ود الجبل : ما بوافق أصلا أبقى رئيس لأي حاجة..

بأمانة مع ? خالدة ود المدني
اليوم عايزين ود الجبل يحكي لينا بكل أمانة عن حياته الاجتماعية والعاطفية بعيدا عن القروش، رأيك شنو؟ ضحك وقال لي أحسن، وفعلا جاوبني بصراحته المعروفة، كما قصدت كتابة هذه الدردشة بلغته البسيطة والعميقة التي تحدث بها، حتى لا تفقد شفافيتها وأريحيتها.
* بأمانة هل أنت سعيد بحياتك؟
? الحمدلله سعيد ومبسوط.
* بأمانة هل بكيت يوما وإذا حصل.. ما الذي أبكاك؟
? بكيت في حاجات كتيرة، مثلا لما زول يحكي ليك مشكلته وخاصة إذا كانت سيدة ضعيفة وعندها (7) ولا (8) أطفال وزوجها متوفي أو عندها أي ظروف، أول ما أحل ليها مشكلتها بتقوم تبكي، في اللحظة دي أنا ذاتي ببكي معاها.
* أمنية لم تتحق بعد؟
? قدر ما أعمل حاجة بكون مبسوط، الحمد لله عملته المستشفى والمسجد والمدارس لكن كان ربنا أداني عمر لسه عايز أعمل قدر ما أقدر في أعمال الخير.
* بأمانة من يسكن قلب ودالجبل حتى الأبد؟
? الزول الما بقدر أنساه والدتي، لها الرحمة والمغفرة ودي صورتها معلقة خلفي، وكل
ما أذكرها بعاين ليها ودموعي بتجري، وبرضو الوالد بنفس القدر والوالدين ما بتنسوا مهما طال الزمن.
* موقف حدث معك ولم تنسه أبداً؟
? في مناسبة لواحد صديقنا ربنا يرحمه اتوفى، وبعد العقد انتهى في المسجد طلعنا لقيت في عربية واقفة قافلاني المهم طلع صديقي برضو، وحلف علي إلا أمشي معاه للراجل صاحب المناسبة وفعلاً مشينا، وفي الأثناء صديقي عندو بندقية ضرب رصاص لزوم الفرح وأنا عندي مسدس كمان ضربته مشاركة مني في الفرح، قام في واحد قال لي نزل المسدس دا علي الأرض ما يكون فيه حاجة، بالفعل جريت المشط في يدي اتضح أنه في رصاصة مرقت وأصابت صديقي ذاتو واتوفى، دا أكتر موقف محزن بالنسبة لي وطول عمري ما أنساه، وكمان ما بنسى وقفة أهله معاي وفضلهم علي.
* هل هزمك حزنك في يوم من الأيام؟
? مرات كتيرة بتشجع وأحيانا ببكي، لكن بحاول أتشجع دائماً خاصة لما أتذكر موقف محزن ذي قصة صديقي الحكيته ليك قبل شوية دي.
* بأمانة شخص التقيت به عن طريق الصدفة ولم يفارق ذاكرتك أبداً؟
? العلاقات كتيرة والحمد لله الناس العشنا معاهم زمان وهنا في المدينة برضو عاشرنا، ومرات تنسى الاسم لكن الشكل ما بيروح منك، وكمان مرات تشوف ليك زول من أول مرة تحبه ويخش في راسك وممكن تتونس معاه وتبقى علاقة.
* بأمانة هل لديك الجرأة أن تقول عمرك أمامنا؟
? كم وستين، خليها كدا بس.
* بأمانة أنت كرجل أعمال بلاشك يلتف حولك كثيرون وخاصة النواعم، ماذا أنت قائل لمن أبدت أعجابها بك؟
? بكون مبسوط شديد، لكن لو في زول عمل لي شعر ولا شكرني علشان أديه قروش دا ما زولي، لكن لو إعجاب بس بكون مبسوط.
* كم تحدد نسبة نجاحك في الحياة عموماً؟
? والله ما بعرف المهم ماشي ما بقدر أحدد، والتوفيق من عند الله.
* هل تؤيد الزواج العاطفي أم الزواج التقليدي؟ ولماذا؟
? نحن دخلنا في مدرسة ومعمعة علشان كدا بنصح أي راجل زوجته مريحاه أصلا ما يتني فيها، أنا يمكن أكون غلطت تنيت وتلته وربعته، لكن ما ندمان جبته الأولاد والبنات، برضو بكرر الواحد كان مرتاح ما يكتر، كله جربناه بالحب اتزوجنا وساي اتزوجنا، غايتو مستمر لكن زواج الحب أفضل.
* هل يوم من الأيام كنت السبب في تدمير الحياة العملية أو الاجتماعية أو العاطفية لشخص ما؟
? مستحيل أكون ضد زول، ممكن أزعل وأهيج، لكن لا يمكن أعادي زول مهما كانت الأسباب.
* بأمانة من هو أكثر شخص قريب لقلبك وبتفكر فيه باستمرار؟
? كدا انت عايزة تدخليني في مشكلة، كان في أولادك شكرت واحد وخليت التاني يزعلوا منك، ما بالك الباقين علشان كدا كلهم عندي واحد.
* إذا تم تعيينك رئيسا للبلاد فما هو شعورك وما هو أول قرار تتخذه؟
? ما بوافق أصلا أبقى رئيس لأي حاجة، دي فيها مشاكل كتيرة ينبذوك ويتكلموا فيك كلام فارغ وأنا شغل ذي دا ما دايرو، أنا حاليا رئيس لنادي الخرطوم وهسة قدمته الطلب بتاعي وما عايز أخش في لجنة ولا عايز مشاكل كتيرة، نحن 12 عضو وبيشتغلوا اتنين فقط، وبعد دا يطاعنوك بالكلام.
* مبدأ لن تتنازل عنه حتى وإن خسرك كل شيء؟
? رأيي حتى لو فيه ضرر بالنسبة لي ما بتراجع عنه، ولوخسرته كل شيء.
* عاده تفعلها دائماً وتتمنى أن تتركها؟
? إذا حسيت بأنه في عادة بتضايقني طوالي بتخذ قرار وأبعد منها، لكن ما عندي الحمد لله.
* هل أنت راضٍ عن نفسك؟
? الحمد لله.
* بتحب تسيطر على الحولينك؟
? أبداً، ما بحب السيطرة وبكون عادي معاهم، لكن لو اتخذت قرار والله لو غلط لازم يتنفذ، وبعد داك لما اكتشف الغلط بتراجع، لكن في ساعتي بنفذ بس ما بتفاهم.
* أول حب في حياة ود الجبل بأمانة؟
? العاطفة زمان ما ذي هسة، والعرس ذاتو كان مختلف، مثلاً كان شفته قريبتك ولا وحدة عجبتك يمشوا أهلك يطلبوها ليك، وانت ما بتظهر في الصورة أصلا وكنا بنخجل من كلمة بحبك دي ذاته ما ذي حبكم بتاع المدينة دا هسه، علشان كدا زمان دي كانت طريقة الحب عندنا، لكن فيما بعد تقدري تقولي موجود، بس كان صرحته بيهو هسه بخلق لي مشاكل.
* ودالجبل مشهور بأنه زول صادق؟
? أنا زول معروف وعايش بكلمتي، وأمشي بيها وما بكذب نهائي.
* اعتذار تريد أن تقدمه لمن؟
? لأي زول زعلان مني، أحياناً يكون في شخص طلب مني طلب ولما أديه ما يكون الحاجة الهو عايزا، ويمشي ماخد في خاطره مني، من هنا بقول ليه أرضي علينا.
اليوم التالي