الكضب اصبح باب بي ضلفتين
الكضب اصبح باب بي ضلفتين
أسماء الجنيد
[email protected]
سلام يا الحبان في كل مكان لكم الإحترام والتقدير جميعا قرآء وزوار الراكوبة,,,,,,,
اصبح الكضب في السودان في كل مكان , بدءا من رأس القايدة لي اصغر موظف بالحكومة الغير رشيدة .
يعني جواز مرورك للبلد يكون عن طريق النفاق والكضب للأسف
,اصبحت الصفة دي عيانا بيانا باب و مفتوح للجميع ضلفتين
ابدا مافي مدسة , ولاهو عيب عند اهل العيب
يكضبوا بي جاي ويكبروا بي جاي , في نفاق اكتر من كدة !!!؟؟؟
ويقولوا ليك بنحكم بالدين والشريعة الإسلامية !! عجبي
اصبح كل من يمثلنا في المجالات محليا ودوليا يخاطب بالكذاب
امس القريبة دي اتهمت سوزان رايس المندوبة الدائمة للولايات المتحدة لدى الأمم المتحدة سفير السودان عينك عينك ووصفتو بالكذاب !! فضيحة ما بعدها فضيحة . عليكم الله عندكم وش تاني تقابلوا بيه الناس ولا المسؤلين البرة البلد ؟ مافي زولا سبقكم على المجاهرة بالشينة ابدااا
ومافي زولا سبقكم على الكضب تـــــــــب.
وداكي الليلة وقف ريسنا ودق صدرو وتب وعرض لآآآآآآ فوق واتيمن واتحزم واتجزم وقسم وشتت ليه كم طلاق في الهواء وقال إلا يقيف مع بشار وسوريا، النعمنهم مظلومين وجاتهم مؤامرة خارجية ولازما ولابد يقيف معاهو وقفة رجل صامد ,,
شويتين لا نحرى لا ندرى نشوفو بلع كلامو زي ما ببلعوا كل مرة ولا على كيفو ويلحس كيعانو الإتنين ، على قول مستشارو اب علالة في نضميهو
جيتو بالراحة تتدبوا ونسيتوا كل الحرامات والحليفة والجزيم الماتمتلها فد شهير. وكمان فيها حبة فصاحة من مندوبكم الهمام
. لما عاتبكم المندوب السوري بعد قرار التعليق على سوريا , بدل ما يرد الهمام بي دبلوماسية ، قبل عليهو بي كل مساخة وقلة فهم وقال ليهو بقت علينا نحن ؟ عليكم الله ده رد من زول مسؤول؟
طبعا ما بقت عليكم إنتو . لكن فصاحتكم ياها المغتسة حجركم في كل مرة
, الشكية لي الله الدبلوماسية دي ساي ما عارفين ليها درب ولاكم خابرين فيها التكتح ، مسعول من الخير يا انت ناسك ديل معزلهم وملقطهم كلهم من طرف من وين ؟؟
امانة عليك ديل خريجين علوم سياسية ؟ ولا إصلاحية ؟
غير الجهل وسوء المعاملة وكلام الشوارعية ما عندهم صنعة
بالله الكضب التقول مريقين بيه !!. الجابركم شنو اصلا تفكفكو الكضب وتجوا تضايروا لما يزنقوكم ؟
نحمد الله ساحتنا السياسية مليانة لامن واصلة الحلقوم ، والمغصة كل يوم بمر على البلد بكون اسوأ من القبلو بي مليون مرة في كل شيء, الحياة العادية للمواطن البسيط بقت في تلتلة , وغيرها كتير
والمغصة والوجعة الكبيرة الصفات المنسوبة لهؤلاء الكذابين
بتجي واقعة في راس اي سوداني , والأمر من ده كلو سكاتهم على المهازل التي لا تحصى ولا تعد
يعني الشعب ده داير يحصل شنو اسوأ و اكتر من كده ؟؟؟
حسبي الله ونعم الوكيل
متاوقة
ــــــــــــــــــــــــ
كدي النرخي اضانا يا اخوانا , النشوف بكرة الدليبة البتجينها شنو ومنو البسبق رفاقتو ؟ باقي دي الحاجة الوحيده البتسابقوا عليها وفالحين فيها
ودعتكم الله
اذا كنتى بتتكلمى عن صدق امريكا, فلذيادة معلوماتك امريكا صادقه مع شعبها فقط. ترى الرئيس او الناطق باسم الخارجية وخلفه العلم الامريكى يكذب ويكذب ويتحرى الكذب. اما جماعتنا الفى السودان, كان الموضوع بقى على الكذب بسيطه كعب ظلم الناس. اللهم اشغل الظالمين بلظالمين واخرج اهلنا الطيبين سالمين.
