انا بكرهههههه الواتساب …… اييييييه (موسيقي هابطة)

د. عبدالحميد مامون الكامل

قروبات الواتساب منتج سوداني بحت علية ديباجة (صنع في السودان) .الناس (مقربنين) كيمان كيمان ذي لحمة الضحية . ناس المدرسة الابتدائية والشفع الكانو بيلعبوا معاك (دس دس) زمان في الحلة وقروبات الجامعات . اما ناس حلة فلان وفلان كتار ما يدوك الدرب … ، حيرنا الخواجة العمل الواتساب . الواتس طبيق لا يعلي عليه في الاتصالات الصوتية والرسائل الاخبارية القصيرة بين المغتربين واهلهم يعني مثلا (عرس اخوك بعد شهر رسل القروش للصالة والفنانين) جملة مفيدة مختصرة تحافظ علي نظافة البيئة الاسفيرية …  ياخي شدة ما ( تقربنا في الواتس) الزول لو طالبك قروش يعمل قروب ويسميه جمعية المعسرين …

اها تعال شوف ناس (منقول) ديك … ياخي نحن شعب (نقال خلاس)  ما  في وردة حائمة في هولندا الا ونقلوها السودانين الي قروباتهم  اليومين دي الهولندين بيزوعوا وردة مفكرين يسموها (وردة الجمعة المباركة)  مخوص لقروبات بني السودان . كتاب الله والرسول ذاتو السودانين نقلوه اية اية لقروباتهم  في الواتس …

… في الجانب الاخر من الشارع حيث الناس الهاي جلاس يوجد السيد المحترم فيس بكوك الابن الشرعي لي بلدياتنا الاخ مارك .

  ناس مستحمين وريحتهم حلوة. معلقين صورهم وصور اولادهم علي بوابات منازلهم حتي ناسهم الماتو عملوا ليهم مقابر في ارض مارك ولد حلتنا . الفيس بوك شدة ماراقي لو داير تنقل ليك خبر  موت ولا عرس يقول ليك Share لانو علي راي الامريكان (Sharing is caring) مش ذي ناس (شمار بني هلبة) يقول ليك منقول اديك احساس انك (مشاطة).

 ياخي الفيسبوك ده ارض الحريات والاحلام . لو مرة دايرة تبقي راجل ما مشكلة زمان كان في واحدة في حلتنا جنها ركوب عجلات والناس سموها (عوض)  دي لو حضرت زمن الفيس كان عملت ليها بيت في واطة مارك دي وسمت نفسها (عوض الجاز) ذاتو والراجل الكان نفسو يكون مرة يعمل عملية تجميل ويعلق صورة (Jennifer Lopez) في خشم بابو والجكس يدخل ويمرق الحبة ما بتجيه . اما الجماعة اللحقوهم شهادتهم الثانوية في السعودية وعليها ختم رسوب هسي حيضانهم مزينة بشهادات من اعرق الجامعات . الفيس ارض الاحلام ذي (American Dream ).

 اما ناس ال (Overnight) عشاق السهر بيلقوا ليهم ناس يغنوا ليهم ولو من الناس البيصحو من النجمة (حرم) تلقي ليك في الفيس ناس يعزموك شاي لبن بي ليقمات حارة.

بعدين مافي زول بيروح من زول في حلة (مارك) دي. لو في زول زمااااااان دفع ليك حق التذكرة في بص (ابورجيلة) بتلقاهو حائم في شوارع (سوق الله اكبر) ده وتعزموا بارد كمان . مش ذي ناس (شمار افندي) لو الواحد عندك معاهو تار قديم الا تساهر اليل كلو قانص ليهو في زقاق قروب من قروبات جمعة مباركة.

اخر حاجة نجي لي المتزوجين . ياخي الفيس ده ذي المسجد الكبير في سوق امدرمان في ناس عرسوا وواحدين زهجوا من الشغلانة دي وطلقوا ومستشفي الدايات امدرمان ما بعيد من المسجد الكبير في واحدين مفكرين يلدوا عديل ويسموا اولادهم (Like) …… ياخي الفيس ده عالم جميل علي قول دعايات (زين) .

   اها ياناس الفيس (في زمتكككم دي) الكلام دي يقعد في بطن الحوش ده ما تبقوا (نقالين) وتنشروا كلامي ده في قروبات (ناس قريعتي راحت) وتحيبوا لينا الهواء مع (المشاطات)  ديل .