عشان تاني..!ا
عشان تاني!!
استيلا قايتانو
جملة للشماتة والتشفي، تقال دائماً للزول الراسو قوي وعنيد، ويا رأيو أو الطوفان، زي دا لمن يغلط الناس تكون متكيفة جداً جداً، ولسان حالهم يقول عجبني ليهو عشان تاني!
في هذه الأشهر الأخيرة قبل الاستفتاء لنقول للمواطنين هذا قراركم أو قبل الانفصال لنقول لأنفسنا تحت تحت الموضوع محسوم. ينتابني دائماً احساس أنه مع نهاية العام عندما ينفصل الجنوب سوف تقول الحركة الشعبية لمؤتمر الوطني الشمال: عشان تاني. أها اتمحركت في تنفيذ الاتفاقية لحدي ما الجنوب انفصل، وفي كل محركة بركة، وسوف نقول لأحزاب الشمال وشعب الشمال: عشان تخلو ناس المؤتمر الوطني في الحكم لحدي ما فصلوا البلد والجايات أكثر. وبعد الانفصال اذا ساءت الامور في الجنوب وصدقت المخاوف والجنوبيين ديل عجنوا بعض بالصراعات القبلية وماتوا من الكوليرا والمجاعات؛ حينها سوف تتكيف حكومة الخرطوم وبعض الشماليين الذين يحسون حالياً بأن كرامتهم اتهانت لمجرد أن هناك أصوات تنادي بالانفصال بالجنوب فارغو وازبدوا وأطلقوا ما أرادوا من شطط الكلام والتهديدات، لترهيب جنوبي الشمال من مغبة التصويت للانفصال للتشويش على ارادته.. نقول الكلام دا ما بيمشي على زول فنحن في عصر القوانين والاتفاقيات، والجنوبيون في الشمال اذا صوتوا للوحدة فذلك من منطق ايمانهم بأن الوحدة هي شفاء، ولو طال الزمن أو قصر وليس من أجل سواد عيون أحد، أو كانت الوحدة جاذبة، كما أنهم لو صوتوا للانفصال أيضاً يكون ذلك ضمن ايمانهم بأن في ذلك الخلاص.. الحجة في شنو؟! في الوقت الراهن لن يفيد أن نتهم بعضنا البعض بانفصاليين أو وحدويين انما الوقت يجبرنا أن نكون واقعيين. ياخ أخوك الفي البيت معاك لو يوم “”كجنك”” وقال راحل يعيش براهو، على الأقل ستستف معاهو شنطو فذلك قد يخفف من صدى التوتر، وربما ينمي احساس بالرضا على الأقل لو ما غير رايو قعد يمكن ياخدك في حضن جامد، وهو يقول: الوداع.. وربما ينزل دمعتين تلاتة ويكرر” ما تنقطع عليك الله أدينا أخبارك أول بأول؛ لأنو العشرة ما هينة.. وقد يصيبه الحنين ويعود يوماً ما اذا غيرت أخلاقك دي. ولكن لو جدعت ليه هدوموا في الشارع وقلت ليهو: لابيني ولا بينك. يتم الفراق في جو مؤلم ومليء بالحقد والكراهية. وبالجد قد لا تراه مرة أخرى ولو في الدول المجاورة وبدل كلمات الوداع يقول: بركة الجات منك. دعوة لكل سوداني أصيل.. اجعلوا ما هو آتٍ محتملاً ولن يتم ذلك سوى بالهدوء والتفكير بروية والرضا التام بالواقع والتصالح معه، فالخوف والغضب عدوا التفكير السليم. كل أمنياتي الا تتحقق ولادة دولتين ضعيفتين، هلا نتبنى هذه الفكرة!؟ كيتاً في أي زول منتظر يقول عشان تاني.. والا يتم الانفصال بشكل مؤلم رحمة بمواطنينا!! فلا يكفي قول أننا نحترم خيار الجنوبيين اذا اختاروا الانفصال بل يجب الحاقه بجملة مهمة: وسوف ندعمهم حتى يقفوا على أرجلهم سنبني معهم دولتهم الجديدة كما بنى أبناؤهم أغلب عمارات الخرطوم في الحقبة الفائتة أيام رفع قدح المونة على الأكتاف وطلوع السلالم وليس بالرافعات والمضخات والخلاطات الحديثة، ونرسخ معهم المؤسسات المهمة.. أعلم أن يوتوبيا أفكاري قد تأخذني بعيداً ولكنه مجرد حلم أرجو تحقيقه وتبنيه. لأن ولادة دولة غير مستقرة يؤثر على الجيع وقد نقدم نموذجاً لانفصال غير مؤلم يدعم أطرافه بعضه بعضا، بدءاً بأحراق كروت الشماتة. قالوا في عزابة ساكنين مع بعض، بعدين جاهم واحدج سكن معاهم والظاهر كانوا شامنو شمة شديدة.. فبقوا يضايقوه عشان يرحل، يوم يجدعوا هدوموا ويوم يدسوا منو الشاي. كل يوم حيل جديدة، لكن عمك ولا شغال بيهم ولا سألم، في يوم من الأيام الله هداهم وندموا على عمايلهم مع الراجل المسالم، ومشوا اعتذروا ليه قالوا نحن آسفين وانت بقيت مننا وفينا ونعدك انو تاني ما نضايقك أصلو. قام الراجل قال: ما في مشكلة انا ذاتي تاني ما ببول ليكم في الزير. العداء يولد العداوة والمبالغة فيه تولد الانتقام.
الرائعة استيلا ….. واقعيتك فى كتاباتك تجبرنا ان نرفع لك القبعة وانت تنظرين لكل مشاكل السودان بهذه النظرة وليت ساستنا بالوراثة ادركوا معاناة الشعب واهتموا به بدلاً من الكراسي التى يتشبثون بها ولكن لا حياة لمن تنادى ….. لأنهم فوق هامات السحب لا يرون معاناة الشعب السودانى الصابر !!!!!!!!!!!!!!! لك كل التقدير وانت تجبريننا على أن نبدأ تصفح الراكوبة بما تخطينه بسلاسة ورقة … تحياتى لك ولكل من يتابع ما تكتبين ….
يا سلام يا استيلا… انت اروع من الروعة نفسها..
كَتابة…كَتَّابة….كتااااااااااااااااااابة..!!
انت جريت بنبري وقعدت من المقالة رقم واحد في هذه الراكوبة ذات الهمبريب الجنوبي والهوى والهواء الجنوبي..
الواحد من شدة ما ادمن كتاباتك.. نفسو كل يوم تنزلي مادة جديدة او تطلي علينا تحيينا فقط.. سلام عليكم او شيباك فقط..
الله يخليك ويغطيك ويعليك فوق الدايرِك والمابيك..
كنت اظن ان الحركة الشعبية ومؤيدي الانفصال او الاستقلال ان يكونوا اكثر الناس فرحا بمنبر السلام العادل (بغض النظر عن رايهم في اتفاقية نيفاشا) لانهم سوف يساعدون الانفصاليين في تحقيق هدفهم ولكن الان فقط ومن خلال طرح الكاتبة عرفت لماذ يكره الانفصاليون منبر السلام العادل لانهم يريدوا ان يقولوا صباح مساء انهم يريدوا ان ينفصلوا والسودان كله يقوم ويقعد عليكم الله ياجماعة ما تفوتوا مع دموع منهمرة وبعدها اذا طلبت منهم امريكا او غيرها ان ينفصلوا لن يلتفت احد لدموع وبكاء الشمال. يبدوا انه مهما فعل الشمال من معروف فلن يترك الانفصاليين ان يبولوا ويتبرزوا في زير الموية.
