جرح الخاطر ..

جرح الخاطر ..

محمد عبد الله برقاوي..

منو البعرف يا خاطري ..
إنك شاكي من جرح المحبه ..
ومنو البشوف ياقلبي ..
نزفك باكي من جور الأحبه..
ومين بيمسح يا سهري دمعك ..
لما سال بالحسرة صبه ..
ومنو البطفي لهيب بعادك ..
المسك في الروح ..وشبه ..
****
عشت طول عمري جدول ..
ساقي الورود الفوق ضفافي ..
طبعي ابداً ما تبدل ..
وكان ودادي نبيل وصافي ..
وحين عبوس الدنيا أقبل ..
في دروب زمن المنافي ..
مستحيل كان أصلو أقبل ..
بالتشاؤم .. و كنت نافي ..
إني استسلم ..مُكبل ..
في قيود العُزلة جافي ..
قلت عن أحبابي أسال ..
مشيت علي خطوات عفافي ..
طرقت دار عشرتنا أول ..
بس لقيت خلاني مافي ..
***
وياما حيرني السؤال ..
لما عود النُضرة جفه ..
أصبح شقاي آخر المآل ..
والزمن في الحال تشفى ..
شراعي تاه في العتمة ..جال ..
وما وجد للراحة ضفه ..
قبضت ريح الإرتحال ..
وطرفي هام بالوحشة رفه ..
وكفي خالي من المنال ..
وياما كان مرحاب وأوفى ..
***
ولسه فاتح برضو بابي ..
للبيدخل بالمودة ..
وديمة برحل شان صحابي ..
لو يغيبو.. علّيا مُده ..
ولو مضت خضرة شبابي ..
عودي لازال فيهو شِده ..
وساعدي للخير كم يشابي ..
ساعي بالموجود ..استعدا ..
ولا بمل مشوار عذابي ..
مهما نال من حيلي هده ..
****
الأمل زغرودة تصدح ..
غنوة من أحلى الحروف ..
والزمان لو تاني يجرح..
سهمو ..ما عاد منو خوف ..
أو دهر..غربتنا .. يطرح ..
همو .. من رحم الظروف ..
أو زناد الفرقة يقدح ..
في الدواخل نار صنوف ..
نزيح جيوش الهم .. ونكسح..
حتى لو وقفت صفوف ..
طالما الأرواح بتمرح ..
راقصة بالنغم العطوف ..
وكل واحد فينا يفتح ..
لنسايم الريد سقوف ..
وبي لسان الحكمة يشرح
ويبقى قلبه عيون تشوف ..
كل حاجة جميلة تسرح ..
في الوجود بالفال تطوف ..
****
جرح الخاطر بكرة يعدي ..
ويصبح ذكرى طواها الماضي ..
يلا نخت إيدك في يدي ..
وندعو معانا قلوب وايادي ..
سنين الحزن تفوت وتعدي ..
ويبقى الخير عنوان لبلادي ..
نرجع ناسا تاخد ..وتدي ..
وبالإخلاص للرفعة تنادي ..
رياح الإحن الهايجة تهدي ..
وراية أمالنا ترفرف غادي ..
البسمات في وجوهنا تندي ..
لا نتكاتل .. لا بنعادي ..
****
دولة الإمارات العربية المتحدة :
العين
18مايو 2017
[email][email protected][/email]