الخرطوم:محاسن أحمد عبدالله
رثي الشاعر الكبير مدني النخلي صديقه ورفيق دربه الشاعر محمد طه القدال بقصيدة مؤثرة سكب فيها كل تعابير ومعاني الحزن في الفقد الجلل تحت عنوان (الى الحاضر فينا
القدال)
والفقد اكبر من
حبر النزيف…
…….
واضح وبسيط
مستور الحال..
زي رش الضهري
الغسل النال..
ياصوت الحق
ونداء الامال..
غايب لكين
حاضر في البال
اهو ده المكتوب
حتم الاجال…
ارقد عافيه
خليت بوراك
صوتك نداه
في كل مداك
خليت قدال..
غرسك ياضي
ما مرخي وني
عرقو الثابت
وهتافك ري..
امس البلدات
ممطوره وبيك
غنو البنوت
سمرية الفال
لفتاتا غزال
من غيم الضل
شالت شبال
اطمن خير
والخير في الناس
وين ماتقبل…
بتشوف قدال..
واضح ثابت
مستور الحال..
في حليوه البيت
والشارع ماج
احبابك جوك
من كل فجاج
دافرين كالموج
افواج افواج
ديل ناس الله
وبيوت الطين
ماعلا ابراج
رايات رايات
دعاء طيبات
قلدوك عرضه
ووقفو الجنيات
هتافم يضج
قدال بيننا
قدال ما مات…
بردا وسلام
مطامن بيك
حريه سلام
الوطن البيك
سار لا قدام
والبحر.البيك
دفر الهدام
وحلمنا معاك
لا شقى يغشاك
لا وطن ينضام
والسماء غطاك
انسام وغمام..
شايفنك شوف
بينات اخوان
وانهار وجنان
مبسوط بلحيل
ماك الحزنان
قدامك حور
ووراك بستان
رحمات مولاك
تغشاك ريقان
يا كم قدال
ساكنين البال
ياعشق الناس
وثرى السودان..