رائعة بالجد يا بت يا استيلا ,,,,,,,
حقيقة في فترة وجيزة جد دخلت القلب من اسع ابوابه بواسطة كتاياتك الرائعة التي تدعو الي التسامح والحوار ونبذ العنف واصبحنا مدمنين لكلماتك الرائعة بسيطة المضمون عظيمة المعاني ,,,,
ونتمني لك مزيد من التقدم والنجاح,,,,
يا بنت جنوبنا الحبيب الذي سيؤلمنا فراقه قبل ان نراه ونتمني ان لا يفارق شمالنا وان يتحد السودان بمفاهيم الرائع دكتور جون قرنق ,,,,
ونؤسس معا سودانننا الجديد ,,,
اختنا استيلا قايتانو ( حمامة السلام)
يا ريت كل جنوبى وكل شمالى يقراُ لاستيلا لانصلح الحال فى نفوس الجنوبيين والشماليين. لانها تكتب من منطلق الوطنيه الخالصة دون تحييز او تمييز . وده اسلوب راقى جداً يجب ان تحترم هذه االانسانه الراقيه ..
نعم يجب ان يكون هنالك فرصه للرجوع الى الوحدة مرة اخرى اذا انفصل الجنوب وده بكون بالوداع الطيب وعدم اثارة المشاكل حتى يكون فى فرصه للوحده مرة اخرة وانسجام تام بين الشمال والجنوب . نتمنى ذلك .. ونتمنى ان لا ينفصل الجنوب .. ونتمنى اذا تم الانفصال يكون بهدوء……….
حقيقة الطبع مباري الزي استيلا ( وزيك ما توجد له زي ) وحقيقة البساطة الفي كلامك اقصد كتاباتك ) حتي لو الواحد لا يعرف يفك الخط يقول لا للإنفصال العنيف ولا للإنفصال المدمر ووالله لا خيرا فيه لا للجنوب ولا للشمال وصدقوني حسابات كل الاطراف حا تفرق فيه تماما ولا احد يستطيع ان يتنبأ بما سيحدث والسودان كبير ياإخوانة بس نتفق سوي كلنا ونقرأ لأستيلا ومني ابو زيد وما دايرين اي صحفي رجال يكتب (كتابات جافة) وفقك الله استيلا ووالله بريدك في الله لموضوعيتك وبساطتك وغيرتك لمبادئك المتواضعة .
الأخت إستيلا ، تحية طيبة
تكلمت الحركة الشعبية بلسان المهمشين في كل السودان مطالبة بالعدالة في السلطة والثروة وليس بأسم جنوب السودان فقط ، لذا وجدت دعم من كثير من الشماليين وهنالك من أنخرطو في صفوفها ، وبما أن نيفاشا إتفاقية وقعت بين منتصر وهى الحركة الشعبية ومهزوم وهي حكومة الإنقاذ فلم تحقق هذه الأتفاقية العدالة والمساواة لكل السودان فالوحدة في ظل هذه الأتفاقية ظلم للشمال ، فالحكومات الشمولية المكونة من شماليون وجنوبيون ظلمت الجميع ، ولا بد من دفع الثمن ، فأنا أحبك ورغم ذلك أقول لك أحملي بقجتك وأرحلي جنوبا ولا تنظري في عيني فإنهم يفضحاني .
لم أفهمك يا سوداني ياغيور أفصح! أبن!.
well done the stelal of the sudan or more precisely the honour of sudan the only honest and rational voice in all the four corners of the sudan excellent assuring and optimistic writting you are the hope if there is anything to be called sudan once more my heartly greetings and appreciation keep writting please,;) ;) ;)
اّه منك ياكبسولة ياعسولة .. وتنزل دمعة دمعتين عشان العشره ماهينه . تحيه للقلم
الجميل من الانسان الجميل فى الزمن الرمادى .. والمقال مهداه للجبهجية
يا استازة رشا متعك الله ومتعنا بالعافية
من الكلام ده كله ومع اتفاقى التام مع كل الحادبين على امر البلد
عاوز الانفصال يتم بعد داك الطيب مصطفى ده بيقعد ساكت
ولا بيعمل لينا زنة تانى:o
الاخت استيلا، كنتي رائعة في هذا المقال كما عهدناك دوماً، وزيادة في الاحساس دا انا شمالي من مواليد واو ولدي الكثير من المعارف والصلات الاجتماعية بالجنوب والشمال رغم اني الان ببلاد المهجر، ابكي يومياً ما آل له حال الوطن واقول يا ناس كلنا سودانييين وخليكم عاقلين ما تدخلوا البلد جهنم يا السادة السياسيين. خلوا المواطن البسيط ومصالحه صوب اعينكم وارحموا من في الارض يرحمكم من في السماء.
