– [ وَهْم السياسة ] — ,,1,,
واحد خرج على الملأ ، وقال:( أيُّها الناس ، أنا كُنْتَ كوز ، وما زِلْت ، وح أموت كوز .وخلال ال 30 سنة الفاتوا ديل ارتكبتَ جملة من الأخطاء ، وطائفة من الخطايا ..وهي كذا وكذا وكذا ..دحين أنا بَقِرَّ بيها قدامكم ، وبعتذر عنَّها ، وبلتمس الغفران ، ومستعد للمحاسبة .). . ده مشكلتنا معاهو شنو .؟. وقضيتنا ضدو ممكن تكون شنو ..؟ .
واحِد تاني , بشوف إنو الصادق المهدي ده رضع جينات الزعامة من ثدي أمه،وأوتِي الحكمة وفصل الخطاب والرياسة والكياسة بالوراثة ..فهُو خيارٌ من خيارٍ من خيار.. وإنو هو الأنسب لقيادة الناس ، وتصريف شؤونهم ، وتدبير الأمر .. مشكلتنا معاهو شنو ..؟ .
واحِد تالت ، بقول بالاتحادية مع مصر .على سند من القول إنو المصريين ديل علمونا ،وليهم أفضال تاريخية علينا، ولما كنا حايمين عُرَاةً حُفاةً غُرْلاً، المصريين ديل كانوا لابسين ومنتعلين ومطهرين بيتدرَّجوا على عتبات التقدم والثقافة والنور .ومن الواجب إنو نحترمهم ونتحد معاهم ونتعلم منهم أكتر .. ده مشكلتنا معاهو شنو ..؟ .
واحِد رابع ، مُتَّهَم بالشيوعية يقول , يا جماعة الشئ الموجود بيكفي الموجودين ،ويفيض ، لكن في مشكلة في التوزيع .فلو قدرنا نعيد التوزيع – بعدالة – بحيث إنو كل واحِد ياخد البحتاج ليهو فعلاً ويترك الباقي للآخرين ،ما ح ينقصنا من صُوَر الصلاة إلا العبادة .. أها زي ده مشكلتنا معاهو شنو ..؟ ..
في رأْيِنا , البشوفو أنا ,,
إنو ما في مشكلة .ما دام النزال كان سلمي ديمقراطي ، وما دام قارعنا الحُجَّة بالمَحَجَّة ،والتزمنا بمبدأ اللعب النظيف ، وودَّعنا الكراهية ..
– وما بِضُر إلا الكلام المُر –
“شُكْرِي”
قوود لك شكرى
انت الوحيد العاقل فينا
✋✔👌
الكوز الذي سفك الدماء و سبى النساء، (يشمها قدحة)، كيف نعيد ألأرواح التي ضاعت و الشرف الذي أًنتهِك والكوز وقتها كان يصفق لتلك الجرائم؟؟؟؟ قول تاب و بكى و رجع الأموال و العقارات، و ين تروح الأنفس الطاهرة التي أُعدمت؟، كيف تبرا جروح الشرف؟ يعني بي كلامك دا ممكن نرجّع عمر البشير و نافع و علي عثمان بعد توبتهم، هل تقبل هذا الكلام؟؟؟