مقالات وآراء

العووود !!

بدر الدين فرو

“هودنا.. يا هودنا. . ووين نشيلك يا جنا. هووودنا”

الكلام دة كان في الإمتداد  “إمتداد الدرجة الثالثة” في الجهات ديك ناحية سوق الجوهرة. .
الساعة كانت بين خمسة ونص وستة إلا ربع وقت بابكر أخو ناس قسمة كان بدندن في أغنية حامد أبسبح في المسجل الجديد الجابوه لى ناس خالد الوزير من دبي وبقى يمرقوا مرة مرة في قعدة الوست للشباب في الدرابزين بتاع ناس كجر.

وكجر زاتو الدرابزين ما دقة فيهو طوبة أكان ما الشباب عاونوا أبوه بعد ما شاورهم  بابكر في النفير. .

لأنو حاج عثمان أبوكجر كان زول ونسة وطوااالي بشجع الشباب في الحلة , ولو لاعبين كورة وين ما كان ، حاج عثمان كان بمشي وما بقصر كلو كلو ، لو غالبين ولا مغلوبين كان بيمشي ويشجع . لكن طوااالي كان بشتغل ولده قدام الشباب في الحي ،  لأنو كجر كان حارس المرمى بتاع الفريق وكان كويس والله لكن وحسب كلام أبوه حاج عثمان إنو حجر لو  زتو كشك في المرمى الحارسو ، عااادي الكشك بخش القون.

بابكر  دنكل سفة تانية وقبل ما يخش في الكوبليه بتاع أبسبح طاااااخ تسمع ليك..

و . سييييييييييك  .. جراها نزار زميل خالد الوزير القاعد شمال بابكر وقرقر.. قر . …. . فكاها ليك كجر ضحكة من  أمها لكن وكت ضحكوا زييين وتعرصتهم في بابكر  إنتهت.  سمعوا ليك صوت زي النشاب مرق جنبهم : فووووووو !!

واحد جاري جرى شديد خلاص حفيان وماسك عراقيو في سنونو!! 🏃🏿

الولد زميل بابكر زول كيشة في الكوتشينة لكن علي كمان الله راسو المدغلب ما حماو الجري خالص ، كان أسرع واحد فوقهم جت …  دقيقتين ماعملن .. و …  بردلب ،  جاب ليك بابكر كاكي دة الواطة!!.

طوالي غمتو ليك كربون وعرف بى نفسه في دقائق وقال ليو: معاك حامد لجان مقاومة. ✋

أها بى حلاوة الروح في الحلقوم الزول المعصور  تحت التراب  كورك :
_فكني ياخ ورب الكعبة ما عملت شئ

حامد بتاع لجان المقاومة ما خفف كربونه بالعكس ضغطه زيادة لكن حاج عثمان أبوكجر نهره وهرج فوقو ، قال ليو فكو دة جبارة سيد الزريبة الفوق لى الميدان بتاع الصحراء بى غادي لى سوق الندى.

_سوق الندى ألفي 13؟
سأل خالد الوزير والغريبة كان طابق مسجله معاو!! أتخيل لي كان هارش يجازفوه في درابزين ناس كجر لأنو ناس تسعة طويلة بقو يحوموا كتير في الإمتداد اليومين ديل.

المهم جبارة بعد ما أخد نفسو وبسمل ، دنقر في الواطة ولقى ليو تلاتة قشايات عجبنه ،  أخدن طوالي ، شخبط بى واحدة ، وكسر إثنين منهن.. أخد نفسو وتاااني بسمل .. رفع راسو وأخد نفس تاااني .. إتمغى ، وطقطق أصبعين .. شخبط في الواطة وثبت شوية . الخوف هنا زحّ.

. بابكر الوكت داك نسى موضوع جرة السيك ودنكل سفة تاااني. لكن كجر وأبوه ثبتوها ليّو .. عارفين بجي وكتها.

_ ياجبارة ياخ بنعرفك من زمن طويل شديد في الحي الوراني داك زول تجارة ساكت لا شفنا منك غلط ولا باطل .. مالك جاري كأنك حرامي؟ .
عمك عثمان بادر .. كان داير يعرف الموضوع شنو؟ .

حامد زميل بابكر الكيشة بس سمع كلمة حرامي طواالي قام نفخ صدرو كلجان مقاومة ونكز جبارة .

_يازول ما تخاف مابتجيك عوجة تب.
كان قايل نفسو ضابط 😁

_جبارة شكلو إتطمن شوية لأنه أخد الكيس بتاع الصعود من بابكر ، دنكل سفة بعد ما جدع القش من يده ونفضها. عاين لى حاج عثمان مسااافة قبل م يحوقل تالت ، ويطقطق أصابعينو .. كجر زاااتو كثافته جات لكن خاف أبوه يقوم يشتغله عشان كدة قطّم.

_العميد ، العميد الساكن في سوق الندى داك ، العميد التخين البوقف جماعته طواااالي بى عرباته تحت العمارة ياخ.

هنا تلفت الجميع من الحيرة فما هي علاقة الدعم السريع بزريية الفحم حقت جبارة؟

حامد بتاع لجنة المقاومة  طوالي نط أتقول عنده تار:

_آآآي آآآي بنعرفه ، العرص  مالو؟ .

هنا جبارة بقى يتلفت تاااني ،  بل ريقو وقرّب من حاج عثمان..

_ مرتو ..  مرتو الصفراء القصيرونة ديك الله لا كسبهاا. كمشوها مع شاب في الصحافة والعميد مدور تاتشراتو في حلتنا وقال داير ناسو وقلبها حرب ..  وهسة جماعتو مرتكزين في الميدان. وعشان يقنن المسألة قال دي حملة بتاعت حمى الضنك .. خايفها تنتشر في الحي .. وهو مشتبه في كم نفر في الحلة وداير يلقطهم!! .

أخد ليو نفس من سيجارة خالد الوزير وقبل ما يشيل منها نفس كبسو ليك كجر تااني بى سؤال؛

_ وأنت مالك جاري ي عمك؟؟  خشيت هناك برضو؟ .

<span;>_ ااه ويييييين ياا .. بس..  العود يا إبني .. عود الطلح .. جاء راجع من ماموريته فجأة لقاو مولع نار الله الموقدة في غيابه!! .
و…. بت الكلب كانت زبونتي. 😱

#حمى- النزيف – لازم – تقيف.

[email protected]

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى