السودان محتاج (رقية شرعية) !!

قزاز ورذاذ

* لو عايز تعرس داير ليك رغيف بعشرة مليون (سوق أسود)

*ولو عايز تحب داير ليك (٢) مليون عشان تدخل كافتريا (أنت وهي)

*ولو عايز (تحب وتعرس) أبقى حرامي واكسب زمنك .

* حاجة تكسف .

* بعض الذين سافروا إلي جوبا وحضروا توقيع السلام ، هم أيضا يحتاجون لمفاوضات و(تطبيع مع الأخلاق السودانية)

* في أشكال كده سافرت جوبا أنا لما شفتها خفت على (السلام والإسلام)

* وبمناسبة السلام .

* يُوقع ياسر عرمان ، يقوم الحلو يرفض ، مالك عقار يجي ، عبد الواحد يركب رأس.

* نقوم نحنس الحلو نلقى مناوي زعل ورجع الغابة .

* السودان محتاج (رقية شرعية) مرتين في اليوم طوال الفترة الإنتقالية.

* البلد دي شيلوها من الأطراف براحة وودوها (الحج) عسى ولعل .

* ياريت لو كان هنالك حج للأوطان أيضاً

* الله في .

* وهي راجعة من الفرن قبل صلاة الصبح بربع ساعة قابلت ليها حرامي طالع من الحِلة وشايل ليهو شاشة (٣٢) بوصة .

* قالت ليهو : انت سارق الشاشة دي من وين ؟

* قال ليها : وانت سارقة الرغيف ده من وين؟

* قالت ليهو : تبدل؟

* ضحك واداها الشاشة ال(٣٢) بوصة وشال منها ال(٣٢) رغيفة .

*(واحد بوصة) بواحد رغيفة .

* كسبان هو طبعا .

* حالة صعبة .

* حتى وقت قريب كانت (التحلية) حاضرة في (صواني) البيوت السودانية ..

* تحلية الفطور (شعيرية) وتحلية الغداء (كاستر ورز) وتحلية العشاء (باسطة وحليب)

* الكلام ده قبل خمسة سنوات .. ما أكتر ..

* كنا بنفطر بالرغيف وبنحلي بالشعيرية ..

* والآن أصبحت (التحلية) هي (الرغيف) ، بينما (سقطت) الشعيرية سهوا ..

* تضرب (الكسرة) وتمشي تقيف في (الصف) عشان تجيب (رغيف للتحلية)

* والله صحي ..

* القبل خمس سنوات كنا بنفطر بيهو هسه بقينا (نحلي) بيهو ..

* بلغنا زمن .. يا تأكل ويا (تحلي)

* واحد من الأتنين ..

* لو (أكلت) ما بتقدر (تحلي) ولو (حليت) ما بتقدر (تأكل)

* يعني لو نفسك دخلت في الشيعرية تقوم تخلي الفول وتشتري شعيرية ولو نفسك إشتهت (رز بالكاستر) تقوم تخلي السلطة وتشتري كاستر ورز أما لو نفسك دخلت في اللحمة والباسطة فهذا يتطلب أن تقدم لـ(تمويل أصغر)

* عشان تأكل لحمة يلزم تشيل سلفية ..

* بمناسبة اللحمة ..

* ورد في الأخبار أن رجل (كشح) حلة مُلاح فى رأس زوجته ..

* وأعتقد أن السؤال الذي يطرح نفسه هو : (المُلاح كان مُلاح شنو) ؟؟

* شكلو مُلاح عدس والله أعلم ..

* المُلاح ده لو كان مُلاح فيهو (لحمة) أو (فراخ) ما بتكشح ..

* ده ما زمن بكشحو فيهو مُلاح ..

* وعلى ذكر المُلاح ..

* في بعض (المطاعم) بولاية الخرطوم تجد (الأكل بارد) و(الشطة حارة)

* وفي مطاعم أخرى (الشطة باردة) و(الأكل حار)

* والمطعم (الشطتو باردة) في الغالب رواده قليلين جدا ..

* (الشطة) لها قيمة في (الصينية) ولعلها تفتح النفس للأكل حتى وإن كان

الأكل (مسيخ وبارد)

* كنا نظن أن الشطة ما ممكن تبقى (وجبة قائمة بذاتها)

* ومع الظروف الإقتصادية الراهنة بقينا نأكل الشطة كـ(وجبة)

* وغايتو جنس غايتو ..

* المسؤول في أي مؤسسة يتلذذ جدا لما يشوف مكتب الإستقبال الخاص به مليان ناس ..

* في مسؤولين الواحد مخصوص بيملأ مكتب الإستقبال ناس عشان يستمتع بأذلالهم وسرقة أوقاتهم السمينة ..

* يخت ليك (سكرتيرة) في الإستقبال ويعمل ليك فيها مشغولة ..

* هو ما عندو أي حاجة شاغلاهو ..

* يكون قاعد جوة المكتب يحضر فليم أجنبي ..

* ما عندو شغلة لكن بيحب أنو الناس تكون منتظراهو في الإستقبال ..

* زول عندو نقص وعايز يكملو بالمواطنين المساكين ديل ..

* نقص عجيب..

* و..و..

*وقالوا متألم شوية يا اخي …(ده كلو من أكل السوق) ..

محمد الطيب الأمين
مواكب