حول صراعات شركاء الحكم

 
🔴 غلطان الفاكر انو المكون العسكري متماسك وما فيهو صراع زي الحاصل بين المدنيين فمكونيين غرقانيين في صراعاتهم التافه وال ما عندها علاقه بالمواطن وهمومه لكن الفرق انو العساكر بخلو صراعاتهم بيناتهم اما المدنيين فــ كل مجموعه بتمشي من ورا المجموعة الاخري وتشكي للبرهان وحميدتي من اقصاء الاخرين وهكذا من كترة ثرثرة المدنيين للعسكر عن صراعاتهم المكون العسكري بقي عارف كل شئ ولمن جا اتشاكل معاهم ذلاهم بمحاضر اجتماعاتهم الكانت اغلبها شكوي طرف من الاخر .

🔴 المكون العسكري الظهر متماسك ايام التفاوض الان ما فضل منه غير الثلاثي الفاعل ال هم البرهان وحميدتي والكباشي البقيه ديل كلهم اتهمشو وبقو برا اللعب بل كمان حردو الشغلانة وبقو بعيدين تماما لذلك بتلقي ناس زي العطا وابراهيم جابر خلو الشغلانة للثلاثي دا واكتفو بلقب عضو مجلس سيادة وبقي وجودهم زي وجود حسن القاضي في المكون المدني .

🔴 المكون العسكري ملان بصراعات ما ليها حد اولها هو الصراع الدائم والابدي بين الجيش والجنجويد ومهما حاولو يمثلو دور انهم سمنة علي عسل الا انو موقف أي جياشي محترم حيظل ثابت ومبدئي من رفضه المطلق لوجود جيوش موازية وحيظل مُصر انو مافي اي حل لاصلاح الخلل دا الا بدمج كل المليشيات دي عبر بوابة الترتيبات الامنية وجمر القضية دي مهما ادسدس تحت الرماد حظل متقد بين #الجياشة و #الجنجويد.
ف مافي منطق في الدنيا دي ممكن يقنع ضابط محترم متخرج من الكلية الحربية واتدرش سنين لمن وصل عميد او لواء مافي منطق او لامنطق ممكن يقنعوا بانو مفترض يدق تحية عسكرية لحميدتي او اخوهو العمبلوق داك لكنه بدقها وهو ممكون وصابر علي امل انو العوج دا مصيره يتصلح .

🔴 الصراع اي صراع بين المكون المدني دا مع سخفه وتفاهته حيظل شي متوقع لانو دي اجسام سياسيه مافي شي بلمهم سوي التحالف الاسمه (ق ح ت) لكن ما مقبول ابدا ولا مُبرر انو يحصل صراع داخل المؤسسة العسكرية القايمة علي اسس مختلفه تماما عن اسس المدنيين فالجدل والاختلاف والتفاوض والإتفاق جزء من طبيعة السياسة في اي مكان في العالم لكن ما حتلقي جيش في العالم جواه تصدع وصراع زي ما هو حاصل بين المكون العسكري .

🔴 المكون العسكري لازم يفهم انه البيته من قزار ما يفلع وقبل ما يطالب المدنيين بإعادة المفاوضين التم تهميشهم هو في الاول يرجع مفاوضنه التم ابعادهم من للمشهد ثم الاهم من كدا انهم يطلعو لينا برؤية واضحة حول مستقبل الجنجويد هل حيخلوهم تحت مسمى الدعم السريع ولا حيدمجوهم ويخلقو جيش واحد؟ .

🔴 الشق العسكري في السيادي لازم يستوعب اننا ما عندنا رأي فيهم هم فقط بل حتي في المدنين المعاهم وانو الجسم الاسمو المجلس السيادي دا اكبر معيق لمسيرة التحول الديمقراطي واننا كمواطنين سودانيين مسألة وحدة مكوناتنا العسكرية والمدينة بتهمنا جدا وزي ما بنستهجن الصراع الحاصل بين الاحزاب والحركات والاجسام السياسية وبنطالبهم بانهم يكونو قدر المسؤولية أيضا بنستهجن صراع العسكر وبنطالبهم انهم يقدموا لينا جيش واحد لشعب واحد .