قصيدة: يا اكتوبر الممكون سلام

( يا أكتوبر الممكون سلام )

صديق عبد الجبار ابوفواز
[email][email protected][/email]

يا وطن هداه الأنين
و يا دمعة غاطيها العشم …
ومتوسطة العبرات سنين
من شدة الخوف والألم …
***
يا أفق مسدود
بي سطوة الأساطير والوهم …
ويا طريق موشح
بي جراح مليانة هم …
***
لمتين نشيلك في عيونا
ونبطل الاهات والندم ؟
وكيفن نختك في قلوبنا
ونخلي مشوار العدم ؟
***
سكتنا طالت يا عزيز
منتظرة من يرفع قدم
كل الصفات الحلوة فيك
من فارس شديد
لي تاني موفور الكرم
***
وين المواكب والمتاريس ؟
وين الهتافات
ضد المظالم ومن ظلم ؟
وين سيرتنا بين الناس !
نهد الباغي
بي خرطوشه
أو كان بي قلم !
***
يا أكتوبر الممكون ..
سلام !
والجايات روابح ..
نابتة من مليون سهم
فياضات مراكب النيل
دافرات عديل ..
رافعات علم !
***
انت البهينك ما اتولد … !
وانت البعزك ؛
مليان علم ..
ومليان فهم ..
انت الأصيل ؛
انت المعتق ..
بالمصابيح والنغم !

“ابوفواز” أكتوبر 2012م