعني بلغة الزهاد من أصحاب المشروع الحضاري تمامة التمكين و اللطش … أما أصح الروايات فهي التي وردت عند العارف بالله (الرزية أب عينن قوية ) في كتابه (شيل الشلية من سوق الأوراق المالية) و التي أفتى فيها بقوله : إن هذا هو أصدق ما ورد في باب (هي لله) و الله أعلم .
تبرا وتستبرا من الفساد ياود كرار واله يقدرك علي خدمة العباد
تصدق يا ابو كمال انو فى الذكرتو دا كللو الفساد بس فى الشيك المليارى الاستلمتو نظير تعبك فى مجلس الادارة الكنت بتغيب منو لانك كان مفروض تسيب الشيك لمدير مكتبك علشان يوزعو للغلابه الزينا !!!! انت ما اتعملت توزع الحسنات من جتس الحوافز دى من معتصم عبد الرحيم ليه يا ود كرار عشان ما تقع فى جريمة الفساد؟؟؟؟؟
صدقت يا كيمو دا بالضبط حال الجماعة حكامنا الله يقلعهم… يوم ما الواحد يتعين ولو كانت وظيفة صغيرة عينه علي الفارهات والسامقات والحسناوات … ما أصلو اللفح أصبح جزء من قيمنا ويا للحسرة والناس بقت تقدر وتحترم التماسيح والحرامية أكتر من إحترامها للعلماء….