مقالات وآراء سياسية

عالجوا الكيزان !!

محمد الحسن محمد عثمان

الكيزان ديل لو خلفهم نظام واعى لكان ادخلهم مصحه نفسيه اولا فى مبانى بيوت الاشباح بعد ذلك يحاكموا لنعرف الناس ديل عملوا كده ليه ؟ مثل ماعملوه فى بيوت الاشباح وفى نهب موارد البلد كلها دا مهم لمستقبل اجيالنا هم ناس ماسويين وغير طبيعين كان عندهم وزير لا اريد ان اذكر اسمه لانه قتل فى الجنوب وزى دا لازم يقتل فى الجنوب او فى اى غزوه من غزواتهم دا قرأ معانا رابعه اوليه (فى الزمن الجميل ) عمرنا زى ١٠ سنه سن الشيطنه الجد واى لحظة فسحه جرى ولعب الكوز دا من يدخل الفصل تانى مايمرق يقعد فى الكنبه دى لحدى مايمشى بيتهم بس قاعد مدنقر راسه وعمته فوق راسه يقرا حتى فى الفسحه نحن الواحد فى الفسحه عمته فى حته والطاقيه فى فصل تانى والحذاء فرده فى الحوش وفرده يمكن فى الشارع تجمعهم آخر الحصص الكوز دا بس ماسك كتابه ومدنقر يقرأ صاح شاطر والأول ودخل جامعة الخرطوم ولكن ملعون ابو الشطاره ودا السنه كلها ماشفنا سبيبه من شعره العمه فى الراس طوالى والوجه لا يبتسم منتهى الجديه لا يلعب وهو طفل !! ومتى سيلعب ؟ فالكيزان نتاج لعقد نفسيه عميقه تخيلوا زى دا مالعب شليل ولا حرينا وماتمتع بالدافورى وعمره مافلقوه فى راسه ولا لعب زك لحدى مانفسه ما اتقطع ولا دافس فى صف السينما ولا دار الرياضه ولا غالط فى هلال مريخ وحتى فى الجامعه يكون لحدى مااتخرج ما اتكلم مع بنت واحده واحده وحكى لى رفيق لعلى عثمان فى داخليات الجامعه قال لى ٤ سنه على عثمان مره واحده مادخل سينما النيل الازرق تخيلوا سينما النيل الازرق التى كنا نهاجر لها من الثوره امدرمان ومرات نخش الدور الثانى وهى جارة داخليات جامعة الخرطوم ونحن كنا نتمنى نخش جامعة الخرطوم عشان سينما النيل الازرق دى وطبعا لامسرح لا اتينيه لا حفلات وحتى فرقة الجو الرطب فى الجامعه لم يحضر ليها عرض واحد ليضحك وعندهم الضحك ممنوع وسحسحه ولا تمتع بالمحطه الوسطى وقعد فيها عشرة ونسه ولا جلس فى حديقة المقرن ليتمتع برؤية التقاء النيلين التى ياتى لها السياح من اوربا لمشاهدتها وقال لى يوم الجمعه مابمشى حتى لاهله ولا أصحابه يقعد فى الداخليه يقرأ وطبعا لم يحب ايام الجامعه يحب وين ودا حتى نفسه مايحبها فهم قد تجزرت فيهم الكراهية فهم اذا لم يجدوا عدو اختلقوه ديل فى حاجه لعلاج نفسى اولا فهؤلاء مجموعه من العقد النفسيه كوم عقد وهم يفعلون كل المنكرات ولكن فى الخفاء ودا ذاته احد مشاكلهم وقد شنعت بعلى واللمبى تراجى فافتحوا ليهم مصحه تسمى المصحه النفسيه للكيزان وتكون فى مبانى بيوت الاشباح على الاقل تجيب على هتاف اولادنا الثوار الكوز مالو ؟ وعلى تساؤل الطيب الصالح من اين اتى هؤلاء ؟؟!!

‫6 تعليقات

  1. ههههههه..لو سلمنا بماقلت عن الكيزان فماذا نقول عن حكومة قحط التى جعلت كل الشعب يعانى نفسيا. فبربك من اين اتانا هؤلاء.

  2. يا شيخ بطل العباطة البتوسي فيها دي ومن كلامك انت راجل كبير؟!!
    قريت الموضوع ما طلعت بي شي!!!!!

  3. في الحقيقة النظام الخلفهم لو كان واعي ؟ كان يربط لكل واحد منهم صخرة في رجلو وطوالي لي حلايب ..

  4. يا جماعة الزول ادوهو قرشه خليهو ينزل دا راكب من وين وماش وين دا شنو الهراء هذا ومن قال لك لك انك كاتب عمود فاعلم انه رادا الاسهتزاء بك يا شيخ شوف ليك شغلة غير الكتابة انت تريد ان تذم بما يشبه المدح فهذا اعتراف منك بتميزهم وجديتهم وانه لا مكانة عندهم للهزل والشغلة الفاضية التي لا تقدم ولا تاخر واذا اردت تلك الامور فابحث عنها عند جماعة الهوى وتجمع القحاتة فهذا ديدنهم فهل هم بذلك قد تميزوا ؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى