شاهد الفيديو : قصيدة وطن واحد – للشاعرة سوزان كاشف

قصيدة وطن واحد

سوزان كاشف

دايرين وطن صافى
لا فيهو قبلية
لا فيهو جهوية
زرقة و عرب مافى
وطنا هو السودان
واصلو السبب كافى
اولاد بنات دارفور
ما دمهم موية
ولا كان فى يوم مهدور
لما الصباح يطلع
و شمس الحقيقة تدور
نعرف نجيب تارنا
و شيهدنا مات مغدور
فجر الخلاص قرب
خطواتنا دغرية
علو الهتاف يا شباب
ماتناضلو بالنية
أطلع و ناضل و كون
لسة الوطن راجيك
و شارعنا ما بيخون
اطلع و ناضل و كون
صوت الوطن ناداك
كل الوطن ممكون
علو الهتاف يا شباب
لازم نعيش و نكون
علو الهتاف يا شباب
لازم نعيش و نكون
بكرة الصباح بطلع
و جراحنا تتعافا
نبنو وطن واحد
و قلوبنا تتصافا
علو الهتاف يا شباب
لازم نعيش و نكون
و الثورة لما تقوم
و تملا المدن نارها
ما بين هتاف و هدير
و تعبى ثوارها
فى حلفا فى مدنى
فى عطبرة و بارا
فى كسلا و الخرطوم
علو الهتاف يا شباب
لازم نعيش و نكون
علو الهتاف يا شباب
لازم نعيش و نكون
سوزان كاشف بدرى

09/12/12

[SITECODE=”youtube r26_phte2wg”]سوزان كاشف وقصيدة – امام السفارة السودانية بلندن [/SITECODE] [URL]http://www.youtube.com/watch?v=r26_phte2wg[/URL]