فيديوهات الثورة : الشرطة تصيب شاب برصاصة

طبل العز ضرب ياالسره قومي خلاص
والجنيات هديك في الساحه ختو الساس
والبنوت زغريدن تجيب الطاش
والخيل عركسن والدنيا بوق ونحاس

التحية و التجله للشابات المناضلات الثوريات و هم يتقدمون الصفوف…الى الامام

عفوا سيدي الحجاج

كلابك والأفاعي الحايمة من روتانا لي أمواج ..
كاورت البلد بي حالا ..
… ولا لقت اليقولها جر ..
في ناس جيعانة ما قلبت حرف في صاج ..
… في ناس عريانة ما لفحت هدم في الزيفة ..
ما طالت ايديها رغيفه ..
والسبب المعكر كيفا ..
دق بنوتا بالكرباج ..
ناس غلبانة بس دغرية ..
ما بتعرف تخت طاقية في طاقية ..
والدين الحنيف في شرعها الحرية ..
زدتها في الحرج احراج ..
وزدتها في الدجل دجال ..
عوج شفناهو ماسمعناهو في قول زول ..
قال بنات دقوها دق العيش ..
ولاد ما أندقوا في شبال ..
بقت في غصة الأيام ..
قيم غنيتا يا قدال ..
قيم شلناها عمة وتاج ..
رقيص الشامة بت حمدين ..
وخت الحنة لي يات من حضور ضفرين ..
ونمات العديل والذين ..
ورقصة جون مع أوهاج ..
مشينا نقدم البنوت على ضو الرتاين ..
خفت وهج الغنا الوهاج ..
ورحل صوت المغني حزين ..
ورطن صوت العنج هراج ..
سقط في غفلة نون النسوة ..
أخوان البنات والنخوة ..
ستار العيوب والرسوة ..
شيال الحمول أبعاج ..
.. فيا حجاج أكل نارك ..
واتلفح بشاكيرك ..
مع طلعة شهر زو الحجة ..
وأحرم حاج ..
وطوف فوق الجثث طاؤوس ..
وشعبك لا أكل لا علاج ..
وحاج في شنو؟ ..
معاك كل البلد هاصت ..
وفار نحل الجباية وهاج ..
فيا فالق نواة الحبة يافراج ..
ويا باسط عجايب الإسرا والمعراج ..
ويا خالق الخلايا الحية .. أمشاج ابتلت أمشاج ..
طحنتنا طاحونة الفقر ..
طحنتنا سنواتا العجاف ..
يا الله تلزمنا الصبر والسترة ..
والعيش الكفاف ..
وترحمنا من صرة وشي ..
في وش وليداتنا الضعاف ..
…………..
غرقان بيرقص منتشي ..
ووطنا مقطوع من خلاف ..
وبأسم الله ما خلالنا شي ..
وفصلنا في آخر المطاف ..
يا ناسي أقدار الرجال ..
ما تخشى غدر الله وتخاف ..
كتر عوج الكلام والميل ..
وتحت الجزمة مليون ميل ..
تحت الأزمة طاحونة حوافر الخيل ..
سقط تلت البلد عفوا ..
سقط نص البلد لهوا ..
سقط كل البلد سهوا ..
فهل صحاك ضمير الأمة في هجعة هوايد الليل ..
على زبد الغنا الممحوق؟ ..
شنو الخلاك تنوم تحلم على على خرطة وطن مسروق؟ ..
وطن في السوق .. وطن أشتر ..
مرق من ذمة التاريخ على ذمة كلاب الحر ..
ينوم في جبة الدرويش ..
يقوم بي بدلة العسكر ..
.. فيا ويلك في يوم الويل ..
ويا ويلك .. تقوم تحتك قيامة الناس ..
أفواج الضحايا ..
ستات الكجيك والشاي ..
والناس البعرفو شليل ..
حشود الطلبة والعمال ..
وبنوت الغياب والليل ..
طفولة مشردة ونازحين ..
وكم حجاج .. يجيك من ديل يجيك من وين ..
أولاد الشوارع عووك .. المعدمة ومعدومة ..
قطامة وقرضمة وراندوك ..
لماضة وطرقت حلقوما ..
من كل حتة يجوك .. يوم التسود يوما ..
ناسات حكومة الجن .. وناس جنها الحيكومة ..
ما طالا الشوارع في .. في ولاد بعرفوا القوما ..
ولاد راقدين .. وأولاد اسمها المايقوما ..
ديل أولاد شريعة قوش .. المستضعفين في الأرض ..
يبنوا ويهدوا عروش ..
لا بتخون البعض لابتشتريها قروش ..
في كل حته وراك تمرق تلاقي جيوش ..
أصدق لسان الحال من نضمك المهبوش ..
نفس الولاد جايين من طينة حضارة كوش ..
حافظين شعر حميد ..
فاهمين قصايد الدوش ..
ما تمشي يا محجوب دايرين نظبط بوش ..
يا داب عرفنا الصاح ..
دخل الكلام الحوش ..
وشكرا .. شكرا سيدي الحجاج

رباط شبعان يضرب مواطن جيعان بالرصاص. يعنى بعد ماجوعتونا تريدوا تقتلونا. لن نسامح فى دم اى برئ وليعلموا ان دم المناضل الواحد سوف تزهق له جميع دماء الرباطين. لماذا الرصاص ولماذا القتل لشخص اعزل خرج يطالب بحريته بطريقة سلمية؟

في دبابة
اباريقك في دبابة
تباريقك في دبابة
تنوم و تحس في دبابة
وعاد لي متين في دبابة
تظل معزول عن الدنيا
مقطع بينك اسبابه
لا جايب خبار اهلك
ولا اخبارك في زول جابه
تمارض وضع متساقط
جذور دبلانه في غابة
تعوم مركب التاريخ
تحرك دفتو و تابه
يا ناكر الحق يا ظالم
ارادة الشعب غلابة
اذا سديت دروب الارض
و اتطامن علي ابوابه
كيف تضمن سما الخرطوم
سماها الماها كضابة؟

ثورة ثورة حتى النصر

من المعيب جدا ان نترك ابناءنا الطلاب يقاتلون لوحدهم ويصارعون فى كلاب السلطة دون ان نخرج معهم ونساندهم ونشد من ازرهم فيجب علينا نتقدم الصفوف معهم من اجل شحز هممهم ورفع روحهم المعنوية وفى النهاية إن الأمر يهمنا جميعا وليس هم المعنيين بالأمر فقط فهؤلاء الشباب يحتاجون للدعم من كل النواحى لذلك يجب اولا ان نحييهم تحية اجلال وتعظيم على انهم اول من اشعلوا شرارة الثورة المجيدة وأول من وضعوا لبنتاهافلكم التحية يا عزنا ويا فخرنا ويا امل الأمة السودانية .

ان ما يقوم بة شبابنا اليوم من المظاهرات والخروج على الحكام لا يمت الى الاسلام بصلةلا يوجد فى الاسلام اعتصام ومظاهرات وانما علينا ان نصبر الى ما الت الية احوالنا ونتوب الى اللة لن الذى نحن فية الان من جور السلطان وغلاء فى المعيشية هى بسبب زنوببنا ارجعوا الى دينكم وحكمو عقولكم ولا تجعلو باسكم بينكم شديد حتى لا يضحك فينا اعداونا هم يريدون ذلك.
اللهم جنب بلادنا الفتن ما ظهر فيها وما بطن