هذه اغرب حالة مرت علي..المعالج النفسي د.سليمان علي احمد في ( الاحداث ) .. انا خليفة في الطريقة الاسماعلية.. وبرمي الزلابية في البيت

الدكتور سليمان علي احمد معالج النفسي , تخرج في جامعة الخرطوم قسم علم النفس وحصل علي الدكتوراة بعد رسالته التي حملت عنوان (التوافق الزواجي وعلاقته بالصحة النفسية للزوجين , يطل على المشاهدين عبر فضائية النيل الازرق عبر البرنامج الشهير ( مافي مشكلة ) رفقة الدكتورة سارة ابّو وهو برنامج مختص في حل الاشكالات النفسية , د/ سليمان يطل اليوم عبر ( الاحداث ) في دردشة عن الوجه الآخر له فالى ما قاله الدكتور .

عبدالله برير

-انت من وين يا دكتور ؟
= انا من قرية اسمها ام قناص تبعد حوالي تسعة كيلومترات من ام روابة , ابوي كان رجل مزواج واتزوج تلاته نسوان ووالدتي هي الاخيرة , انا اصغر واحد بين اخواني كلهم .
– كلمنا عن الطفولة ؟
= كنا بنلعب الالعاب الشعبية زي لعبة حارّة , لكّت , شليل وغمدت لبدت , على فكرة انا خشيت المدرسة في غير عمرها مشيت مع اختي وبعد داك علّقت في المدرسة وجيت الاول ولي هسة محتفظ بالشهادة .
– كنت متوقع انك تكون اخصائي نفسي ؟
= لا لا , كان نفسي اقرا اشعة ومختبرات لانو كان في زول في الحلة قراها والناس كلهم محترمنو وكان نفسي ابقي زيو .
– بتسمع لمنو من الفنانين ؟
= من القدامى بسمع العاقب محمد حسن وبرتاح لاغنية يا حبيبي انحنا اتلاقينا مرة , ومن الشباب بسمع لخالد الصحافة وبتعجبني عندو غنية ( لحظات ندية ) , غير كدة بسمع للشوايقة ونادرا ما تخلو عربيتي من شرايط الشوايقة , وبرضو انا مدمن للمدائح النبوية خاصة اولاد الشيخ اسماعيل الولي لاني مرتبط بالتصوف وانا خليفة في الطريقة الاسماعيلية .
– انت دكتاتور في البيت ولا ديموقراطي ؟
= انا متزوج وعندي بنتين شهد ورواء , بيتي فيهو مساحة من الحوار , زوجتي عندها ماجستير في علم النفس .
– اتزوجتوا عن حب ولا زواج تقليدي ؟
= يمكن تقول اتزوجنا عن حب , انا درّست زوجتي في الجامعه وكنت لما اشتغل محاضرات بتقول انو الدكتور دا زوجتو حتكون سعيدة وما عارفة انها هي حتكون زوجتي في المستقبل .
– حصل انضربت شاكوش ؟
= انا ما بسميهو شاكوش بل انا خضت تجربة وما نجحت لانها كانت معقدة .
– هلالابي ولا مريخابي ؟
= انا هلالابي مع اني قبل كدة زمن حاتم عبدالغفار كان مدير كرة بالمريخ قدمت ليهم مقترح لبرنامج اسمو ( تنمية الجوانب السلوكية للاعبي المريخ ) لكن المشروع لم ير النور .
– بتشارك زوجتك في بعض الاعمال في البيت ؟
= انا مشارك مشاركة فعالة في الامور المنزلية , بيتنا فيهو انا ووالدتي وكل واحد فينا عندو دور , انا بعد اجي من صلاة الفجر عندي اول حاجة ( اوراد ) وبعد داك يوميا برمي الزلابية مع زوجتي , وبساعد في تجهيز البنات للروضة , وعندي علاقة متينة مع المطبخ وبعرف اعمل العصيدة وملاح التقلية وملاح البطاطس , لكن الحاجات العايزة مهارات عالية الا تعملها المدام .
– اغرب حالة مرت عليك سواء في برنامج ( مافي مشكلة ) في قناة النيل الازرق او في عيادتك النفسية ؟
= في برنامح مافي مشكلة اتصلت علينا واحدة عمرها 16 سنة وهي متزوجة وكانت بتتكلم بي صوت منخفض وزي الخايفة كدا , قالت انها كانت بتحب واحد قبل ما تتزوج وظهر واتصل عليها ووعدها بالزواج لو اتطلقت من زوجها الحالي , ونصحناها بانها ما تتطلق لكن ما سمعت كلامنا واتطلقت , بعد داك الشخص القال بتزوجها ضرب لي وقال لي اكلمها انو هو خلاها وما داير اتزوجها .

الاحداث