أوكامبويات المرعب والمرعوب أوكامبو والبشير
أوكامبويات المرعب والمرعوب أوكامبو والبشير
هلال زاهر الساداتي
[email protected]
بعد تصريح أوكامبو الأخير بأن عمر البشير خطر علي المجتمع الدولي وأنه لن يترك عمر البشير الا بعد القبض عليه وتقديمه للمحكمة الجنائية الدولية في لاهاي عقد المشير عمر اجتماعاً عاجلاً سرياً في مخبئه السري مع خاصة أعوانه المقربين وضم الاجتماع نافع وبكري وعبدالرحيم وكرتي , وشغر مكان صلاح قوش بعد رفته , ولم يترق نائبه في الجهاز الي مرتبة الأعوان الخاصين , وبدأ المشير الاجتماع وهو يتوحوح ويعض علي أصبعه ثم ضرب الطربيزة أمامه بيده فأطارت كبابي الشاي وفناجين القهوة وقال “يا جماعة أوكامبو مسخ علي حياتي وخلاها كلها كوابيس وبعدين يظهر لي ويكشر لي في الشاي البشربو واللبسة البلبسا وحتي في سريري , ولمن أحاول أنوم يظهر لي ويقول : أنا جايييك .. أنا جاييك , بس الحمدلله ما بيظهر لي في الأكل وعشان كده ختيت همي كلوا في الأكل حتي عملت لي كرش كبيرة وعنقرة وحاجات تانية “.
نافع : والله يا ريس أنا ذاتي بقيت أخاف خصوصاً بعد العملة العملناها في أبيي ورفضنا الخروج منها وربنا يستر ما يطلع اللستة الفيها الواحد وخمسين نفر لأنو أنحنا القاعدين ديل كلنا جوه اللستة دي .
عبدالرحيم : يا ريس سيبك من الزول ده وشيلو من بالك , ده زول هراش ساكت , وبعدين الفقرا الجبتهم ديل ما ثبتوا ليك الوساوس دي ؟ الحاج أبو شملة ده كان مشغلو القذافي .
كرتي : مقاطعاً … طيب كان شغلوا كان نضيف ما كان حتَّل القذافي …. سعادتك ده واحد فاشل.
بكري : يا أخوانا ما تستهزئوا بأولياء الله , وكان ده ما عاجبك يا كرتي أنا بجيب ليك واحد فكي تاني ينجض ليك أوكامبو نجاض .
كرتي : ده منو كمان ؟
بكري : إسمو أب دوكة وده مجرب وشغلوا أنضف من صحن الصيني بعد غسيلو .
عبدالرحيم : خلونا ياخوانا نشتغل علي المضمون , ومافي مانع نجيب أب دوكة ده لاكين اعتمادنا يكون علي جيشنا ومليشيات الدفاع الشعبي وجنجويدنا .
نافع : يا عبدالريحم ما نغش نفسنا ساكت . جماعتك ديل القلتهم كانوا وين وقتين خليل دخل أمدرمان جهاراً نهاراً .
أخذ عبد الرحيم يغمغم ويبرطم بكلام يوجهه الي نافع ( طيب انت ودابابيكم كنتوا وين؟) .
المشير غاضباً : أنحنا جينا نحل مشكلة أوكامبو ولا جايين نتشاكل وقدامي كمان ؟ انتباه كلكم . وسكتوا وكأن علي رؤوسهم الطير وبعد مده قال نافع .
نافع : بعد اذنك يا ريس اذا أوكامبو مصر علي ملاحقتك وقبضك فممكن نفشل خططوا بأنك تمشي السعودية عمرة وتبقي هناك وعلي الأقل حتلاقي صحبة رئاسية وعسكرية تليق بمقامك مع بن علي التونسي وعلي صالح اليمني ويمكن بشار السوري , يعني مؤتمر قمة عربية أو نادي الرؤساء المرافيت.
الرئيس: ما تحسن ملافظك يا نافع ? تف من خشمك يا حاسد , فال الله ولا فالك ? وصاح فيهم يفض الاجتماع .
sudan will never be the same after what has happened in Nuba mountains and Abyei ..omer is trying to condole himself ..and the sudanses people are the one who will pay.