الكديسة في السياسة السودانية
استيلا قايتانو
نظرية احد اعمامنا الجنوبيين عن وحدة الارض السودانية واستحالة الانفصال لان السودان مثل كديسة واحدة مستلقية من حلفا لي نمولي في نكتة ما في زمن ما ، كان يقول : لو كديس ضنبو في حلفا وراسو في نمولي ، لو عفسو في ضنبو في حلفا بقول ناو وين ؟ يرد عليه المستمع : في نمولي . يعقب عمنا بجملة : وتيِّب !! . ويقبل يشوف شغلتو بعد ان اطمأن بانه اقنع سامعيه .
ذات الكديسة الوحدوية التي تستلقي متبرطعة من حلفا لنمولي تدور الايام وتستعمل في سياق اخر لتفسير سلبيات التعددية كنظرية لفصل الشمال عن الجنوب وبقدرة قادر تصبح الكديسة الواحدة التي انجبت كدايس كثر لا ترغب في الفئران مما حدا بسيد الحديقة ان يفصل بينها لان الكدايس والفيران ما بتلمو ، ولمتهم فلقة راس وسيلان الكثير من دماء الفيران طبعا رغم وقفان سؤال من الكديس والفار في الدولة السودانية القديمة ، وايضا يكرر عمنا ذات السياق في اي محفل ولا يقبل يشوف شغلتو حتى بعد تأكده بان سامعيه (والله العظيم تلاتة) اقتنعوا بالفكرة .
ذات الكديسة ذات يوم من ايام الدبابين وشن الحرب على الكفرة في الجنوب في نكتة اخرى وهي كديسة مسلمة ومجاهدة هذه المرة والتي جاءت في نكتة ما على لسان شيخ ما بان لو ماتت في الجنوب شهيدة . وبعد انشقاق شيخهم وابيهم الذي علمهم السحر وتراجعه عن مسألة شهادة من ماتو في الجنوب جاءت نكتة اخرى تؤرخ لهذه الردة فاصبحت الكديسة التي ماتت في الجنوب فطيسة هذه كلها نكات يعرفها الشعب السوداني مما يوضح مقدرتهم على تحويل المآسي المبكية الى فكاهة كما قال احد المصريين مستنكرا بان السودانيين اصبحو يحكون النكتة علق قائلا : لا بد بانهم اتعصروا اوي اوي .
وذات الكديسة ام سبعة ارواح تنط وتظهر ايام سخونة المحكمة الجنائية في تسليم مرتكبي جرائم الحرب في دارفور وبقدرة قادر تصبح تتضمن اللستة التي يطلبها اوكامبو والذي حلفو بي علي بالطلاق : كديسة ما حَ نسلمها لي لاهاي لان جلد الكديسة دي ممكن نعمل منه جزمة ، وهذه الجزمة ممكن طبعا ان تفن فننن في وجه من دنا عذابهم كما فعلها احد الصحفيين مع السيد بوش . بعد هذه الرمية الكديسية نجد ان – بجد – المشكل السوداني وراهو كديسة لا تفارقها ونحن طبعا نتشاءم من الكدايس وموائها ، اذا اخذنا السودان القديم قبل التاسع من يناير وقسمناهو الى السودان الجديد (ما البتفتكرو داك طبعا حليلو داك راح شمار في مرقة) جديد يعني نصين نص هنا ونص بي جاي نلقى انه نصين لوطن واحد بالضبط به مشاكل بالكاد ان تتطابق ، حركة شعبية مسيطرة على الجنوب مع تململ الاحزاب الجنوبية الاخرى ، ومؤتمر وطني في الشمال مسيطر مع تململ الاحزاب الشمالية الاخرى ، مافي انتخابات بعد الانفصال النهائي اي مع نهاية الفترة الانتقالية هنا وهناك لانه كل واحد بيفتكر انو جاء بارادة الشعب ولا بد بان يتم فترته الخمسة سنين ،
