تعرف علي ما كتبته زوجة الحارس الدولي عصام عقب الهجوم العنصري والتنمر عليها وعلي زوجها

تعرض الحارس الدولي عصام عبدالرحيم وزوجته لهجوم عنصري عنيف من قبل العشرات بسبب زواجهما رغم اختلاف لون بشرتهما
،الا انهما قابلا الهجوم بوعي وردود ايجابية وتم ارسال العديد من الرسائل للمجتمع من خلالها .

فيما يلي تورد الراكوبة رد فعل الزوجة :

(السلام عليكم …

اولآ ..شكرآ كتير للناس القدمت لينا هدايا وادونا طاقة ايجابية وطلعونا من الطاقة السلبية العشناها في اول يومين في شهر العسل ربنا يسعدكم دنيا و اخرة والله ما تتخيلوا مبسوطين كيف دخلتو في قلوبنا سعاده انا وزوجي ويشهد الله اكتر من سعادة يوم زواجنا يعنى تصحا من صباح من بعد ردم وتعاليق مسيئة في حق زوجي تلقا لسه في ناس عندها ايجابية تحس انو دنيا لسه بخير.

مشكورين كلكم فردا فردا وحتي الناس الباركت لينا الزواج الاهل والاقارب الكانو معانا مشكورين جدا جدا علي وقفتكم معانا واحنا مبسوطين بيكم.

ثانيا بالنسبه لي قصتي مع عصام عبدالرحيم زوجي وسندي:

قال تعالي({ يٰٓأَيُّهَا النَّاسُ إِنَّا خَلَقْنٰكُم مِّن ذَكَرٍ وَأُنثٰى وَجَعَلْنٰكُمْ شُعُوبًا وَقَبَآئِلَ لِتَعَارَفُوٓا ۚ إِنَّ أَكْرَمَكُمْ عِندَ اللَّهِ أَتْقٰىكُمْ ۚ إِنَّ اللَّهَ عَلِيمٌ خَبِيرٌ }. صدق الله العظيم.

كونو انا اكون محسيه وهو نوباوي دا ما بمنع زواجنا ،وكونو نحنا نكون بنحب بعض دا ما بمنع زواجنا ،كميه التنمر الجات لي زوجي انو ما بستحقني والله انا الما بستحقو لو عرفتو شخصيته وعرفتو اخلاقه زول طيب وحنين ومحترم وراقي وراجل بالف راجل والله احتواني بطريقه خلاني احبو من كل الاتجاهات ومن غير ما اشعر بقيت مدمناهو.

في ناس عاينت ليهو بالشكل يا جماعه راجلي شكلو مالو عشان اخدر تقولو عب عشان ما وسيم تقولو شين هو ما اختار شكلو ولا حدد لونو ،ولا حدد قبيلتو هو انسان عادي بسيط زيو زيى بحب وبحس وعندو قلب والمظاهر ما اي حاجه الناس لو قلوبا اتصافت بتتخاوا.
نحنا راضين بي بعض وان شاءالله حنتخطا الظروف ،وربنا يصلح الحال ونطلع من كميه التخلف والجهل والعنصرية ،ونغير مفاهيم كتير ونبطل سلبيات واساءات في حق ناس ما بنعرفهم ولا بعرفونا والحمدالله الذي بنعمته تتم الصالحات).

#احنا مبسوطين مع_بعض

#عاداتنا الرجعيه عواليق_نخليها