طفلة الهامش وعيد الانتنوف-قصيدة

سمعت ازيزا في الفضاء
طفقت تنادي علي الصغار
هاهي الطيار …هاهي الطيار
تعالوا هيا علي الطيار
طفوله خالصه مبرئه
ما فاكره ترمي عليها نار
ما شاهدت يوم في الفيلم
قصف الطيارة ولا الشجار
الا يومذاك شاهدت
وذاقت لفح النار جهار

شافت ابوها وامها
أشلاء صرعي بالديار
مسكينه فاكراهم نيام
اخدت تصحيهم مرار
ساعات تمر والناس نيام
عادت صاحت باحتيار
ليه الخلق نومهم طويل
وايه الحصل بعد الطيار
يا يمه قوم بسرعه قوم
هيا نمشي الواطا حار
لبسك ملطخ بالدماء
فستان وتوبك والخمار
وابويا ليه شكلك كدا
والدم حواليك كالبحار

غابت شموسها وضلمت
الموت اخد كل الكبار
والجوع بيداعب في الحشا
والخوف ايضا والحصار

جادت بتله علي التكل
الحلل والزير في انيهار
شوف الفرق ما بين
مرام الديمه بهجه وازدهار
قتلوها ناس من غير وعي
فاكرنها لحقت قطار
لو كانوا بكامل عقل
ما كان اذاقوها المرار
لكن مرام هامش تموت
مغتصبه مرميه بعيار
مقتوله بعقلا كبير
عمدا ميتمه بقرار
من غير ذنب عاشت نزوح
عانت مشرده بالديار
وروني جرمها جد شنو
لمن تعيد بالطيار ؟؟؟؟

احمد محمود _القاهرة
[email][email protected][/email]