خبيز العيد

جاراتي وانا ..تداعينا الى بيت حاجة نفيسة لاجتماع هام ..بخصوص خبيز العيد ..ابتدرت الاجتماع الحاجة بما انها صاحبة المنزل والفكرة ..(اها يا بنات لازم نبدأ من بدري ..اول بالتبادي ..نخبز الكعك العادي ..بعدين كعك العجوة ..بعدين البسكويت ..واخر شئ البتي فور والأشكال التانية دي) ..تبادلنا النظرات فيما بيننا ..فيما عاجلتها حفيدتها مناهل (يا حبوبة ..اشكال شنو وكعك عجوة شنو ..الحاجات دي بقت مكلفة شديد هسه ..ما بنقدر عليها ..نحن كان قدرنا نعمل كعك وبسكويت ..نكون ما قصرنا)
حاجة نفيسة : كيفن يعني ؟ والضيوف نقدم ليهم شنو ؟ ما لازم بتي فور ولانكشير
تدخلت انا: يا حاجة نفيسة …مافي طريقة ..الحاجات دي الا بالزبدة والسمنة ..ودي بقت غير انها مكلفة ..كمان ما بسهولة نلقاها ..نحن ناس موظفين ..خلينا هسه في قصة البسكويت
مها : ايوة خلونا في البسكويت ..انت يا ناهد بما انك بيطرية ..تجيبي البيض واللبن
انا: يا زولة ..(هنا كلنا واااحد في الشاشة) .. الأسعار نفسها للكل ..اشتروا من هنا وخلاص
فاتن: طبق البيض حصل 80 جنيه ..نعمل العجنة بتاعتي ..كل كيلو 2 بيضة
صاحت الحاجة : دا يا يمة بسكويت شنو دا ؟ نحن زمان الكيلو بياخد 5 بيضات
مناهل : يا حبوبة ..داك زمن المهلة ..مافي طريقة هسه لي خمسة ولا حتى تلاتة ..
غالبت الضحك وقلت لهم : غايتو اتذكرت زمان ..محطة التلفزيون الأهلية ..متابعين برنامج بتاع طبخ ..يقول ليهم صنف يعرفوه يجروا يجيبوهو ..الما بعرفوه ..يخلوهو ..شكلو بسكويتنا دا حيحصل طبخة ناس محمد نعيم سعد زمان
مها: اها الزيت ..نجيب زيت بتاع عباد شمس حاجة خفيفة كدا ..قاطعتها الحاجة : وووب علي ..بسكويت بالزيت ؟ يا ربي لا تمحنا لا تبلينا
فاتن : يا حاجة البسكويت من قمنا بالزيت ..انت تقصدي الكعك
حاجة نفيسة : وحاة نضري ..البسكويت في زمنا كان نعملو بالسمنة البلدي ..ريحته تجيب ناس فريق قدام ..مخير الله في حكمو ..دا زمن شنو دا ..لا فيهو البتي فور ..وكمان البسكويت بالزيت
انا : يا حاجة ..اها جيلنا دا ناس قدر ظروفك ..مش كويس حنعمل بسكويت بالزيت ..انا خايفة الاجيال البعدنا ديل ..يحكوا ليهم عن البسكويت ..زي ما يحكوا ليهم عن فاطنة السمحة ومحمد الشاطر
مناهل : حبوبة دي من زمن الرخاء والبلد فيها اي حاجة ما عارفة شئ ساي ..كان الحاجات في ..وينها القروش ؟ ..كدي هسه اسمعوا ..دي صاحبتي رسلت لي عجنة بسكويت ما فيها بيض
صرخنا جميعا فرحين ..ومددنا جميعا رؤوسنا الى هاتف مناهل الجوال لرؤية المقادير ..عندما سمعنا حاجة نفيسة تقول : انا ذاتي عندي ليكم وصفة ما فيها بيض ولا سمنة ..ولا حتى دقيق
نحن في صوت واحد : دي وينها ؟
حاجة نفيسة : اقعدن ساااي ..لا بسكويت ولا كعك ..عليكم الله دا زمن خبيز ؟ قال قدر ظروفك قال.

الجريدة