برنامج المساعدات الحكومية للفقراء هو برنامج مدعوم من الحكومة الاتحادية وبتتخصص ليهو ميزانية سنوية معتبرة… هذا البرنامج يستهدف الطبقة الفقيرة والشريحة ذات الدخل المحدود طيب حسب علمي ومعرفتي بان هذا البرنامج مطبق في اكتر خمسة وتلاتين ولاية..من ضمنها ولاية اوهايو التي.. اسكن فيها قرابة الخمستاشر سنة بلا انقطاع..لذا سيكون هذا
التحليل مبني علي معايشتي للواقع المعاش في مدينة دايتون تحديدا..وباختصار شديد جدا.. دايتون بها ما يقارب.. الخمسة تجمعات سكنية تابعة لهذا البرنامج وهي مساعدات تقدم للاسر الفقيرة او متوسطة الدخل وهنا يطلق عليها بيوت الحكومة للسخرية طيب كمثال اي اسرة دخلها اقل من الف واربعمية دولار شهريا..والمبلغ دة قبل عشرة سنوات تقريبا..هسا بيكون ذاد بالتاكيد اذا اتقدمت بطلب لبيت حكومي بيدوها البيت الميزة او الخدمة المستفادة هي انو البيت الحكومي دة بيدوهو للواحد حسب دخلو الشهري يعني اذا بتصرف الف دولار بتدفع تلتمية وخمسين للايجار وهكذا و لاي سبب من الاسباب اذا الزول الساكن دة فقد شغلوا وظيفتو ما مطلوب منو يدفع ايجار او فاتورة الكهرباء او الغاز وخلافو بل بالعكس الحكومة بتديك مبلغ شهري رمزي زايد ما يعرف بالفود استام وهي بطاقة فيها مبلغ مالي مخصصة فقط لشراء الطعام والشراب..وغالبا ما يكفي المبلغ ويغطي احتياجات الاكل والشرب حتي نهاية الشهر..ومن ثم يتجدد المبلغ عند نهاية كل شهر..يلا الجاب الهواء انو في ناس كتار جدا بيحو جوداد السنة الاولي السنة التانية طوالي بيقدم للبيت الحكومي دة اها لو اشتغل اي شغلانة واتعصر فيها طوالي بخلي الشغل وبجي بقعد في البيت ماكل شارب تريان والشغلانة ما مربوطة بفترة زمنية معينة ف في ناس لقو الشغلانة وليفة يعني ما بياخد اي شغلانة بصورة جدية يعني يشتغل اي شغل استمر فيهو استمرا ما عجبتو الشغلانة ممكن براحة يخلي شغلو ويجي يقعد في البيت رمتلة علي الطريقة الصاح والحكومة هنا قايمة بواجبا تجاهو تاكلو تشربوا تلبسوا كمان اي والله اللبس الواحد دة وتديهو بطاقة تامين للعلاج.. والطامة الكبري اذا اشتغل ليو شغلة مبرطة شهر شهرين وجاء قعد في البيت هنا دخلو السنوي كان بسيط جدا فالحكومة مضطرة تعوضوا من الضرائب كل اخر سنة بمبلغ لايستهان بة الوف من الدولارات نظير الرمتلة والخستكة واللف والدوران بتاعو دة..واكتر شريحة مستفيدة من الكلام دة النسوان والنسوان ال ما عندهم رجال تحديدا.
اما الطامة الاكبر من الطامة الكبري اذا الواحد ساكن في البيت الحكومي دة كويس وبشتغل شهرين تلاتة في السنة عشان يكبر كوموا من الدولارات اخر كل سنة..ويمشي يسجل في ما يعرف بالكومينتي كولج..فا هنا الضغط علي الدولة بكون ب الطاقة القصوي لانها ايضا بتتكفل بي مصاريف الدراسة زايد بتديك قروش للاعاشة والمواصلات..بتزكر في زيارة لنيويوك جيت قاطع منهاتن البيوت علي الجهة اليمين وعلي طول الطريق شقق فخمة جدا يسكنها الفطاحلة من رجالات المال والاعمال وناس التشدير الجد جد حيث الهدوء والدعة ورغد العيش وعلي اليسار والفاصل بينهم الظلط فقط ديلا ناس نحنا والواقعين في محنة بيوت الحكومة وبما انها من عشر طوابق تقريبا ولكن تستطيع ان تلحظ وببساطة وسهولة شديدة حجم الخمج والفوضي وعدم الاكتراث واللامبالاة….وموقفين الشرطة بفت رجل حيث للناظر بان كل اجناس الارض في زيارة لهذا المكان..الخلاصة يبدو ان الحكومة قد تبين لها بصورة او باخري ان اغلب المتقدمين لهذا البرنامج هم القادمون عبر برنامج اللوتري وليس بالضرورة بان اغلبهم من السودانيين ولكن يبدو انها تعمل علي قاعدة المثل البقول الشر بعم بخفض الصرف علي هذا البند المفتوح..وشيئا من تمرير بعض اجندات ترام العنصرية
عمر كودي
صديقي الجميل عمر كودي.. رجاءاً بطّل كسل وأتحفنا بكل ما تفيض به من معلومات الداخل الأمريكي فتجربتك مميزة وأنت واحد من القليلين جداً القادرين على عكس تجارب السودانيين ومشاكلهم بأمريكا وقرائتك للأحداث قراءة صحيحة.. إستمر يا صديقي.