د. الرازي الطيب ابوقنايه
اكبر سرقة في حق المواطن السوداني الضعيف بتتم بواسطة معادلة شيطانية من تاليف تجار العملة في بريطانيا لطريقة التحويل. المعادلة بتتمثل في كيفية شراء الإسترليني مننا الشعب الغلبان ده. الجماعة ديل كانوا بشتروا مننا الإسترليني بي سعر المليون السوداني (ودي المعادلة الاجرامية) يعني يقولوا ليك مثلا المليون بي اتنين جنية ونص استرليني) مع انه مفروض المعادلة تكون بي سعرالاسترليني قصاد الجنية السوداني وليس العكس (يعني مفروض كان يقولوا ليك الإسترليني بي كم سوداني وليس المليون السوداني بي كم استرليني). طيب الفرق شنو؟ الفرق لمن يحاسبوك بي سعر المليون بتكون مرغم بعد داك تعمل عمليه حسابيه تانية عشان تصل لي سعر الاسترليني كم ( مثال: لو قالوا ليك المليون بي ٢.٢٠ ( اتنين جنيه إسترليني وعشرون بنز) مثلا وتجي تحسب القروش الداير تحولا ونقول ١٠٠٠ استرليني مثلا بقع ليك الاسترليني في الحاله دي بي ٤٥٤ ج سوداني) مع انه سعره في السودان بكون بي خمسميات في اللحظة ديك يعني بكونوا ربحوا منك زي ٥٠ سوداني في كل جنيه استرليني وشوف بقي لمن تحول ١٠الف جنية استرليني؟
الحكاية دي كنّا طوالي بنلفت نظرهم ليها بس هم عشان كانوا متكسبين ماكانوا شغالين بينا وكانوا كمان بعملو لينا بلوك من حسابهم (يعني زول بلهط يومي كم مليون منك معقول يهتم بي كلامك؟)
المهم. بعد تعويم الجنية وبدينا نحول بالبنك زينا وزي اي مواطنين لي دولة محترمة، القصة وضحت تماما ( اتو مفتكرين تحويل بالبنك يعني بنمشي البنك وكده؟ لا لا اطلاقا. الموضوع بسيط جدا وانته راقد في بيتك تدخل موقع وسترن يونيون وتعمل التحويل وبي نقرة الماوس يكون تحويلك وصل سعد قشرة). إضافة لذلك، وانته في رقدتك ديك طوالي البنك بوريك التحويل بي كم بدون تحانيس وجرسة زي الكانت بتحصل قدام حضرة تاجر العملة ( ٥١٣ قال ليك). في الاول ماصدقنا لانه سعر السوق الاسود اول يوم التحاويل بالبنك كان بي ٢٠٣ ( اتنين جنيه وعشرين بنز) وده معناه الاسترليني بصلك في السودان بي ٤٣٤ ج سوداني. شفتوا الفرق كبير كيف من ٥١٣ سوداني لي ٤٣٤ سوداني؟ عشان كده لمن التجار عرفوا اننا اكتشفنا حقيقة المعادلة الاجراميه دي، طوالي زادوا سعر الاسترليني لي ٥٠٠ سوداني وبعد كم يوم اتصل علي زول قال لي وينك انته الجماعة ديل زادوا السعر لي ٥٣٠ سوداني. انا شخصيا في اليوم داك حولته زي ٤الف جنية استرليني وكان ممكن اكسب قروش اكتر لو سمعته كلام صاحبي وحولته مع تاجر العملة بس برضو حولته بالبنك لانه كنته حاسي بي فخر ووطنيه لا مثيل لهما.
مره سمعته داعيه إسلامي (تقدمي) قال انا بصوم رمضان موش عشان الجوع فيه صحة للجسم او لانه العطش بكتل مجموعه من الامراض، قال انا بصوم رمضان عشان الله قال صوموا. نقطه سطر جديد. تعرفوا ياتجار العمله وياكيزان ويا أي زول بفتكر خدمات تحويل العملة بواسطة التجار اسرع واريح نحنا بنحول بالبنك ليه مع انه زحمة وكده؟ بنحول بالبنك عشان حمدوك قال لينا كدة. نقطتين وسطرين جداد ياسحس.
د الرازي الطيب ابوقنايه
[email protected]
لندن
ياريت لو كتبت كلامك هذا من منطلق الوطنيه والدعوه للم شمل ابناء الوطن دون التشهير بالآخرين فان كنت تعرف او لأ تعرف فالكيزان ايضا لديهم مؤيدين ونحن لا نريد ان تضيع البلد مابين يسار ويمين…..أما ان لهذا الشعب ان يرتاح.