اليهُود ما عندهم عهُود..
دي نُقطة مُهمة جداً يجب عليك أن تجعلها حلقة في أضانَك..
أوعَك وانت ماشي على ماما أمريكا يدحفسُوك ويجخفسُوك وياكلُوك حنَك.. أعمل حسابك، ديل ثعالب مكَّارين من زمن سلفهم السجَم بنُو قريظة وبنُو قينقاع!!!
وانت داخِل عليهُم كدي خليك رافِع راسك وعينك جُوَّة سوادة ترامب (دا ان بقى رجاك لليوم داك) قالُو مزااااانق اللِّيلي.. الله يضيِّق عليهُو كمان وكمان!!!
نياشينك فُوق كتفك وقلبك الجامد بين جنباتك، الريِّس حمدوك عند يسارك والحاجة أسماء بيمينك، القائد حميدتي وشعبك من خلفك…
إيَّاك من وعُود.. وايَّاك من حبال بلا بقر!!!
أول طلب حا يطلبُوهُو منك هُو كالآتي:
عاوزين صداقتكم وخوتكم والتطبيع مع حبايبنا الإسرائيليين ديل.. وانتُو المعروفين أهل الفزعة والمروءة وعيال المك… (قُول تَمْ)…
أها في اللحظة دي… أوعك تشيلك الهاشمية ولَّة الجعُولية وتقُول ليهُم (تَمْ)…
تقُول ليهُم الآتي:
والله يا ترامب (كدي حاف) عشان هو رئيس وانت رئيس… أوعك من تنمِّقها ليهُو…
نحن شِبِعنا وعود وأكاذيب منكم.. قبل كدي غشيتُو الريِّس السابق طردلكم أُسامة بن لادن وسلمكم كارلُوس وغشغشتُوهُو لامِن فصل صدِّيق القُولد من منقُو زمبيري.. والحكايي دي مُو غريبة عليكم فهي موروثة في جيناتكم من زمناً مُو الزمن دا…
فدحين يا اخوي بما انك عارف قيمتنا وموقعنا بين الأُمم فما عليك إلا تطبيق هذه المعادلة…
حمدُوك.. ناوِلني المعادلة المعاك…
*رفع السودان من قائمة الدول الراعية الإرهاب + إعفاء ديون السودان المتلتلة + مبلغ كويِّس كدي أقلاهُو 16 مليار دُولار يُودع (الآن) قبل ما أمرُق من بيتك الأبيض دا كعربُون محبَّة = الصداقة والمودة والتطبيع.. مُوش مع إسرائيل وبس.. ومعاها إيران وكُوريا الشمالية كمان!!!*
غير كدا يا اخوي.. يفتح الله، مافي أي شي بيخارج معانا، ومعاها صرَّة عينك اليسار وحِدِّيرَة للكاب كدي ناحية اليمِين…
أها رايك شنووووووو؟؟؟
صدقني يا بُرهان.. لو لقاك (شارِي وجادِّي) حا ينفذ ليك كل طلباتك وفُوقها كمان حا يفسخ ليك خطوبة بتُو (السميحِي) الحايمي في الأسافير اليومين دي وُيعرِّسَها لي أصغر وزراء حكومتك (إن شاء الله ما تنفعُوا).. وبكدة حا تكون شبكتَ أمريكا وبقيتُو حبايب!!!
جمال أحمد الحسن – الرياض 06 فبراير 2020م
((تقُول ليهُم الآتي:
والله يا ترامب (كدي حاف) عشان هو رئيس وانت رئيس… أوعك من تنمِّقها ليهُو)) !!!؟
يا راااقل هل ترمب رئيس والبرهان رئيس!!!؟
و دي تجي كيف بس؟؟ ترمب رئيس خلفه شعب نصبه رئيسا ولذلك تراه يتبجح على الملأ ويده مليانة وهذا مخاتل جبان لا يعمل إلا في الظلام ليس وراءه إلا حفنة من لجنة أمن النظام البائد، وأن من أتى به هم من ثار الشعب لإقصائهم، فلا يتبحح إلا بعسكريته ونياشينه التي أنعم بها عليه النظام البائد ليس لكفاءة عسكرية اللهم إلا في ضرب أهل القرى الآمنين العزل وليس في أية حروب خارجية خاضها أصغر جندي في جيش ترمب لم يطلق طلقة واحدة في معركة داخل بلاده ضد مواطن أمريكي ولو في شكلة شخصية بينهما! ترمب يخاف من شعبه الذي أتى به يا راااقل، وهذا يخاف من قرقاش وأشباهه من الأجانب وعملائهم واستخباراتهم التي تبرطع في الداخل… ويمكن أن نعدد لك ما لا يحصى ولكن لا وجه للمقارنة أصلاً… الواحد لو بكسر تلج ياخي كسر لشخصية مالية هدومها!
دا ضارب تعظيم سلام باليد والرجل للسيسي أول ما مشى ليه ولاقاه تقول لي ترمب رئيس وهو رئيس!!!
وتفتكر وجهت له الدعوة ليقابل ترامب؟ دا بعدو ترامب يقابللو عسكري انقلابي عامل رئيس دولة؟ مستحيل دا يحصل. ترامب ما قابل دكتور حمدوك الذي أتى به الشعب لأنه رئيس حكومة مؤقتة ومشاركة للعسكر أمثال برهان.