سلام ياوطنّا و يا أهلنا

سيد محمود الحاج

سلام ياوطنّا و يا أهلنا
و يا تراب من حسرة أنّ

نبكي يوت و الشوق كتلنا

ما عرفنا وين صبحتوا

و وين مسيتوا !!

لا بلوم فوق فرعه غنّى

لا رُشاش دانانا حنّ

و المحنّة الدافقة ديمة

و ضُل نيمة ختّ

فوق بويتاتنا القديمة

ناس خجيجة و ناس حليمة

و لمّة الضهرية هاجّة

ريحة البُن و القلوة قاجّة

يا حليلنا وكتين أكُنّا

في رحاب السلم وطنّا

القدر بي حنّو ضنّ

بدّل النسمات سمائم

ليها شنّة و ليها رنّة..

من جهنم ماشّة جايا

ماج شقانا و مات أملنا

فوق متون الهم دفرنا

و القِبَل ضلاما شايل

و دمّك يا ولد بين القبائل

جاري في الوديان و سائل

و لسه قوم المك في بُطانُن

و ناس بامسيكا و نايل

في قنيصُن و في حُجاهن

بيناتُن عود القسمة صائل

وجيعك يا وطن ..

في بطن تمساح مسجّى

و ترانا في عِتَم الدياجي

لا رجعنا لا وصلنا ولا هجسنا

ولا عرفنا ياتو فجّة نلقاها مثوى

كان زقاقات الحواري

كان عتامير الضهاري

كان متاهات الصحاري

كان يكون مثوانا لُجّة !!!

ياتو حُجّة نسوقا ليك

و انت الشلتا في عينيك قبائل

الحسرة يا وطن عودنا مائل

لا ركز فوق دكّة واقف

لا وقع صبح منزاح و زالف

لا السوالف خلتنا نوعىَ

نشوف مين عدونا و مين صليحنا

فات سمحنا

و داااك قمحنا ..

مشتّت فوق سرابات الجداول

حتى الطير نزح

من لحظة البوم الرّدح

هجر الدوح و هجّ

فات عشيشو الفي الخمائل

في لجة العتمور سرح

و الوجعة ياوطن …

لا بان صباح لا فجره شائل !!

سلام يا وطنّا ..

نبكي يوت و الشوق كتلنا !!!
[email protected]