حلايب في اقصى الشمال الشرقي متنازع عليها بين مصر والسودان وتلافيا للمشاكل مع الاشقاء المصريين طرحت كمنطقة للتكامل حقنا للدماء ، ابيي في اقصى الشمال الغربي لدولة السودان الجنوبي متنازع عليها ولن تعلن كمنطقة للتكامل ، حتى ولو انقرض فيها كل مسيري او دينكاوي ولو راقت منا ومنهم كل الدماء ، دارفور وحركاتها المسلحة وعدم الحوار والحلول ، خنجر في خاصرة السودان الشمالي ، ولحقتها جنوب كردفان والنيل الازرق في الطريق ، جونقلي وما حولها ومليشياتها المسلحة وجيش الرب ، خنجر سام في خصر السودان الجنوبي ، مع اتهام كل سودان السودان الاخر بتسليح اعدائها وهناك عناد وقوة راس الحكومتين وتتعاملان برد الفعل الانتقامي والتشفي بقول عشان تاني ومع انو كل واحد فيهم عارف زي جوع بطنو انو محتاج للجزء الثاني على الاقل في العشرة سنين القادمة ، اذا كان الجنوب (جركوك) وليد فانه بالقطع يحتاج الى امه (النفساء) الشمال ولا يستطيع الا قدر الموت ان يفصل بينهما لان حاجة كل واحد للآخر واضحة وفاضحة لكن فصاحة لسان ساكت وقوة راس ،
اليكم ان ترو الجقلبة في الجنوب عندما اقفلت الحدود بين الجنوب والشمال والجقلبة الاقتصادية في الشمال لان البترول تاني سيصبح بح بح والدعوة الى ربط البطون المربوطة اصلا واكل الكسرة المأكولة اصلا بالموية كمان ، الا اذا كانت هذه الدعوة ليست لعوام السودانيين وانما للفئات الخاصة التي لم تعرف الجوع ولا حتى الكسرة الا كسياحة في عوالم عامة الشعب ، الفقر والغلاء يطحن الشعب السوداني في جزءيه ، ولكنه بالقطع ودي حاجة هم متأكدين منها تماما عشان كدا مطمئنين شديد انو هذا الشعب يستطيع الصبر سنين اخرى حتى تفضا ليهو الحكومة بعد الانتصار على الدولة المجاورة وسحق متمرديها ومارقيها ، كلو ملحوق إلا الحرب أكان فوتناها تاني ما بنلقى لينا سبب لاشتعالها ، فالحروب تدر الاموال والسلاح ومنظمات الاغاثة اكثر من السلم دايرننا نقعد كنب ساكت بدون شغلة وللا شنو ؟ واذا كديسة قالت ناو في الجنوب معناهو عفسو في دنبو في الخرطوم ولو كديسة قالت ناو في دارفور وجنوب كردفان والنيل الازرق معناهو عفسو في دنبو في جوبا ، ولا كيف ؟ … وتيب .
سوف اشوف شغلتي لاني لا اريد ان اقنع احداً.
وتيب يا استيلا بس الكلام مقنع وبحكى واقع الحال
عجبنى مقالك شديد ….. ياحليلك أختى بت الجنوب وين تانى نلقاكى …….
لكن مهما لعب السياسيين فالمحبة قائمة :cool: :cool: 7
آآآآآآآآآآآآآآآآآآآآآآآآآآآآآآآآآآآآآآآآه
يا حليل السودان…;( ;( ;(
الرائعة ستيلا
إشتقنا لي سماع قلمك واصلي في إطرابنا بكلام نغم – وبي محاولاتك في علاج المليون ميل مغفل.
ونشيل ونغني : ياسودان معليش حكموك ناس الجيش إنت ما بتستاهل الغنم ديل
ولك كل التحية
ويييييييييييييييييييييييييييييييييييييييييييينك ايتها الرائعة استيلا
لا اسكت الله لك حسا
يا رائعة يا استيلا
كلام صاح الصاح بس في كديس تاني ما بيقول ناو ولا عنده ضنب قالوا دا موجود في مستشفي التجاني الماحي انا بدعو النافزين يمشوا يزوروا هناك امكن يلقوا لينا حل.
