يا ولاد الايه (قصيدة)

بسم الله الرحمن الرحيم
يا ولاد الايه
( 1 )
بتقول ايه يا الجهتك وين والاسمك ايه؟
تضحم زاد للسبب الايه ؟
في كل شهر ما عدمتوا سبب
يا جانا العيد ومعاه مدارس عملوا الايه
وبدون ما تقولوا الحل هو ايه
حنغير دينّا ونلغي العيد
يا تمسك ولدك دون تعليم
وتقول في الأصل بيدرس ليه؟
وبناكل ليه وبنشرب ليه
نتعالج ليه ونسافر ليه؟
ما عارفين ديلا بيعملوا ايه
في كل شهر تقريرنا يقول
الوضع الراهن وصفته ايه
( 2 )
قول يا سيد أسياد السد
الكهرباء فيها البرمجة ليه ؟
ومرات دون برمجة تقطع ليه ؟
ومرات بالكامل تقطع ليه
ما قلتوا خلاص..
الرد الرد بكباري وسد
وشنبنا يقوم في كديسة إذا ..
من بعده الأزمة تفوت الحد
والشعب الطيب صدق جد
عاملين ببيانكم حائط صد
الحاصل إنه هناية هناك..
دقشت أبراج والتربينات ..
جاتا الحمى ..وانقطع المد
والكل شغال شان ترجع همة وجد
( 3 )
آه يا الواقفين الليلة في صف
بتفكروا بكرة تكونوا في صف
وكأن الحاصل بقى عادي
روتين بيقول في الأصل الصف
يكفيكم يطلع زول مسئول ببيان
أسعار الايه..كده زادت ليه
والمكنة بقت تتعطل ليه
يا شعب قبضنا قطط زي البونية
في العام الكم ..والشهر الكم
مجموعة الكم.. لغفولم كم
بعطاء مضروب ..أولاد الايه
يا عالم يا ناس يا أمة
ما تقبلوا تبرير لي أزمة
ما تطولوا بالكم لي حكومة
كان ساس كان راس خالين ذمة
أعرف حقك..قالع ما بتقبل بالذلة
لا تبيت في صف لا تقضي وكت بالكتشينة
في الصف ترقدلك في فرشة
غير تفكيرك فد مرة
أقلب واطيها بعاليها
ما تقول العفو على ما فات
وكفاية بلاش طيبة وغفلة
ووصلنا خلاص حد المُرة
وفي إيدك تبقى ذليل وحقير
أو تبني وطن عالي الهمة

معمر حسن محمد نور
[email][email protected][/email]