مذكرات الانتفاضة الاحد ٦يناير٢٠١٩

واضح جدا انو القوات النظامية رفعت يدها ٩٠ %من القوة الكان بتقمع في الناس هم جهاز امن بعربات امن منزوعة الارقام وملابس عادية
١٠% اللابسين شرطة مكافحة الشغب اعتقد انهم ما من قوات الشرطة مشيهم في الواطة ما مشي شرطة ولا حتى طريقة استخدامهم لعبوات البمبان ما طريقة الشرطة طلوعم و نزولم من العربات حقت ناس كحيانين وغير مدربين
وحتى لهجتهم مع الناس مختلفة عن لهجة الشرطة

تاني حاجة اكتشفت انو السك سك حق المظاهرات ده انا كبرت عليه . الليلة جكتين تلاتة اهو وصلت البيت وكأني داهسني قطر .

تالت حاجة
في الديم والسوق العربي اطلاقا ما تم استعمال الرصاص . هل يا ربي ده بأكد على كلامي بتاع الشرطة سحبت قواتها؟؟
التكتيك التم اعتماده لقمع مواكب اليوم هو الاستعمال المكثف للغاز المسيل للدموع لدرجة انو كل نفرين ماشين مع بعض بفرقوهم بعبوة غاز مسيل للدموع.
الامنجية في الشارع مرعوبين جدا جدا من التوثيق ومصابين برهاب الكاميرات واي زول شايل موبايل بجروا وراهو معتقدين انو صورهم.
مع ملاحظة انهم كلهم ملثمين .
رابعا وخامسا وسادسا السك سك حق المظاهرات انا والله كبرت عليه لكن قدري اكون في الشارع حتى تشرق شمس حريتنا..

فيسبوك