يا خاتو اسماء اكتبي لينا بلغة العصر بلغة عربية مش مية المية علي الاقل مفهومة شوية نحن جيل التسعينات ما بنفهم التكتح في لغتك شوف اخواتك الصحفيات كيف بكتبن كتابة جميلة ومشوقة لو كتبتي باسلوب علمي وجميل يكون احسن من غير زعل ارجع ليك للموضوع اولا ناس باب الحارة ديل ما بشبهونا ولا في علاقة بتلمنا معاهم امكن الا المعرض السوري علشان تشتروا الجلاليب النسائية صح موضوعك انصرافي اكتبي لينا في هموم البلد وخلي الكلام الفارغ دا كيف تتوقعي السودان يتقدم طال ما الزيك دا قاعد خارج البلاد ويتكلم كلام زي كلامك الفارغ عفوا تعالو السودان واكتبوا لينا من الداخل
ديل ,,, ديل فاتو مسليمة الكذاب وتللبو بي غاااادي !!!! الله يخارجنا منهم بالسلامة قبال ما يجيبو لينا ذبحة ,,, الذبحة التجيهم كلهم في وقت واحد يا رب وتفكنا منهم
بت الجنيد ،،،،،،،،،،، تسلم إيديك
قنعتي من خيرا فيها ،،،،،،،
طبعا الكذب بالنسبه للكيزان جهاد في سبيل الله .ديل شذاذ الافاق تجمعوا من كل مجتمعات السودان وطفحوا فوق السطح بخبثهم ونتانتهم لذا هاجر السودانيون اهل الاصاله وتسرب السودان مت بين ايديهم .نحن لا نتوقع منهم الدرر هم غم وجع ينتابنا يوماتي فالوطن سيظل ينزف ونحن ننزف طالما هم في القياده وسيظل الوطن تايه بين الوجع والغضب ونحن بين الصبر والاسف ما لم نبتر السرطان من جذوووووووره . لك التحيه يا بت الجنيد
تسلمي يا بت الجنيد لقد كتبت كتابة في وصف هولاء القوم بصورة واضحة لا تحتاج لشرح أكثر والذين لا يفهمون كلامك كما ذكر الملقب نفسه بحنو. هولاء تربية المساخيط الممسوخين وهو منهم,
لا نعرف ونقرأ غير كتابتك الشجاعة التي تربك هولاء الهبل من شاكلة حنو ومن سلك مسلكه.
وأقول لحنو الشجاعة التي تمتلكها أسماء أشجع منك بألف مرة لأنها وضعت صورتها وكتبت اسمها,
حبابك بت الجنيد الحمد لله على السلامه
سوريا لازم نقيف معاها سوريا بنت ايران و نحن وقفنا مع الاب كيف عاد نقدر نجافى الابن نحن ما ناس الشينه و العنترية ندوس العالم بجزمتنا و ما مهم ان شاء الله الشعب يحرق
الله لا بارك فيكم يا كيزان
واسمك حنو …. باين عليكي حنكوشة من اياهم انت وقت مابتعرفي نضم بت الجنيد معناها شوفي ليكي جهة تانية وجنسية … يعني بالواضح ماكي سودانية يا الخمجانة بت الجنيد مناضلة يامعولقة انتي ولعلمك … انها تخاطب احساس ووجدان الشعب بلغة بسيطة وسهلة يفهمها الكل وللاسف انت منهم لدرجة انك فهمت بيت القصيد واستطعت ان تعلقي علي هذا المقال الجميل … نهايتو باين من كلامك انك جزاء من مسلسل بابا حرامي المعروض حاليا ومنذ 22 سنة …. اتلهي الله يقرفك مسختو البلد
ماعارف لى شنو بفضل كتابة منى سليمان عليك وعندى احساس قوى انك مطلقة ولا عانس
تصريحات عنتر بن شداد 2011 م :
قُلِ اللَّـهُمَّ مَالِكَ الْمُلْكِ تُؤْتِي الْمُلْكَ مَن تَشَاءُ وَتَنزِعُ الْمُلْكَ مِمَّن تَشَاءُ وَتُعِزُّ مَن تَشَاءُ وَتُذِلُّ مَن تَشَاءُ
السودان لم يكذب بدليل انه لاتوجد معسكرات للشماليين في الجنوب اما امريكا فهي ست الكذب وقد اعترفو بذلك في احداث العراق والا ما سمعتي
علاقتك باللغة والسياسة مثل علاقة حاج ماجد سوار بالرياضة ؟ صفر علي الشمااااااااااال .
الأخ الذي إسمه koboo، يا أخى بالله عليك دا تعليق ممكن تعلقه على هذه السيدة؟. يا أخى خليك راجل عندك زوق ، وأعرف أداب الخطابة. إنت مالك ومال وضعها الإجتماعى. عيب عليك يا أخى . عيب