تحياتي ليك يا استيلا يا غالية.
لو قالو ليك اوصف جمالك تفتكر تقدر تقول كل الحقيقة؟؟ اكيد لا….قالو الحركة الشعبية قالت للمؤتمر الماوطني انحنا خلاص حنبطل مشاكل كل يوم معاكم وحا نديكم نص البترول تاني في كلام…قام المؤتمر الماوطني مافي مشكلة انحنا ذاتنا تاني ما حا نسرق من البترول ولا برميل……..:lool: :lool: :lool:
well done you spoke my heart its very nice to know that there ar epeople who think rationally and write beautifully you are the sudan you remind me of ali abdlatif carry on god bless ,.
رائعة يا بنت يا نيل
ليت لك موقع في اتخاذ القرارات الحاسمة، مقالاتك يجب أن تقدم أوراق للبرلمان وتدرس في المدارس
ياحكيمه السودان يابنتنا والله لو لي ملكه الشعر او النثرلكتبت فيك القصايد الله يحفظك لينا عشان تفريحنا وتبثي في نفوسنا الامل بعد ان كاد ان يموت ولكن لله في خلقه شوون ليه في بلدنا مافي ديمقراطيه حقيقيه لكي تكوني ريسه هذا البلد التعيس ليفرح بك اهله وتكوني كالشمعه التي تضي لنا الطريق وماتنقطعي من الكتابه لانو والله لمن مااجد لك مقالا ارجع الي حزني والامي حفظك الرب من كل مكروه ومزيدا من الوعي عسي ولعل ان تصلحي ما افسده الساسه ولك التحيه
خسار بلد تقسم وتنفصل وجنوب يروح وفيه امثال استيلا بارك الله فيك وفى مقالاتك
الدسمة بالافكار النيرة والتى تحكى حالنا بعفوية تامة وصراحة باينة وتحللين بعض المشاكل بصراحة تامة رغم حداثة سنك عقلك يدل على تجربة شخص عاصر عقودا من الزمن انتى درة غالية الثمن اتمنى لك موقعا مهما بالحركة الشعبية حتى تكونى حلقة وصل وسفيرة ناجحة ودبلوماسية ذكية بين الشمال والجنوب 0
beautiful mind, beatiful mentality, beatiful lady I salute you Stela
We love you so much go a head and give us more, never stop.
استيلا كلام والله في المليان لكن كدي نشوف الكلام ده ببقي من طرف واحد يعني
والا تبقي علينا حكاية الفار الابوه مات جو يساعده في الدفن دس المحافير
طول عمرنا عايشين مع بعض حتي ايام الحروب اخواننا الجنوبين نزحوا لبلدهم الشمال
ما راحوا للدول المجاوره لانو البيت كبير وبشيل الجميع بس كلام انفصال ده كلام سياسه وسياسين ده ما كلام مواطنين
الساسه الجنوبين دولا كلهم كانوا عايشين في بلاد بره يعني حتي مابعرفوا عن المواطنين شئ
وربنا يكضب الشينه
الله الله من جمال كلامك استيلا 0000لو كان هنالك عاقل لأهتدوا بعقلك الكبير الذي وسع كل هذا الهم ولخصو في مختصر كلام0000لو كان فيهم عاقل لما شطحوا شطحات قد تباعد بينهم0000وهم قد نسوا في غمرة انفعالاتهم انهم اخوة 000 وحكمة اردت ان اوردها هنا 000اذا كان اخوك جافاك وشعرت بغربتك وانت قريب منو 0000أرحل 000رغم الرحيل المر 0000عسى الزمن يحنن قلوبكم وتتلاقو تاني:eek:
الكلام حلو لكن ضاع السودان بين ان نكون دوله دينية او دولة علمانية كل الناس تبكي الان الافتراق باحسان خير كما قلتي نريد ان عاد السودان للوحدة ان يكون دولة لكل السودانين لافرقة بين دين ولون وعرق