والي جديد لشمال كردفان
اما الان وقد اصبح عندنا واليا جديدا , وكردفان كطبعها كما كنا نققول غنيه ومظلومه , وقد اعتدنا ان نرمي اللوم علي الحكومة الكعبه في الخرطوم كما كنا نقول ونغلظ,وانا بقول ليكم حاجه حكومة الخرطوم دي طبعا ما حاكمانا بدستور ولا قانون , المهم –عندها لوائح ومفاهيم خاصه حاكمه بيها ومن ضمنها توجد بعض الاشياء الخطا قد تسمح لبعض الناس يسووها لكن بعض الناس لا, ما يعملوها– يعني هم عنصريين للنخاع في التوظيف وفي كثير من الاشياء لكن كان حسو او شمو في والي ريحة عنصريه او عايز يعمل ليه لوبيات قول حركات تمكين او بدا يلف ويدور ,دا طوالي يركن ولا يلتفت اليه الي يوم الدين , المهم عندهم حتة السلطه والقروش دي ما دايرين زول يحوم حولها وعشان كدا تلقي كل الناس الحريصين عليهم متجردين وفقرانين , عشان كدا كان حصاد كردفان ضعيفا من فترات ولاتها السابقين لان كثير منهم كان اقرب الي القبليات واللوبيات ,او احتوته العناصر المصلحجيه في الولايه, والذين هم يعرفونهم كامل المعرفه , وهم نوع حربائي متنقل وسط كل الانظمه التي سلفت , ومع كل الولاة الذين مروا ينقلون تراثهم في المآكل والنصب وتضييع حق الناس –الحكومة تعرف كل ذلك وربما حكمت علي الوالي من اول زول يعينو–الا اذا اظهرت الحسابات قوة ظهره لجهته, من ناحية كثره , اومنعة حكم .اها الان نحن في انتظار ان تورونا رجالتكم وحكمتكم ياناس كردفان انتو وواليكم الجديد الموضوع ما كلام ساكت , ولو دايرين حكومة الخرطوم تنقع ليكم العسل في خشومكم , دى ما بتحصل , وانا ما عارف احمد هارون حيسوي شنو مع مجموعات تقسيم الثروة القاعدين ساكت علي حساب الولاية, فانا اعتقد عشان ما يشغل دماغو بارث ود زاكي الدين ,يحل كل مجالس الحكم واليات الصرف البذخي ويبربح حكومتو بربيحت شدرة هشاب ,عشان كل صمره جايه تمشي للناس كلهم طوالي, في شكل صمغ (كعكول ) كبير وظاهر .لانو في الحقيقه تعيينو ذاتو استثنائي والاشياء والامال المعلقه عليه كثيره ,وفشلو غير مرجو من احد. وان فشل الوالي القديم يعني فشل كل هياكله ,فاليذهب الجميع وليحصلوا الخريف خاصة ان فيهم كثير من مكونات الولاية الجديده, ويكفي احمد هارون وزيرين او تلاته, ومجلس حكم او رأي مصغر, وعلي الناس كلهم يتحملوا,لان العلاج احيانا يتطلب البتر– عموما للولايه ديون علي المركز ووزارة الماليه دي فيها حته بتحقر شمال كردفان ووبتستخسر فيها حقوقا واحمد هارون سيعرف العقبه دي ,وسيتعامل معهالو اتطلب الكسح والمسح. لكن بعد دا كلو الزول دا عايز ليه وقفه وكان قلتو عايزين يمشي يجيب ويقلع ليكم من العاصمه دا ما ببقي الا نقيف معاه وقفة رجال من اجل حقوقنا في مال قطعانا الصادره ومال محاصيلنا المصدره للعمله الصعبه ومال صادرنا من الصمغ العربي ومردوده من العملة الصعبةوقروشنا المودعة في البنوك وحقنا في دوره ماليه واضحه لها نراها في غروض لتنميه كردفان , قرات في الصحف من اربعين مليار جنيه رصدت الغروض الميسره تقدم 100 طلب لها خلال 4 سنوات وصدق ب16 منها وبقية المبلغ اعيد الي العاصمة والتي عانقت عنان السماء عمرانا بدون ادني حساب لمن يسكن تلك الشواهق .من ناحية المخاطر المباشره اليوم, اقول لسيادة الوالي عندك قبائل زرعت فيها روح العصبية والاستعداد للقتل وهم علي اتم استعداد الان واسلحتهم التي ملكتهم لها الدولة مشرعه ولولا تدخل بعض الحكماء لحدث مالا يحمد عقباه . يعمل وسطهم كثير من العمد وبعض المتنفذين من ابنائهم ويبثون فكر الكراهية والاحقاد –لكن في المقابل لهم قيادات حكيمه من الادارة الاهليه عليك ان تسعي لتوطين هؤلاء البدو وتنشئ لهم المدارس والمساجد لكي يقينا الوعي شرورهم وعليك ان تلجم كل من يسعي وسطهم بالاثارة –والماء –الماء -اذهب الي هذه البوادي وانظر الي العاريب كيف بدأت الطبيعة القاسية في تغيير اشكالهم يكسو الشعر اذانيهم وتتدلي اهدابهم ورموشهم وقاية لسفو الصحراء , ومع هذه الطبيعة القاسية هم منتجون من الطراز الاول لم نسمع انهم جاعوا او احتاجوا كل المطلوب ان تحقن مياه وديانهم ورهودهم الموسمية هذه, بطريقه من الطرق لتلاقي لهم الخريف القادم واعتقد ان الوالي بما له من علاقه بوزارة الشئون الانسانية سابقا يستطيع تقديم شئ لهؤلاء العاريب والافادة من قدراتهم. اخي احمد ان 60% من اهل ولايتك يعيشون في غرب ام درمان نازحين الي الان لانه ولعشرين سنة خلت لم تستوعبهمحياة المدينة بل كثر وسطهم الفاقد التربوي والتبطل المفضي للاجرام , لاتضعهم خلفك فهم يمكن ان يفيدوااذا ما ربطت مناطقه بالشارع المأمول ام درمان بارا.
اليكم هذا التخريج من سيرة نبين الكريم لنتعظ ونعتبر ان الله كان قادر ان ينصر الرسول يوم احد ولكن الذين من حوله كانوا لا يستحقون النصر , فاصابتهم المصيبه , وذلك بما كسبت ايدهم, الرسول قال ليهم ماتتحركوا خالفو امره , امرهم علي شان الناس وحماية ظهرهم خانوا الامانه وفكروا في جيوبهم والدنيا فتركوا مواقعهم , قتلت مجموعة الدفاع عن رسول الله , الا واحدا والرسوال ينادي المسلمين ولم يستمع اليه احد, بل تولي بعضهم هربا نحو المدينه—هذه الفواجع الكثيرة كانت نتيجتها الهزيمة المؤلمة المؤلمه قتل من المسلمين سبعين ومن المشركين اربع وعشرين علي احدي الروايات–نتيجة احدهي التي سماها القران مصيبه وقال عنها ( أولما اصابتكم مصيبه , قد أصبتم مثليها , قلتم أني هذا , قل هو من عند أ نفسكم إن الله علي كل شي قدير–ال عمران(165)) لا من الله ولا من الرسول ولا من حكومه –عندكم قول تاني, مصيبة الرسول الذي فجع فيم — ياناس ياناس دايرنكم مره واحده تكونوا موضوعيين — وتتكاتفوا عشان تنموا بلدكم انا اعرف من ينادي بالتمرد, وينفخ في الناس في هذا الاتجاه, لكن مما لا شك فيه ان , وظائف السلم المدني ,افضل للانسان من وظائف الحرب التي توقر النفوس ,وتملاها بالاحقاد, ويستحيل بعدها التعايش , ودونكم دار فور التي كانت امنه يوما ما. اعان الله والينا الجديد وحفظ كردفان من كل مكروه.