أنا بقول لحكومة الشمال وحكومة الجنوب لو ما فهمتوا كلام بنتنا إستيلا ما فضل ليكم إلا تشربوا من البحر – ولو أنتو متابعين الفضائيات ولازم يكون ده شغلكم البربطكم مع العالم – كان هناك حوار في قناة روسيا اليوم بخصوص تقسيم العالم إلى قسمين وتكلموا عن كل الدول المقلوب على أمرها وخلق البلابل فيها وما تكون مستقرة ومن ضمنها السودان وتقسيمه إلى عدة دويلات لأنه به موارد لم تستغل بعد وكانت البدايه ( يوغسلافيا – أفغانستان – العراق – ليبيا – وبعدها موضوع السودان ) حسب الخطة المرسومه للعالمين الجديدين ( نصف قائد ومتسيطر ونص تابع ومنبطح ومنهوب).
بنتنا إستيلا سلام عليك وعجبتنا طلتك علينا الله يعطيك العافية دنيا وآخرة
نعم يا حسن وبشكل دقيق
مقال جميل ورائع من الرائعة دوما(استيلا) مش حرام بالله الكيزان الملاعين يحرمونا من هذه المتعة
وهذا الصدق والروح الجميلة ؟؟__
لكن قولى معى (منقو قل لاعاش من يفصلنا)__
السودان باقى كما هو (كامل) والكيزان حيمشوا فى ستين داهية _ وحنرجع زى ماكنا ____
"حلايب في اقصى الشمال الشرقي متنازع عليها بين مصر والسودان وتلافيا للمشاكل مع الاشقاء المصريين طرحت كمنطقة للتكامل حقنا للدماء ، ابيي في اقصى الشمال الغربي لدولة السودان الجنوبي متنازع عليها ولن تعلن كمنطقة للتكامل ، حتى ولو انقرض فيها كل مسيري او دينكاوي ولو راقت منا ومنهم كل الدماء ، دارفور وحركاتها المسلحة وعدم الحوار والحلول…….."
هذا الاقتياس أجزم بأنه منطق أعوج. لا يجوز لمسؤول كائنا من كان التنازل عن شبر من أرض السودان لأي سبب من الاسباب، ولكن لو كانت هناك مساحة للتسامح لحقن الدماء، فأبيي ودار فور أحق بتقديم التنازلات الحقيقية. لماذا لا تضم منطقة أبيي للجنوب؟ أنا من جنوب كردفان، والكل يعلم أن أبيي جنوبية وسكانها دينكا نقوك ولدي منهم زملاء دراسة وأصدقاء أعزاء. ولماذا لا يعطى أهل دار فور كل مطالبهم التي تعترف الحكومة بمشروعيتها؟ أنا أشتم رائحة ابتزاز مارسه المصريون على الحكومة لكي يحصلوا على هكذا تصريح من سيادة رئيس الجمهورية. لا ولن نتكامل مع المصريين لأنهم "مصلحجية" ولا يأبهون بتقديم السودان ككبش فداء في أول لفة. الكل في السودان يعلم ذلك إلا قادتنا، فحسبنا الله ونعم الوكيل.
خذوا الحكمة فى فم إستيلا
المدهش أن كديسنا الأغبر دائما ما بتوهم أنه أسد
مع أنه دائما ما يموء بصوت لا يلتبس فيه إثنان
فهو كديس كديس
ولكن من يقنع الكديس
والله كنا نظن مثلك ان الجنوبيين هم اخواننا و هم مع الوحده ،حتى جاءت نتيجه الاستفتاء
الله يسامحك يا إستيلا وين مشيتي خليتينا للجماعة ديل ولا خلاص نسيتو … يابختكم الله يخارجنا نحن كمان. قولي آميييييييييييييييييييييييين… لك التحايا يا رائعة.
