الحكومة تريد الشعب السوداني ألا يعرف ما له وما عليه !!!

الحكومة تريد الشعب السوداني ألا يعرف ما له وما عليه مما جعله يعتقد أن كل شئ حق الحكومة نتيجة لممارسات الحكومة وتصرفها في كل شئ بيعا وشراء وفقا لما تريد… وهذا يعني أن الشارع حق الحكومة والمدرسة حقت الحكومة والميادين حقت الحكومة والماء والكهرباء حقات الحكومة والمستشفيات حقات الحكومة وانت ذااااتك أيها المواطن الغلبان ملك للحكومة تذلك وتعصرك لمان روحك تمرق ولو لقت فيك حبة زيت برضو حقت الحكومة … عارف ليه؟؟؟ لأنك أيها المواطن لا تعرف حقوقك ولا تعرف كيف تطالب بها … والحكومة قصدت انك ما تعرفها وهذا من مصلحتها طبعا وهي عارفه انك لو عرفتها ما حتطالب بها لأنك حتقول نحن ما عندنا نقابات يعني نمشي لى منو والبجيب خبرنا منو؟ طبعا دي حقيقة ما بتغالطوا فيها اتنين لكن كمان الحق حق واليتيم ما بوصوهو على البكا!!!
لكن لما الدول تكون رافعة الشعارات الاسلامية مفروض تعمل بيها دون توصيات حتى لا توصف بالكذب والرياء والخداع والبعد عن الدين … أغرب حاجة انه الدول الكافرة والملحدة بتوضح حقها وحق مواطنيها في أبسط معاملاتها … يعني مثلا لو مشيت المستشفى أو مكاتب البريد أو الشرطة أو المدارس أو أي محل تجاري أو محل ترخيص سيارات أو مكاتب النقل والترحيل أو مجالس المدينة أو أي جهة ما … تجد هناك لوائح ونظم توضح ما لك وما عليك وانت ملزم بالاطلاع عليها مع الموظف المسئول بكل دقة ثم التوقيع عليها والأوله شرط آخره نور وبعد داك ذنبك فوق عضم رقبتك … لكن في بلدنا السودان انت ضائع أيها الانسان لأنك لا تعرف ما لك وما عليك … بس أبسط حاجة مفروض انك تعرف أن لك سبعة حقوق على الدولة لا تحتاج الى مطالبة أو نقاش خاصة عندما تكون الدولة رافعة شعار الانقاذ وهي: الأكل والشرب والسكن والعلاج والحياة والسلام والكلام… ووفقك الله الى ما يرام أخي المواطن مع تمنياتي لك بحسن الختام …

[email][email protected][/email]