نتمنى للوالى الجديد التوفيق ونتمنى ان يبدأ عمله بالمستشفى الذى لايسر عدو ولا حبيب بالاضافه الى مشروع درء اثار الجفاف هذا المشروع الذى يمتلك اسطول من القلابات واللودرات والعربات التى يتم توظيفها لخدمة افراد فقط فهذا المشروع اذا وجد الاداره الرشيده وتم ابعاد الحراميه العاملين به فوالله يمكن ان يتم حفر سدود تقى الناس شر العطش وكذلك يمكن ردم جميع الطرق نسأل الله التوفيق وتصفية النفوس والعمل على النهوض بالولايه
ما هو المبرّر الأخلاقي الذي يجعلنا نقف ونهلّل لمن قال وهو على كرسي الوالي في ولاية توأم إمسح، إكسح، ما تجيبو حي، أكلو ني، ضارباً عرض الحائط بكل التعاليم السماويّة والشرائع الدوليّة الواجبة الإتّباع في زمن الحروب؟ إنّ من يصدر عنه هذا الكلام غير جدير بأن نقف معه ونكون سبباً في أن تتهيّأله فرصة أخري ليمارس فيها نشاطه غير المشروع على أهلنا هذه المرّة.
نعم العطش كافر ولكن يجب أن لا ينسينا إنسانيتنا برفض الظلم والظالمين أينما حلّوا لا أن نستقبلهم بالورود لمجرّد وعود يطلقونها ونتساءل لم لم تتحقّق هذه الوعود أو حتّى يتمّ تبنّيها من قبل السلطة في الخرطوم في عهد والي ينتمي لنفس الفصيل؟ أهو الإبتزاز لسكان الولاية أم الأحتقار أم ماذا؟
التنمية حقّ واجب على الدولة ولا يجب الحصول عليه بالخنوع والمساومة تحت أيّ ظرف وأهيب بأبناء كردفان أن يضعوا نصب أعينهم المثل القائل تجوع الحرّة ولا تأكل بثدييها ولا مرحباً بالوالي الجديد.
1)التحيه لاسامه وسد مروي وكهربة مروي الودعنا بيها القطوعات
2)عندنا 3 ملفات للوالي لو بدأ بيها نحن معاهو والا!!!!!
أ)المويه من النيل الأبيض ……ماالانابيب وصلت بشائر طالعه تلال البحر الاحمر UP HILL
والموية في مصر وصلت سيناء …المانع شنو
ب)طريق أمدرمان-جبرةالشيخ-باره…كلها 280 كلم+54 كلم الي الأبيض يعني 334 كلم لزومو شنو نمشي 667 كلم
ج)الأهتمام بالرياضةودايرين فريق في الممتاز عشان ينعش البلد شويه…. ودا مكاننا الطبيعي
وزول عمل سيكافا في كادوقلى وسط الدانات والراجمات .. دي مابتغلبو
في النهايه هو ود الأبيض ( والليك ليك ولو كان لبن عشر اعركو في عينيك )
أوّلاً أرحّب بالأستاذ جبريل لتكرمه بالردّ على تعليقي و أؤكّد له أني لم أقم قط بالحظر عليه أو منعه من الكتابة في أي منبر من منابر كردفان ولن أقوم مستقبلاً كذلك بمثل هذا العمل غير اللائق بي و أؤكد له بأنه لم يقم أي من مشرفي منبر كردفان بالحظر عليه في أي وقت وأن حسابه مفتوحاً ومفعّلاً ولنا عظيم الشرف أن يشاركنا همّ كرفان الذي هو همّه على منبر كردفان وله أن ينشر فيه بلا قيد او شرط.
ثانياً الإختلاف لا يجب أن يفسد للودّ قضيّة وكلّ يؤخذ من رايه ويرد إلا واحداً عصمه الله بفضل منه. لا ندّعي إمتلاك الحقيقة ولكنّنا نصدع بالرأي دون تردّد أو وجل ونتوقّف حين يستبين لنا الحقّ أو ما نظنّ أنّه الحقّ.
ثالثاً إنّ دمعةً واحدة تزرفها طفلة بريئة في أيّ بقعة من بقاع السودان ناهيك عن قطرة دم تسفك بغبر حقّ لشهادة كافية عندي لأن لا يتأهّل المتسبّب فيها للعمل العام.