والله يا استيلا كلامك عين العقل لكن يا اختى الناس ديل نعمل ليهم شنو عاملين زى الشفع يفكهم من هنا يمشو تانى يشاكلو من هنا حيرونا حقو الشعب الجنوبى والشمالى يتفق يعمل فيهم مقلب نقوم ناجر السودان كلومزرعة ونمشى نخليهم
ياريت ياستيلا لو كان الحكام فى مستوى فهمك لكنا الان دولة موحده وماكان فى اى شقاق وخلاف
وين كديستك دي فبل ايام التصويت في الاستفتاء .. كان لا صوت يعلو فوق صوت الانفصال وخطاب دقدقه المشاعد ومواطن درجه تانية وجلابه ،، نسيتو واسى لمن حصحصه الحق وبقه الشمالي شمالي والجنوبي جنوبي ..
لمن عرفتو انكم خلاص جلسونكم في الشمال اصبح غير مرغوب فيه بقيتو تجرسو وتجيبوا لينا حتوته ( كديسه قال ناو ) .. ما قصرتو شكرا خلونا في حالنا بعيد عنكمك كفاية الي هنا ..
(أيمن من جدة)_ الظاهر عليك درست فى عهد الانقاذ _وماحأقول ليك شهادة عربية _ لانو غلطاتك
الاملائية الفظيعة دى دلالة على ذلك _
والله بقى يتجنب قراءة التعليقات علشان مايصاب بالغثيان (بالغين)__
دغدغة المشاعر __ مش دقدقة المشاعد__
حصحص مافيها هاء__
بقى مش بقه _
أما جلسونكم دى _ لافى السماء ولافى الارض _
حدوتة مش حتوتة __!!!!
عنكمك ___ دى أحسن خليها كده بدون تعليق __
______
بالله عليك ماحاجة تمرض __؟؟؟__
الاخ فارس انو نأجر السودان كلو مزرعة فكرة سليمة وخاصة انو الواحد بقي يجيهو احساس انو ما عندو بلد … واحسن نشوف بلد تانية ونقول عندنا بلد مؤجنها مزارع من يكون اصلا ما عندنا بلد….
الرائعة استيلا
اخخخخخخخخخخخخخخ يابلد وياحليلكم انتو ، والله مشتاقيين ( و لي مين انا اشكي ألم الفراق واحكي ) الله يجازي الكان السبب لكن اخوانا غدرو بينا وسابونا برانا ولا ما كدة ؟
يا سلام عليك يا من تتحدثين بصدق (أحبك) وأحب جميع أخوتي الجنوبيين والله على ما أقول شهيد
أختنا إستيلا طولتى الغيبه .. وكالعاده كتبتى فأجدتى
لك أجمل تحيه يابنت الجنوب الأبنوسيه من إبن الشمال
رائعة انت يا استيلا واتمنى ان يظل قلمك سودانيا اصيلا كما هو وإلى الأبد فأنت فينا دما واحساسا وعمقا
لنا اخوان واصدقاء جنوبيون كثر رائعون
لكن لا تنسوا ان من الجنوبيين من هم في ركاب الصهيونية العالمية مثل سلفاكير ويرتدي لاجلها يونيفورمها قبعة سوداء ضخمة وجاكيت ولحية .
لكنه احسن من المخترق عمر البشير والذي مثله مثل ال cd الفارغ يمكن ان يملأه الشخص الذي يستولي عليه بأي برنامج ايا كان. (حاليا مشغول ببرنامج تجار الدين للمعلومية)
شكرا استيل ا;)
اشتقنا ليك شديد ومن شدة الشوق بنرجع لارشيفك في اجراس الحرية والحب الجواك ده موجود في دواخل كل جنوبي وشمالي برغم انف الخازوقين اللي اتسببوا في انفصالنا
يا استيلا انت بتقولي ابيي في اقصي الشمال الغربي لدولة جنوب السودان- وانا بقول ليك ابيي شمالية وستظل شمالية ولن تكون جنوبية ونحن احياء-
والله سودانية اصيله وعسل فى إنتظار مقالاتك على أحر من الجمر.
