إسم الدلع للموت ( قصيدة)

بسم الله الرحمن الرحيم
اسم الدلع للموت( قصيدة)
اسم الدلع للموت
ان يحكمك كيزان
جحيمم الأسعار
والجنة في البمبان
ألفاظم العاجزة
دايماً هي العنوان
يقولوا حرية
والمعتقل مليان
لا عدالة عرفوها
ولا حقوق انسان
أكذب خلايق الله
ونفاقم البرهان
اليافطة اسم الله
والفعل للشيطان
عايشين في بحبوحة
والزهد طول بنيان
ماصين دماء الشعب
الصابر الغلبان
سوق الوعود رايجة
بي رفعة الأوطان
لا اتحققت يوماً
لا ليها سكة تبان
اتمرمرطت سمعة
لوطن عظيم الشان
بالعنف والإرهاب
وصمونا في البلدان
صمنا ببانجقلي
وفطرنا بالخسران
لا حوامة من ريس
بي قرعة في العربان
لا انبراش ظاهر
للغرب رغم الكان
ممكن يحل إشكال
لي أزمة السلطان
بلاعة للأموال
جيعانة مهما كان
وا ضيعة الأجيال
وا ضيعة السودان
لو كان بديل مافي
لفشل..وذل هوان
بطن الأرض أفضل
من عيشة فوقا تهان
يا المفتري ومنفوخ
يا المكتسي العريان
زفر اللسان بيفوح
من كل قول بيان
لكن خلاص كتمت
خليكا في الهذيان
وشبابنا قال تاني
ما بغشنا الضهبان
تمرين ورا تمرين
وسلاحة هو العصيان
لا طلقة قالت قول
ابوطيرة بقى حيران
سقفك بخر موية
قبل الخريف وحلان
أرضك قدود وحفر
ومشيك مشي عميان
راحت عليك يا زق
يا سبة الأوطان
دي بداية التمرين
وبقيت بلا عنوان
تيمك خسر بدري
ردموه بالأقوان
قوم واعترف وارحل
قبل الجموع تهدر
وتطهر الأوطان
من رجسك الظاهر
يوم الحساب قد آن
بكرة الحساب عنوان
والفرحة للسودان

معمر حسن محمد نور
21/دسمبر /2016
[email][email protected][/email]