عثمان يس ود السيمت
كلام غريب لما يقولوا حنعمل اتفاقية مع العساكر والشارع يكون ضامن ليها من العساكر عشان العساكر ديل ما مضمونين . زول انت ما ضامنو بتتفق معاهو كيف . دي زي امسكوا لي الزول ده واحرسوني خلوني ادقو ليكم. هو زول دقاك قبال كده وقطع هدومك خلاك ماشي أم فكو ما تبعد منو. وكمان عايزنكم قبال ما تضمنو العساكر تضمنوا بعضكم. هل بيناتكم في ضمان وسؤال أخير ومحير جدا ، انتو وقعتوا مع نفس نفس ذات العساكر قبال كدي وجرسوكم ونجضوكم وخلوا كل حاجة تحت يدهم (82٪ من المال العام ، والأمن والجيش والشرطة والخارجية برضو ، وللا التطبيع مع اسرائيل تابع لي منو ، والسلام بتاع جوبا الجاب الجيوش للخرطوم). فضل شنو ما سويتوهوا بالاتفاقية الأولى عايزين تعملوهوا بالإتفاقية دي. وبعدين اتفاقية حمدوك الوقعوها بعد ما (استضافوه خوفا عليه وقالوا قاعد يشرب معانا شاي المغربية) وأول ما وقع عصروه عصرة عدوك لحدما نفد بي جلدو . وين الاتفاقية ديك في الليلة ديك الشال فيها الجراح وكل احزان اليتامى وقال ما بصدقكم وقلت ارحل اشيل خطواتي من زولا نسى الإلفة وشاي المغربية.
على العموم نتو محروقين من زمان لكن بنصحكم العساكر ديل بيحرقوا فيكم واحد واحد وقدر الفضلت فيكم بحرقوها قبل (الانتخابات) وده لصالح المؤتمر الوطني العامل نفسو معارض الاتفاقية ، وهو في الواقع يرتب لانتخابات الأرض المحروقة وحيحرقوا أي زول يحتمل يترشح قصادهم. وسجم خشمكم اكان ما فهمتوها. وياها لغة اكلوني البراغيث . أوع يكون شربتوا معاهم شاي المغربية.
