الفنان الشاعر أحمد الفرجوني يبعث برسالة إلى أحرار ميدان الشعبية ببحري (صوت)
أحرار ميدان الشعبية في بحري
هلا هلا
كفيِّتوا
ووفيِّتوا
وذليتوا الحكومة عديل
وريتوها محل المظاهرة
ومواعيدا
وقدر ما حاولت انها تقفِّل عليكم الطرق
أوفيتوا في الموعد وعملتوا المظاهرة
واستفزوكم وضربوكم .. ثبتوا
ومصرين على سلميتكم
هلا هلا
هلا هلا
****
كفيتوا ووفيتوا
وزدتوا على الوفاء شوية
اريت كان كنت بيناتكم
أردد في هتافاتكم
سلمية سلمية
الكيزان حرامية
اركزوا ووحدوا صفوفكم
فاطمة السمحة بتشوفكم
اريت كان كنت بيناتكم
أردد في هتافاتكم
زول الأمن زاد خجلوا
كيف الزول بذل أهلوا
زول الأمن بقى مقصوف
خجلان، عادم المعروف
اريت كان كنت بيناتكم
أردد في هتافاتكم
من دارفور ولكسلا
تسقط طغمة القتلة
اريت كان كنت بيناتكم
والخواف اذا شفتوا
بشيل الطرحة من أختو
اريت كان كنت بيناتكم
أردد في هتافاتكم
مهيرة تعالي شوفيني
أعينك وانتي عينيني
مهيرة الفي الصفوف قدام
الكيزان لصوص وأقذام
واريت كان كنت بيناتكم
أردد في هتافاتكم
شمال وجنوب، وفي الخرطوم
عيون الظالمين ما تنوم
لا للجوع ولا للذُل
يعيش وطني ونموت الكل
واريت كان كنت بيناتكم
أردد في هتافاتكم
كفاك ذلة وكفاك أحزان
ولازم تمشوا يا كيزان
ما بنخاف وما بنخاف
الكيزان لصوص وأجلاف
واريت كان كنت بيناتكم
أردد في هتافاتكم
الكيزان وحاة الله
خاينين لكتاب الله
تاني الثورة لا بتقيف
ولا بننغش بالتزييف
واريت كان كنت بيناتكم
أردد في هتافاتكم
كفاية مذلة ثور يا جيش
نموت نحنا ووطنا يعيش
وين يا جيش رجالتكم
مهيرة السمحة لامتكم
واريت كان كنت بيناتكم
أردد في هتافاتكم
نار الثورة شِبوها
وعازة السمحة عزوها
يافرسان عواة الخيل
أبدوا مظاهرات الليل
واريت كان كنت بيناتكم
أردد في هتافاتكم
تعيش عزة ويغني خليل
وتتحرر بلاد النيل
نحن رجال نشيل الشيل
ويسقط كل كوز وعميل
أحمد الفرجوني
ا فبراير 2018
[SITECODE=”youtube YS-cAUz13ts”].[/SITECODE]
اريت كان كنت بيناتكم
أردد في هتافاتكم
ثورة حتى النصر …
شكرا الفرجوني الكلس .
++++
واريت كان كنت بيناتكم
أردد في هتافاتكم…
يا ليتنا كنا بيناتكم أيها الشعب الجميل .. طائر العنقاء. طيب المحيا والأخلاق الصبور، والذي ظن تجار الدين أن صبره خوف .. وأقول لكم من على البعد.. يا شعبا لهبك ثوريتك تلقى مرادك والفي نيتك… يكفينا العم بمبان..
أيها الشعب الجميل أنت ذهب مجمر لا تزيده المحن إلا صلابة وجمال.
حياك الله يا الفرجوني و حيا الله نضالات الشعب السوداني
هلا الفرجوني ولعلك الشاعر الرابع
شكرا الفرجوني …ثورة حتى النصر
اريت كان كنت بيناتكم
أردد في هتافاتكم
ثورة حتى النصر …
شكرا الفرجوني الكلس .
++++
واريت كان كنت بيناتكم
أردد في هتافاتكم…
يا ليتنا كنا بيناتكم أيها الشعب الجميل .. طائر العنقاء. طيب المحيا والأخلاق الصبور، والذي ظن تجار الدين أن صبره خوف .. وأقول لكم من على البعد.. يا شعبا لهبك ثوريتك تلقى مرادك والفي نيتك… يكفينا العم بمبان..
أيها الشعب الجميل أنت ذهب مجمر لا تزيده المحن إلا صلابة وجمال.
حياك الله يا الفرجوني و حيا الله نضالات الشعب السوداني
هلا الفرجوني ولعلك الشاعر الرابع
شكرا الفرجوني …ثورة حتى النصر