الرائعة استيلا
انفصال الجنوب امر شكلي لان العشق المشترك والحب قابع في الماقي
غدا ايتها الرائعة تنداح الهموم ويدرك الساسة في الجنوب والشمال
ان الهم الشمالي والجنوبي واحد وان عري المحبة بين اهلنا في الجنوب والشمال
هي الاقوي وغدا تتكاتف الجهود وتتوحد الرؤي ويعود الوطن الواحد شامحا صامدا ومتالفا
كلامك كلام عقل يا استيلا مما يؤكد فهمك العميق للمشكلة السودانية كما يؤكد مقدرتك الفنية كصحفية مقتدرة على تحليل الوضع برافو عليك يا صحفية جنوبية اقنعت اهل الشمال
ليتهم بنفس عقليتك ونفس طريقتك في التعبير عن الواقع الحالي وليتهم يفهمون بأنه مهما سالت الدماء ودمرت البلاد فلن يكون إلا الإحتراف بالأخر وإحترامه أسمعوا كلام أستيلا يا ساسه أخر زمن -يكون التعايش(؟) :lool:
Dear sister STELLA..Dont worry ..let The TOM CATS in north or
south ..MIAO..MIAO..
Sooner or later when all stray cats are dead!!!
Then WE WILL REUNITE AGAIN
للمقارنة شتان بين مقال الرائعة استيلا الموضوعي ومقال لينو السطحي…نفس الشبه نلقاه عندنا في الشمال بين قامات فيصل محمد صالح وزهير السراج وامثال مصطفى الطيب واسحق فضل الله…
بهذا الاختصار لقد اجزت استيلا وصف قضية السودان فهي واحدة مثل الكديسة اذا اشتكى الضنب فالرأس يتألم.. التحية لكل الوحدويين واهل الحكمة والبصيرة في بلادي الذين داس عليهم اهل الانقاذ والحركة الشعبية بقوة سلاحهم وخطاباتهم الاحادية..
شكرا يا معلق(واحد) لتصحيح الاخطاء الاملائية الواحد لما يجي الراكوبة بس يجيب معاه قلم احمر و يشخت تحت كل كلمة خطأ و بعديها يكتب …اعد.
اما اختي استيلا مواضيعك كلها جميلة من حيث الاسلوب و البلاغة والاملاء…الخ. بس الما عاجبني فيك خيالك و اسع و مصدقة نفسك للاخر…و كدايسك دي يا بت امي سمموها زمان . بدلوها بدبايب ..لو كانت العلاقة بين الشمال و الجنوب بهذه السلاسة ما اختار الجنوبيين الانفصال … تتخيلي يا استيلايابت يابا الحكومةتطبق الحجاب في الشارع السوداني متجاهلة عمدا وجودنا??? انا اتذكركويس شرطة النظام العام في الهرم الجامعي عندما ياتون الي كل طالبة جنوبيةو يسالوها طرحتك وينا؟ و انت عارفة انو ما عندنا حاجة اسمها طرحة في عاداتنا…الوحدة في عصر الانقاذ تعني عبودية و محو ثقافات لم تخلق الا لنا…لا نسمح باي شكل استعلاء عرقي. نحب الشمالين كما نحب ابناء دينكا نقوك لكن الفرق دينكا نقوك تعاني من التطهير العرقي ….ما قلت ليك الكديسة ما فيشة…و تيب.
أنا ابن الشمال سكنتو قلبي وعلى ابن الجنوب ضميت ضلوعي ..
يا استيلا كلامك عجبني الا الفقرة التي تقول ( أبيي في أقصى الشمال الغربي لدولة السودان الجنوبي ) و أنا أقول ( أبيي في أقصى الجنوب الغربي لدولة السودان الشمالي ) وكدة ما بنتفق وحأعمل معاك دشمان زي البشير وسلفاكير . هذه الفقرة في تقديري خربت موضوعك التصالحي المتسامح الشيق .
– الله يا استيلا !!
جيتي تاني ؟؟؟
مالك .. دايرة ترجع لينا المواجع .. والجراح كلها من جديد ؟؟؟
على كل حال .. أنا بحبك ………وبموت في حبك يا استيلا !!!!
(1)
اذا اخذنا السودان القديم قبل التاسع من يناير وقسمناهو الى السودان الجديد (ما البتفتكرو داك طبعا حليلو داك راح شمار في مرقة) جديد يعني نصين نص هنا ونص بي جاي نلقى انه نصين لوطن واحد بالضبط به مشاكل بالكاد ان تتطابق ، حركة شعبية مسيطرة على الجنوب مع تململ الاحزاب الجنوبية الاخرى ، ومؤتمر وطني في الشمال مسيطر مع تململ الاحزاب الشمالية الاخرى ، مافي انتخابات بعد الانفصال النهائي اي مع نهاية الفترة الانتقالية هنا وهناك لانه كل واحد بيفتكر انو جاء بارادة الشعب ولا بد بان يتم فترته الخمسة سنين ، )
(2)
تعليق : ( هل هذه الطبخة التى انجزت تعبر تعبيرا صادقا كتلبية لمخطط طاعن فى القدم الهدف من وراءه تفتيت السودان القارة وحرمانه من الاستفادة من امكانياته الهائلة المخبوءة فى أرضه , ….. أم ….. ماذا ؟؟؟؟؟؟؟ )…….. أرجو المواصلة مع المقتطف طيه )
* الثانية : " قضية فصل الجنوب " لا شك أن كثيرا من المطلعين والمهتمين بقضايا الوطن يدركون أن : " عملية فصل الجنوب " تمثل بحق الأهداف الرئيسية والاساسية لأعداء الوطن : ( الأمة القضبية ) …….. ويدخل ذلك فى استراتيجيتهم بعيدة المدى , لأن هذه العملية تمثل وسيلتهم الوحيدة : ( لتدمير السودان ) ….. شماله وجنوبه وابعاده تماما عن أى محاولة للتقدم واستقلال ثرواته وامكاناته الهائلة والمعروفة لديهم , ……. بحيث يصبح مجرد دولة مشلولة وغير فاعلة فى المنطقة .
* وقبل أن أنهى هذه الرسالة أرجو أن أشير هنا الى ( كلمة ) كثر ترديدها وهى كلمة : ( الامة القضبية )…. ولكى لا أتهم بأنى مع : ( المفهوم الخاطىء لنظرية الموأمرة ) …… أرجو الاطلاع على الرسالة تحت عنوان : " أعرف عدوك "
وفى الختام لا يسعنا الاّ أن نرفع الأكف متضرعين الى الله أن يحفظ السودان وأهل السودان وأن يكفيه شر أعدائه المتربصين به ونسأله سبحانه وتعالى أن يجعل كيدهم فى نحورهم , ….. آمين آمين يا رب العالمين .
عوض سيداحمد عوض
[email protected]
17l12l2009
ملحوظة : ( منشور حاليا منذ 17/12/2009 بصفحة : " منبر الرأى " موقع سودانائل )
انا من وجهة نظري الحركة الشعبية ابطال استردوا ماخوذ…و اشيد بشجاعة فاقان و لينو و ابونا فخامة الرئيس سلفا كير ميار ديت . الحرية لم تات لنا في طبق من ذهب …جأت الحرية ببسالة هؤلاء الابطال. و نحن نفختر بهم كل الافتخارتسمونهم انفصاليون و نسميهم محررين. لكن المشكلة في بتنا استيلا الدايرة تكون شمالية حظ سعيد في لم الكدايس.
الى الكاتب ((((واحد] [ 21/06/2011 الساعة 1:05 مساءً]))) سعلوا واحد من الكتاب العالمين وقالولو يا أخى ما تدى مقالاتك دى واحد من علماء اللغة . فرد عليهم أنا أعرف أن الفكرة وتوصيلها هو الأهم ولكن هناك بعض القراء مغرمون بالتفتيش عن شئ غير الفكرة والأسلوب فلماذا أحرمهم هذا
انته صحح بس المده بالرمده
يعنى زي سعلتو دى تقول سعلتو غلط الصاح سألتو لو دى ذاته صاح
و تيب
يا استيلا
عارفانا بنشتاق ليك….!
ليه تنقطعي مننا المدة دي كلها
وتيب
سنظل شعباً موحد الوجدان شاء من شاء من الكيزان وأبى من أبى
وغصباً عن عين إتنباهتهم الصفراء
مقال رائع من إنسان شفيف يا بت قايتانو
انتى يااسيلا عارف الكديس الضكر انصاص الليالى بيعمل شنو بساهر بكل الحى بنطيط الزنكى لكن فى الاخير كوراك ساكت ونجف وعمل مافى ديل هم الكيزان وفى اول عصر بينطبق عليهم مثل زنقة كديس فى زقاق وعليك الله شوفى اى كوز امامك وتعرفى مال السحت والنفاق ظاهر على وجهه ورجائى منك ان تفرقى بين السودانى وخاصة المسلم والكوز ولاتعممى لاننا منهم ابرياء وماكل شمالى كوز لكن كل كوز حرامى وانتى ماسمعتى بان الكديس مابمسكوه اللحم والكوز مابمسكوه القرش والجبهجى عمره مابنستر
لكِ التحية والإحترام أستاذة إستيلا
الشمال والجنوب مثل الجسد الواحد إذا إشتكى منه عضو تداعى له سائر الجسد بالسهر والحمى
والمؤتمر الواطي هو المسؤول شمالياً في فصل الجنوب
والحركة الشيطانية هي الأخرى مسؤولة جنوبياً عن فصل الشمال
وكل من الشمال والجنوب له جذور متداخلة منذ آلاف السنين لا ولن ولم تنفصل بإستفتاء مذور ولا شعارات
الطيب مصطفى وإسحق الإنفصالية قاتلهم الله جميعاً
ولا الحركة الشعبية مرتاحة من فصل الجنو ب
ولا المؤتمر الوطني مرتاح من فصل الجنوب
وفصل الجنوب جاء لحقن دماء أشعلها المؤتمر الوطني سنين عددا ، وها هي تبدأ في الإشتعال مرة أخري
بعد الإنفصال
آن الأوان لإقتلاع المؤتمر الوطني والحركة الشعبية جميعهم وتسليم السودان من الإنشقات المقبلة
الخزي والعار للمؤتمر الوطني
الخزي والعار للحركة الشعبية
ولانامت أعين الجبناء
وإن عدتم عدنا
الكلام ده كلو نحنا عارفنو بس منو البقول البقله في الابريق ؟؟
الله يعطيك العافية يا استيلا وينك يا بنت جنوبنا الغالى لا جف لك مداد ولا كل بنانك اولا لا عاش من يفصلنا ولا بارك فى من زرع الفتن بيننا لا تحرمينا من مقالاتك الرائعة هذه انتى مبدعة صراحة والله كلما اتصفح المقالات ابحث عنك اولا بين كتابنا الاحباء الاعزاء ارجو الا تحرمى قراء الراكوبة من هذه الطلة الحلوة والمقالات الرائعة هذه دمتى يا حبيبتى ونحن فى انتظار اليوم اليوحدنا جنوبا وشمالا ما حصل هذا بالاكراه لعنة الله على الساسة والسياسيين العنصريين .
ايها المعلقون الافاضل- ماذا اضافت الكاتبه حتى تشكروها وتتهافتوا على كيل المديح- الجنوبيين اختاروا الانفصال بنسبة 99% وما عاوزنكم والكاتبه شمتانه فيكمم وتقول ليكم تانى بترول مافى بح بح = خلى بترولها ده تشربوا لان نحن نقول ليها تصدير بالشمال مافى بح بح بح بح بح = عداء الجنوبيين ليكم ظاهر فى غدرهم بالهجوم على القوات المسلحه وغدرهم بجنوب كردفان = شوف كم شخص ماتو وانتو قادين فى الانترنت تشكروا كاتبة المقال وهى شمتانه فيكم= بلاش غباء فكروا فى اصلاح شمالكم زى ما الجنوبين فكروا فى جنوبهم= واتقوا الله فى وطنكم= والله لو مشيتو جوبا او ملكال او الرنك القريبه دى تغيروا رأيكم ده لو رجعتوا سالمين- الشماليين قلعوا حقهم وحرقوا دكاكينهم وشردوهم وهم عايشين منذ مئات السنين فى الجنوب= بعد يوم 9 حتشوفوا وتسمعوا باهلكم فى الجنوب يعملوا فيهم شنو والله يكضب الشينه== نقول ليهم لكم دينكم ولنا ديننا والله يسهل علينا وعليهم==
إن قلمك الساحر مقنع ورسالتك المبسطة في أسلوب السهل الممتنع تذكرنا دائما أن غفلتنا هي التي أودت بنا لمهالك التهلكة. الساسة والمتسيسون الجدد والقدامى يفنون ولكن الوطن من حلفا إلى نمولي موجود وسيتوحد لا محالة طالما أمثالك في الشقين يدركون جدلية انتصار الحق والعدل على الظلم والجور. عشت استيلا ولا تقطعي مشاركاتك المعبرة.
اولا الشكر للاخت استيلا علي طلتها بعد غيبة . استيلا تلك الساحر بتطويعها مفردات اللغة في كتاباتهاو الساخرة من الاوضاع المزرية التي المت بالوطن الواحد واقول للاخ ابونون مع احترامي لك الكاتبة تسخر من حال البلد التي اوصلها لها الشريكين وتاكد ان حاجة الشطرين لبعض ضرورة ولو تابعت تلك الكاتبة لاعجبت بها سواء في القصة او المقال ربنا يوفقها لو واصلت في كتاباتها ستكون كالطيب صالح من قبل فازت في الاذاعة البرطانية بافضل قصة قصيرة وفقها اللة وهذا المقال لايخالف الواقع وخير الكتاب هم الذين ينقلون الواقع ويعكسونه
اقسم بالله العظيم ، هذا المقال الرائع لهذه الخلاسية الرائعة هو (عصارة) ويفوق كل الغثاء الذي تسيل به كل الصحف السودانية التي تردح وتمدح ، وخير الكلام ما قل ودل، ولا فض فوك.
الاخ .. ابو نون .. مع احترامي لرأيك .. نحن نري في استيلا نصفنا الاخر الذي شق من لحم وحدتنا .. نري فيها هويتنا التي ضاعت .. نري فيها .. السودان بمختلف اعراقه واثنياته وقبائله وثقافاته المختلفة المتميزة المتجانسة.. ان لم تري ما نري لك العذر .. ربما تكون من انصار التشرزم والافق المظلمة والنفس الخبيثة سواء كنت من الشمال او الجنوب .. سواء كنت حركة شعبية او مؤتمر وطني .. فالانتماء الي السودانية يتعدي النظرة الضيقة ويتجاوز كل اشكال الفرقة والانفصال ..الذي قام به البعض في حق هذا الوطن .. عودآ حميدآ استيلا .. وعقبال عودة الجنوب العزيز الي حضن الوطن ..
استيلا انت السودان الكل فهل من أمل
و الله موضوعك أحلى و أجمل من أي كديسة شفتها في حياتي يا إستيللا و شكل الجنوب لن ينفصل عن الشمال حتى لو بحرب عشان لا ينقطع جسم الكديسة الممتد من حلفا الى نمولي (موضوع معبر رائع يستحق جائزة الأدب و الوحدة السودانية ) و ما أروعك كإبنة بارة للكديسة السودانية حتى لا تقول ناو ناو بتاتاً رغم كيد الإنفصاليين العملاء و عاش السودان حراً مستقلاً بأبنئه و بناته أمثال إستيللا قايتانو و د. لام أكول و زمرتهم في كنف الكديسة الواحدة . موضوعك دسم و حلو مثل كاتبته تماماً لا يتذوقه جيداً إلا من يحب عدم أذية الكدايس .